រាជធានីភ្នំពេញ៖ នាពេលថ្មីៗនេះ បណ្ណ ប.ស.ស បានក្លាយទៅជាប្រធានបទដ៏ពេញនិយម សម្រាប់អ្នកប្រើប្រាស់បណ្ដាញសង្គម។ ទន្ទឹមនឹងនេះដែរ ម្ចាស់អាជីវកម្មមួយចំនួនបានឆ្លៀតឱកាសយកបណ្ណ ប.ស.ស មកធ្វើជាទីផ្សារ ពោលគឺមានហាងខ្លះធ្វើប្រូម៉ូសិនបញ្ចុះតម្លៃចំពោះសមាជិក ឬអ្នកប្រើប្រាស់បណ្ណ ប.ស.ស ថែមទៀតផង...។ 

កន្លងមក បេឡាជាតិសន្តិសុខសង្គម ហៅកាត់ថា ប.ស.ស. បានផ្តល់ការធានាឱ្យមានសមធម៌ និងសាមគ្គីធម៌សង្គម និងលើកកម្ពស់សុខុមាលភាព និងជីវភាពរបស់ប្រជាពលរដ្ឋ ដែលជាហេតុនាំឱ្យពលរដ្ឋតែងនឹកឃើញជារឿយៗថា បណ្ណ ប.ស.ស ជួយសម្រាលបន្ទុកជីវភាពបានមួយផ្នែកដែរ។ បន្ថែមពីនេះ ក៏មានការជជែកលេងតាមបណ្ដាញសង្គមពាក់ព័ន្ធនឹងការប្រើបណ្ណនេះ លើវិស័យផ្សេងៗទៀត ដូច្នេះ ទើបឈានដល់ការយកបណ្ណ ប.ស.ស មកធ្វើជាទីផ្សារអាជីវកម្មជាបន្តបន្ទាប់។ ថ្លែងប្រាប់ SBM News តាមតេឡេក្រាម លោក ហេង សុផាន់ណារិទ្ធ អគ្គនាយករង ប.ស.ស. នៃក្រសួងការងារ និងបណ្ដុះបណ្ដាល បានបំភ្លឺយ៉ាងច្បាស់ៗថា៖«ពាក់ព័ន្ធនឹងការងារនេះ ប្រហែលជាអ្នកលក់ចង់បាន view, like & share ជា Marketing(ទីផ្សារ) សម្រាប់ក្រុមហ៊ុនគាត់ បានជាគាត់យកបណ្ណ ប.ស.ស ធ្វើជា Marketing។ សម្រាប់ក្រសួងការងារ គឺមិនបានទៅពាក់ព័ន្ធជាមួយការងារនេះទេ»។

យ៉ាងណាមិញ តើការយកបណ្ណ ប.ស.ស មកធ្វើជាទីផ្សារអាជីវកម្ម ទាំងមិនមែនជាដៃគូសហការរបស់ក្រសួងការងារ និងបណ្ដុះបណ្ដាល ខុសដែរឬទេ? ចំពោះករណីនេះ លោក ហេង សុផាន់ណារិទ្ធ បានលើកឡើងថា៖«សម្រាប់ខ្ញុំ[..]ខ្ញុំគិតថា មិនមែនជារឿងខុសទាស់អីទេ ព្រោះដោយសារប្រសិនបើក្នុងករណីដូចពួកគាត់ធ្វើបែបនេះ មានន័យថាគាត់ជួយផ្សព្វផ្សាយឱ្យប.ស.សវិញទេ។ តែរឿងជាក់ស្ដែង​ គឺខាងក្រសួងមិនបានទៅបង្គាប់បញ្ជាឱ្យពួកគាត់ជាអ្នកធ្វើទេ គឺគាត់ធ្វើខ្លួនឯង ដើម្បីប្រូម៉ូសិនផលិតផលរបស់ពួកគាត់ ចឹងប្រសិនបើករណីគេចង់បានប្រូម៉ូសិនរបស់ពួកគាត់ គេនាំគ្នាមកធ្វើបណ្ណ ប.ស.ស ច្រើន ហ្នឹងជារឿងមួយល្អសម្រាប់ ប.ស.ស ដែរ ដោយសារមានសមាជិកមកចុះបញ្ជីច្រើន»។ យោងតាមរបាយការណ៍ចុងក្រោយ ដែលផ្តល់ដោយក្រសួង គិតត្រឹមថ្ងៃទី១៩មេសា ឆ្នាំ២០២៤ បច្ចប្បន្នភាពនៃការងារចុះបញ្ជីសហគ្រាស គ្រឹះស្ថាន វិស័យឯកជន នៃកម្មករក្នុងប្រព័ន្ធ មានសមាជិកចំនួន៖ ផ្នែកហានិភ័យការងារ១ ៥៥៤ ០១៨នាក់ ផ្នែកថែទាំសុខភាព១ ៥៥៣ ៥៥៥នាក់ និងផ្នែកប្រាក់សោធន១ ៥៥៤ ០១៨នាក់៕