រាជធានីភ្នំពេញ៖ ប្រទេសចិន នឹងជំរុញការអនុវត្តប្រកបដោយគុណភាពខ្ពស់នៃកិច្ចព្រមព្រៀងពាណិជ្ជកម្មសេរីចិន-កម្ពុជា គាំទ្រការនាំចេញកសិផលដែលមានគុណភាពរបស់កម្ពុជាទៅកាន់ប្រទេសចិន និងលើកទឹកចិត្តសហគ្រាសចិនកាន់តែច្រើនមកបណ្តាក់ទុននៅកម្ពុជា។ នេះគឺជាការប្តេជ្ញាចិត្តរបស់​លោក វ៉ាង យី រដ្ឋមន្ត្រីការបរទេសចិន អំឡុងដំណើរទេស្សនកិច្ចមកកម្ពុជា។

លោក វ៉ាង យី ប្តេជ្ញាចិត្តដូច្នេះនៅចំពោះមុខ ឯកឧត្តម ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍកម្ពុជា ហៅកាត់ថា​ CDC ក្នុងជំនួបពិភាក្សាកាលពីថ្ងៃទី២២ខែមេសាឆ្នាំ២០២៤។ ក្នុងជំនួបដដែលនោះ ភាគីទាំងពីរបានឯកភាពយកឆ្នាំផ្លាស់ប្ដូរប្រជាជនចិន-កម្ពុជា ឆ្នាំ២០២៤ ជាឱកាសដើម្បីបង្កើនការផ្លាស់ប្ដូរទេសចរណ៍ ជើងហោះហើរ និងអ្នកដំណើរ។ ភាគីទាំងពីរជឿជាក់ថា ការរក្សាបាននូវសន្តិភាព និងស្ថិរភាពក្នុងតំបន់ និងការលើកកម្ពស់ការអភិវឌ្ឍ និងវិបុលភាពក្នុងតំបន់ គឺជាផលប្រយោជន៍រួមរបស់ប្រទេសក្នុងតំបន់។

គួរជម្រាបថា កាលពីឆ្នាំមុនចិនឈរលេខរៀងទី១ក្នុងការបណ្តាក់ទុនវិនិយោគនៅកម្ពុជា។ ជាកស្តែង ក្នុងឆ្នាំ២០២៣ រំហូរទុនវិនិយោគឯកជននៅកម្ពុជា មានការកើនឡើងចំនួន២២ភាគរយបើធៀបនឹងឆ្នាំ២០២២។ ក្នុងនោះមានគម្រោងវិនិយោគសរុបចំនួន២៦៨ ដែលមានទុនវិនិយោគប្រមាណជិត៥ពាន់លានដុល្លារ។ ក្នុងចំណោមគម្រោងវិនិយោគសរុប ក្នុងនោះគម្រោងវិនិយោគថ្មីចំនួន២៤៧ ទើបអនុម័តនៅឆ្នាំ២០២៣។ ភាគច្រើនគម្រោងវិនិយោគនេះ គឺចិនបានឈរនៅលំដាប់លេខរៀងទី១ មានប្រមាណ៦៦ភាគរយ ចំណែកក្នុងស្រុកមានប្រមាណ២៤ភាគរយ ក្រៅពីនេះគឺបន្ទាប់បន្សំ។ ទាំងនេះបើតាមរបាយការណ៍របស់ CDC។

នៅចំពោះមុខទំនាក់ទំនងល្អទាំងនយោបាយ និងសេដ្ឋកិច្ចរវាងកម្ពុជា-ចិន លោកបណ្ឌិត​ គិន ភា ប្រធានវិទ្យាស្ថាន​ទំនាក់ទំនង​អន្តរជាតិនៃ​រាជបណ្ឌិតសភា​កម្ពុជាប្រាប់ SBM News ឱ្យដឹងថា លោកជឿថា ការ​វិនិយោគរបស់ក្រុមហ៊ុន​សហគ្រាសចិនធំៗ​ នឹងមកបណ្តាក់ទុននៅ​កម្ពុជា​។ លោកចង់ឃើញ​ការវិនិយោគ​របស់ចិន ជាការ​វិនិយោគបែបផ្ទេរ​បច្ចេកវិទ្យា ​មានភាព​យូរអង្វែង ដោយ​ប្រើប្រាស់កម្លាំង​ពលកម្ម និង​វត្ថុធាតុដើម​ក្នុងស្រុកខ្មែរ​ឱ្យបានច្រើនផងដែរ។

សូមរំឭកថា សម្តេចមហាបវរធិបតី ហ៊ុន ម៉ាណែត​ នាយក​រដ្ឋមន្ត្រី​នៃ​កម្ពុជា ​កាលពីចុងខែតុលាឆ្នាំ២០២៣ បានជួប​ពិភាក្សា​ជាមួយ​ក្រុមហ៊ុន​ចិន​ធំ​ៗ​ជិត​១០​ក្រុមហ៊ុនសុទ្ធសឹងជាជំនួបមាន​សារសំខាន់​។ ជំនួប​រវាងនាយករដ្ឋមន្ត្រីវ័យក្មេងកម្ពុជា ​ជាមួយ​ក្រុមហ៊ុន​ចិនធំ​ៗទាំងនោះ ​ធ្វើឡើង​អំឡុងពេល​ដែលលោក​ទៅចូលរួមវេទិកា​ផ្លូវ និង​ខ្សែក្រវាត់​លើកទី​៣​ នៅរដ្ឋធានី​ប៉េកាំង​ប្រទេសចិន​។ ដោយឡែក កាលពីកាលពីពាក់កណ្តាល​ខែកញ្ញា​ ឆ្នាំ២០២៣កន្លងទៅ បន្ទាប់ពីឡើងកាន់តំណែង​ជានាយករដ្ឋមន្ត្រី សម្តេចក៏បានធ្វើ​ទស្សនកិច្ចនៅ​ប្រទេសចិនម្ដងដែរ​ ដែលពេលនោះ​សម្តេចក៏មាន​ជំនួបជាមួយ​ក្រុមហ៊ុនចិន​មួយចំនួន​ដូចគ្នា៕