រាជធានីភ្នំពេញ៖ ប្រជាពលរដ្ឋ​មួយ​ចំនួន​នៅ​រាជធានី​ភ្នំពេញ​ បាននាំគ្នាត្អូញត្អែរ និងបង្ហាញ​ក្ដី​បារម្ភ​អំពីការ​បម្រែបម្រួលអាកាសធាតុដែលកំពុងកើនឡើងខ្លាំង អាចនឹង​ប៉ះ​ពាល់​ដល់​សុខភាពរបស់​ពួកគេ ខណៈពលរដ្ឋមួយចំនួនលើកឡើងថា កម្តៅបានរំខាន​ដល់​ការ​ប្រកប​មុខរបរ និងទទូចឱ្យមន្ត្រីរាជរដ្ឋាភិបាលគិតគូរលើការដាំដើមឈើនៅក្នុងរាជធានី ដើម្បីជាម្លប់ និងបង្កើនសោភ័ណភាពផងដែរ...។

កំពុងឈរក្បែរស៊ីក្លូ ស្ថិតនៅក្រោមកម្តៅថ្ងៃដ៏ក្ដៅហួតហែងលោក ប៉ែន ឡត អាយុ៦៦ឆ្នាំ មានមុខរបរជាអ្នកធាក់ស៊ីក្លូ នៅម្តុំផ្សារចាស់ ស្ថិតនៅខណ្ឌដូនពេញ រាជធានីភ្នំពេញ បានថ្លែងប្រាប់ SBM News នៅថ្ងៃទី៩មេសា ថា នៅពេលអាកាសធាតុក្ដៅបែបនេះ សម្រាប់រូបលោកដែលជាអ្នកបម្រើសេវាកម្មដឹក និងអង្គុយរង់ចាំភ្ញៀវតាមដងផ្លូវ មិនងាយស្រួលប៉ុន្មានទេ ពិសេស គឺត្រូវទ្រាំជាមួយនឹងកម្តៅថ្ងៃដែលកំពុងក្ដៅខ្លាំងជារៀងរាល់ថ្ងៃបែបនេះ។ លោកបន្ថែមថា ព្រោះតែជាមេគ្រួសារ មានតួនាទីទំនុកបម្រុងអាហារបីពេលដល់សមាជិកគ្រួសារដទៃទៀត ទើបជំរុញឱ្យលោកតស៊ូ និងទ្រាំលំបាកក្រោមកម្តៅថ្ងៃដែលស្ទើរតែអស់ខ្យល់ម្ដងៗទៅហើយនោះ។ លោក ប៉ែន ឡត និយាយថា៖«ពិបាកតែចេះតែខំប្រឹងទៅ យើងចេះតែខំរកទៅ បើជីវភាពខ្វះខាត។ មេឃវាក្ដៅ តែយើងចេះតែខំរកទៅ ក្ដៅម៉េចក៏ត្រូវតស៊ូដែរ!»។ លោក ប៉ែន ឡត បន្ថែមថា កាលពីមុននៅតាមដងផ្លូវសម្បូរទៅដោយដើមឈើអមសងខាង ខណៈបច្ចុប្បន្ន ដើមឈើភាគច្រើនត្រូវបានកាត់មែកចោល ព្រោះអាជ្ញាធរថាដើម្បីរក្សាសុវត្ថិភាពដល់អ្នកធ្វើដំណើរ។ លោកថា បើនៅក្នុងរាជធានីមានការដាំដើមឈើច្រើនឡើងវិញ ប្រាកដជាផ្តល់ម្លប់ត្រជាក់ និងមិនក្ដៅខ្លាំងដូចពេលបច្ចុប្បន្នឡើយ។

