(សិល្បៈ)៖ មហាជន បានដឹងរួចមកហើយថា តារាសម្តែងឆ្នើមលំដាប់ប្រទេស កញ្ញា ​ស៊ីន យូប៊ីន ជាតារាស្រីកម្ពុជាដំបូងគេ ​ដែលទទួលបានការអញ្ជើញពីប្រ៊េនល្បី Dior ដើម្បីចូលរួមកម្មវិធី Christian Dior Haute Couture Spring Summer 2023 ក្នុងព្រឹត្តិការណ៍ Paris Fashion Week ប្រចាំឆ្នាំ២០២៣ ។

យ៉ាងណាមិញ វត្តមានតារាស្រីរាងតូចច្រឡឹងលំដាប់ប្រទេសរូបនេះ ក្នុងព្រឹត្តិការណ៍អន្តរជាតិពិតជាធ្វើឱ្យសិល្បកររួមអាជីព និងអ្នកគាំទ្រមានមោទកភាពខ្លាំង ចំពោះរូបនាង។ អ្វីដែលកាន់តែធ្វើឱ្យអ្នកគាំទ្រភ្ញាក់ផ្អើលខ្លាំង គឺ យូប៊ិន មិនត្រឹមតែបង្ហាញខ្លួនជាភ្ញៀវក្នុងកម្មវិធី Paris Fashion Week របស់ប្រេន Dior នោះទេ នាងថែមទាំងចូលរួមដើរបង្ហាញម៉ូតឱ្យ​ប្រេន Celia show ថែមទៀតផង ដែលនាងធ្វើបានយ៉ាងល្អ...។

គួរឱ្យដឹងផងដែរថា មុនថ្ងៃបង្ហាញខ្លួនក្នុងកម្មវិធី Christian Dior Haute Couture Spring Summer 2023 ស៊ីន យូប៊ីន បានទៅហ្វឹកហាត់ការដើរបង្ហាញម៉ូដពីលោក ម៉ែន សីហា ហៅ​ អូលីវ៉ា គង់ (Oliva Kong) ជាអ្នកច្នៃម៉ូដម្នាក់ដ៏មានទេពកោសល្យ និងពោរពេញដោយភាពច្នៃប្រឌិត ហើយក៏ជាអ្នកជំនាញដើរ​ម៉ូដដ៏ប៉ិនប្រសព្វផងដែរ​។ ដូច្នេះ ទើបតារាស្រីរាងតូចច្រឡឹង​កំពុង​មាន​ឈ្មោះ​បោះសំឡេង​លើ​ឆាក​អន្តរជាតិ​រូបនេះ ធ្វើបានយ៉ាងល្អឥតខ្ចោះ និង​ធ្វើ​ឱ្យ​កម្ពុជា​មាន​មោទកភាព​ចំពោះ​នាង​ជាខ្លាំង។

សូមបញ្ជាក់ថា តារាសម្តែងស្រីឆ្នើម ស៊ីន យូប៊ីន បានទទួលការអញ្ជើញឱ្យចូលរួមដោយត្រង់ពីប៊្រេនល្បីៗចំនួន២ គឺ Christian Dior និង Celia Kritharioti ដែលរៀបចំឡើងនៅក្នុងប្រទេសបារាំង៕