ចក្ខុវិស័យរបស់រដ្ឋាភិបាលនៃប្រទេសជាមិត្តទាំង២ កម្ពុជា-ចិន តាមរយៈ ក្របខ័ណ្ឌគោលនយោបាយវិថីសូត្រខ្សែក្រវាត់សេដ្ឋកិច្ចនិងផ្លូវសូត្រសមុទ្រសតវត្ស៍ទី២១ បានបង្ហាញការប្តេជ្ញាខិតខំរួមគ្នា ជំរុញការកសាងសហគមន៍ជោគវាសនាតែមួយ កម្ពុជា-ចិន និងប្តេជ្ញាជំរុញទំហំពាណិជ្ជកម្មទ្វេភាគីឱ្យកើនឡើងលើស១២ពាន់លានដុល្លារអាម៉េរិកក្នុងឆ្នាំ២០២៣នេះ។ នេះបើតាមការលើកឡើងពីមន្ត្រីជាន់ខ្ពស់ក្រសួងពាណិជ្ជកម្មកម្ពុជា។
ថ្លែងក្នុងពិធីបើកសន្និសីទផ្សព្វផ្សាយស្តីពីព្រឹត្តិការណ៍ពិព័រណ៍ផលិតផលនាំចេញ-នាំចូលចិនលើកទី១៣៣ នៅខេត្តក្វាងទុង ប្រទេសចិន លោក អ៊ុក ទី អនុរដ្ឋលេខាធិការក្រសួងពាណិជ្ជកម្មកម្ពុជាលើកឡើងថា ទំនាក់ទំនងនិងកិច្ចសហប្រតិបត្តិការកម្ពុជា-ចិន បានឈានដល់ដំណាក់កាលថ្មីមួយទៀតលើសពីមិត្តភាពដែកថែប គឺទៅជាមិត្តភាពក្នុងកម្រិតត្បូងពេជ្រ និងបានប្តេជ្ញារួមគ្នាកសាងវឌ្ឍនភាព វិបុលភាព និងការយល់ចិត្តថ្លើមគ្នា។
ប្រទេសទាំងពីរ បានក្លាយជាដៃគូយុទ្ធសាស្ត្រ និងកិច្ចសហប្រតិបត្តិការគ្រប់ជ្រុងជ្រោយចាប់ពីឆ្នាំ២០១០កន្លងមក។ បើតាមមន្ត្រីជាន់ខ្ពស់ក្រសួងពាណិជ្ជកម្មរូបនេះ ចក្ខុវិស័យរបស់រដ្ឋាភិបាលនៃប្រទេសទាំង២ ក្នុងក្របខ័ណ្ឌគោលនយោបាយវិថីសូត្រខ្សែក្រវាត់សេដ្ឋកិច្ចនិងផ្លូវសូត្រសមុទ្រសតវត្ស៍ទី២១គឺប្តេជ្ញាជំរុញទំហំពាណិជ្ជកម្មទ្វេភាគីឱ្យកើនឡើងលើស១២ពាន់លានដុល្លារអាម៉េរិក ក្នុងឆ្នាំ២០២៣នេះ។
សូមរំឭកថា នៅប៉ុន្មានឆ្នាំចុងក្រោយ ប្រទេសចិនបន្តឈរកំពូលតារាងជាប្រទេស មានទំហំពាណិជ្ជកម្មទ្វេភាគីជាមួយកម្ពុជាច្រើនជាងគេ។ ជាក់ស្តែងកាលពីឆ្នាំ ២០២២ ពាណិជ្ជកម្មរវាងប្រទេសទាំងពីរសម្រេចបានជាង ១១,៦៨ពាន់លានដុល្លារកើនជាង៤ភាគរយបើធៀបឆ្នាំ២០២១។ នេះបើយោងតាមទិន្នន័យពីអគ្គនាយកដ្ឋានគយនិងរដ្ឋាករកម្ពុជា៕