ទោះជាយ៉ាងណា លោក ប៉ែន ឡត បានស្នើឱ្យមន្ត្រីរាជរដ្ឋាភិបាលគិតគូរលើការដាំដើមនៅក្នុងរាជធានីឱ្យបានច្រើន គ្រាន់បានជាម្លប់សម្រាប់ពលរដ្ឋជ្រកកោនពេលមេឃក្ដៅខ្លាំងដែរ។ ពលរដ្ឋរូបនេះ និយាយថា៖«ចង់ឱ្យរាជរដ្ឋាភិបាល(មន្ត្រី)ដាំដើមឈើបានជ្រកម្លប់ត្រជាក់។ បើរាជរដ្ឋាភិបាលដាំដើមឈើបានច្រើនទៅ វាត្រជាក់ដល់យើងដែរ»។ ចំណែកអ្នកស្រី លៀង សារឿន អាយុ៦០ឆ្នាំ ជាអ្នកដើរលក់បង្អែមលតនៅរាជធានីភ្នំពេញអស់រយៈពេលជិត៧ឆ្នាំមកហើយនោះ បានថ្លែងថា ការកើនឡើងនៃកម្តៅថ្ងៃបូកផ្សំជាមួយនឹងរាងកាយកំពុងចាស់ទ្រុឌទ្រោមផងនោះ រឹងរិតតែធ្វើឱ្យអ្នកស្រីប្រឈមជាមួយបញ្ហាផ្សេងៗ ដូចវិលមុខម្ដងម្កាលជាដើម។ អ្នកស្រីថា ដោយសារតែជីវភាពខ្វះខាត និងត្រូវចិញ្ចឹមចៅ២នាក់ផង ទើបអ្នកស្រីមិនហ៊ានសម្រាក។ អ្នកស្រីនិយាយថា៖«ក្ដៅណាស់! ក្ដៅចឹងចេះតែចេវ(ខំ)រកទៅ បើមិនរកមានអ្វីចិញ្ចឹមចៅ ចិញ្ចឹមអី? ចេះតែរកទៅបានលុយបានកាក់ទៅឱ្យចៅរៀនតែប៉ុណ្ណឹង»។ អ្នកស្រី សារឿន ក៏យល់ឃើញថា បើនៅក្នុងរាជធានីមានដើមឈើច្រើន ពិតជាមិនសូវក្ដៅខ្លាំងប៉ុន្មានទេ។​ អ្នកស្រីនិយាយថា៖«អាជ្ញាធរគួរដាំដើមឈើឱ្យបានច្រើនកុំឱ្យក្ដៅចឹងពេក!»។

រីឯពលរដ្ឋម្នាក់ទៀតប្រកបមុខរបរលក់ ឪឡឹក នៅក្បែររបងវត្តឧណ្ណាលោម ក្នុងរាជធានីភ្នំពេញ លោក ស៊ី ណាន់ បានលើកឡើងប្រហាក់ប្រហែលគ្នាថា ទាំងនៅក្នុងរាជធានី និងព្រៃដើមឈើនៅតាមបណ្តាខេត្តទូទាំងប្រទេសត្រូវបាន ក្រុមឈ្មួញទុច្ចរិតកាប់បំផ្លាញជាបន្តបន្ទាប់ ជាហេតុធ្វើឱ្យអាកាសធាតុប្រែប្រួលមកជាក្ដៅខ្លាំងបែបនេះ។ លោកថា បើរាជរដ្ឋាភិបាល ផ្តោតលើការដាំដើមឈើ និងព្យាយាមការពារព្រៃឈើដែលនៅសេសសល់តិចតួចនេះឡើងវិញ ប្រហែលជាអាចកាត់បន្ថយកម្តៅបានខ្លះ។ លោក ស៊ី ណាន់ និយាយថា៖«បើបានខាងរាជរដ្ឋាភិបាល គាត់រៀបចំការដាំដុះដើមឈើច្រើន គឺយើងមានម្លប់ជ្រកដែរ។ វាល្អដែរ!»។ ដោយឡែក បើយោងតាមសេចក្ដីជូនដំណឹងរបស់ក្រសួង​ធនធាន​ទឹក និង​ឧតុនិយម ចេញ​ផ្សាយកាល​ពី​ថ្ងៃ​ទី២មីនា​ ថា ប្រទេស​កម្ពុជា​នឹង​ប្រឈម​នូវ​អាកាសធាតុ​ក្ដៅស្ងួត​ចាប់ពី​ខែមីនា ដល់​ខែឧសភា ឆ្នាំ​២០២៤ ដោយសារតែ​ប្រទេស​កម្ពុជា​ទទួលរង​នូវ​បាតុភូត​អែល​នីណូ (El Niño)។ ក្រសួង​បន្ថែម​ថា សីតុណ្ហភាព​នៅ​ទូទាំង​ប្រទេស​នឹង​ឡើង​កម្តៅ​នៅ​ឆ្នាំ​នេះ បរិមាណ​ទឹក​ភ្លៀង​ធ្លាក់​ទាប ហើយ​ភ្លៀង​កក់​ខែ​ក៏​តិច​​ជាង​ឆ្នាំ​២០២៣។ ទន្ទឹមនឹងនោះ ក្រសួងធនធានទឹក និងឧតុនិយម បានអំពាវនាវដល់ប្រជាពលរដ្ឋ ត្រូវប្រុងប្រយ័ត្នចំពោះអាកាសធាតុក្ដៅខ្លាំង និងជួយចូលរួមការប្រើប្រាស់ទឹកភ្លើងដោយការសន្សំសំចៃខ្ពស់៕