រដ្ឋធានីហ្សាការតា៖ កាលពីថ្ងៃទី១២ ខែឧសភា ក្នុងនាមជាប្រធានាធិបតីជាប់ឆ្នោតថ្មីថ្មោងរបស់ឥណ្ឌូណេស៊ី លោក ប្រាបូវូ ស៊ូប៊ីនតូ (Prabowo Subianto) ត្រៀមចូលកាន់តំណែងក្នុងខែតុលា លោកហាក់ដូចជាមានជំហររឹងមាំបន្ថែមទៀតនៅក្នុងគោលនយោបាយការបរទេស ដោយនិយាយថា ទំនាក់ទំនងការទូត ការចរចា និងវិធីសាស្ដ្ររបស់អាស៊ី (Asian way) បានជួយដោះស្រាយភាពតានតឹង។
លោក ប្រាបូវូ អាយុ៧២ឆ្នាំ បានឈ្នះការបោះឆ្នោតសកលនៅខែកុម្ភៈដោយចំនួនដ៏ច្រើនរួមជាមួយអនុប្រធានាធិបតី លោក ជីបរ៉ាន រ៉ាកាប៊ុមមីងរ៉ាកា (Gibran Rakabuming Raka) ដែលជាកូនប្រុសច្បងរបស់ប្រធានាធិបតីផុតអាណត្តិ ចូកូ វីដូដូ (Joko Widodo)។ នៅក្នុងបទសម្ភាសជាមួយទីភ្នាក់ងារសារព័ត៌មានកាតា Al Jazeera ដែលចាក់ផ្សាយកាលពីថ្ងៃអាទិត្យ លោក ប្រាបូវូ បាននិយាយថា៖«អាស៊ីអាគ្នេយ៍បានជួបប្រទះសង្គ្រាម អាណានិគមបរទេស និងការជ្រៀតជ្រែកក្នុងនយោបាយផ្ទៃក្នុង។ ប៉ុន្តែយើងដោះស្រាយវាដោយគ្មានការជ្រៀតជ្រែកពីបរទេស យើងជជែកពិភាក្សាគ្នា យើងបានជួបប្រជុំគ្នា»។ ការលើកឡើងនេះ បានធ្វើឡើងដើម្បីឆ្លើយតបនឹងសំណួរមួយអំពីអត្ថន័យនៃពាក្យថា វិធីសាស្ដ្ររបស់អាស៊ីសម្រាប់លោក។
នៅពេលសួរអំពីការប្រកួតប្រជែងរវាងចិន និងសហរដ្ឋអាម៉េរិកសម្រាប់ឥទ្ធិពលនៅក្នុងតំបន់ អតីតមេបញ្ជាការកងកម្លាំងពិសេសរូបនេះបានឆ្លើយថា៖«ឥណ្ឌូណេស៊ីបើកចំហយ៉ាងខ្លាំងចំពោះប្រទេសទាំងពីរ។ យើងគោរពអ្នក ហើយដឹងគុណចំពោះជំនួយកន្លងមករបស់អ្នក»។ លោកបានបន្តថា៖«យើងអញ្ជើញទាំងសហរដ្ឋអាម៉េរិក ជប៉ុន កូរ៉េ អឺរ៉ុប។ ជាការពិតដែលថា យើងជាមិត្តជាមួយអ្នកមិនមានន័យថា យើងមិនអាចធ្វើជាមិត្តជាមួយប្រទេសចិន ឥណ្ឌា រុស្ស៊ីបានទេ»។ លោកក៏បានលើកឡើងពីប្រពៃណី និងប្រវត្តិសាស្ត្ររបស់ប្រទេសឥណ្ឌូណេស៊ី នៃការមិនចូលបក្សសម្ព័ន្ធ។ នៅក្នុងវេទិកាថ្នាក់តំបន់កាលពីខែវិច្ឆិកាកន្លងទៅ លោក ប្រាបូវូ បាននិយាយថា ប្រទេសឥណ្ឌូណេស៊ីបានប្តេជ្ញាចិត្តចំពោះគោលនយោបាយរបស់ខ្លួន ដែលមិនចូលបក្សសម្ព័ន្ធ ហើយនឹងរក្សាទំនាក់ទំនងល្អជាមួយប្រទេសចិន និងសហរដ្ឋអាម៉េរិក។
កាលពីខែមេសា លោកបានធ្វើទស្សនកិច្ចនៅប្រទេសចិន ជប៉ុន និងម៉ាឡេស៊ី ក្នុងដំណើរទស្សនកិច្ចបរទេសលើកដំបូងរបស់លោកចាប់តាំងពីឈ្នះការបោះឆ្នោតប្រធានាធិបតី។ ក្នុងអំឡុងបទសម្ភាស លោកបានបដិសេធការដើរថយក្រោយតាមលទ្ធិប្រជាធិបតេយ្យ ដោយនិយាយថា ប្រទេសឥណ្ឌូណេស៊ីបានមើលឃើញការផ្ទេររដ្ឋាភិបាលដោយសន្តិវិធីជាច្រើនឆ្នាំ បើទោះបីជាមានបញ្ហាដែលចាំបាច់ត្រូវដោះស្រាយ ដូចជាអំពើពុករលួយដ៏ច្រើនសន្ធឹកសន្ធាប់ក៏ដោយ។ មេដឹកនាំថ្មីថ្មោងរូបនេះបានបន្ថែមថា៖«ផលប្រយោជន៍ជាតិរបស់យើង នឹងណែនាំវិធីសាស្ដ្រចំពោះស្ថានភាពនៅខេត្តភាគខាងកើតបំផុតនៃប្រទេសប៉ាពូ (Papua) ដែលជាកន្លែងដែលក្រុមផ្តាច់ខ្លួនប្រដាប់អាវុធបានប៉ះទង្គិចជាមួយកងកម្លាំងសន្តិសុខអស់រយៈពេលជាច្រើនឆ្នាំ»៕
