រាជធានីភ្នំពេញ៖ លោក ទ្រី ភាព ដែលមាន​ងារ​ជា​អ្នកឧកញ៉ា និងត្រូវបានគេស្គាល់ថា ជាឈ្មួញរកស៊ីជំនាញគ្រាក់ៗមួយរូបនៅកម្ពុជា ត្រូវបានតែងតាំងជាទីប្រឹក្សារបស់ប្រធានព្រឹទ្ធសភានៅថ្ងៃទី០៦ ខែមេសា ​ឆ្នាំ២០២៤នេះ។ ការតែងតាំងធ្វើឡើងដោយ សម្តេចតេជោ ហ៊ុន សែន ប្រធានព្រឹទ្ធសភាផ្ទាល់តែម្ដង និងក្នុងនាមសម្តេចជាប្រមុខរដ្ឋស្តីទីអំឡុងពេលអវត្តមាននៅក្នុងប្រទេសរបស់ព្រះមហាក្សត្រ...។

ព្រះរាជក្រឹត្យ ដែលបានចុះហត្ថលេខាដោយប្រមុខរដ្ឋស្តីទីនៅថ្ងៃសៅរ៍នេះ បានត្រាស់បង្គាប់តែងតាំង និងផ្ដល់ឋានៈអ្នកឧកញ៉ា ទ្រី ភាព ជាទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភា នីតិកាលទី៥ មានឋានៈស្មើទេសរដ្ឋមន្ត្រី ដោយពុំទទួលបានប្រាក់បំណាច់មុខងារ។ ប្រធានព្រឹទ្ធសភា ត្រូវទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្ដលេខាតទៅ។​ គួររំឭកថា កាលពី​ថ្ងៃ​ទី​១៤ ខែ​សីហា ឆ្នាំ​២០០៤ ប្រមុខ​រដ្ឋ​ស្ដីទី គឺកាលនោះជាសម្តេច ជា ស៊ីម បាន​ចុះហត្ថលេខា​លើ​ព្រះរាជក្រឹត្យ​តែងតាំង​ លោក ទ្រី ភាព ដែល​ជា​ឈ្មួញ​ឈើ​ដ៏​ល្បី​ជា «ឧកញ៉ា»។ ក្រោយមកនៅ ​ថ្ងៃ​ទី​០៨ ខែ​ធ្នូ ឆ្នាំ​២០២១ ព្រះករុណា​ព្រះបាទ​សម្តេច ព្រះ​បរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ទ្រង់​ត្រាស់​បង្គាប់​ផ្តល់​គោរមងារ​ជា «អ្នក​ឧកញ៉ា» ដល់​ឧកញ៉ា ទ្រី ភាព ដែល​ជា​អគ្គនាយក​ក្រុមហ៊ុន MDS Group ក្រុមហ៊ុន Try Pheap Import Export រួម​ទាំង​ក្រុមហ៊ុន​ច្រើន​ទៀត ពិសេសក្រុមហ៊ុនរកស៊ីលើវិស័យរ៉ែ និង​បាន​ទទួល​ដី​សម្បទាន​សេដ្ឋកិច្ច និង​តំបន់​សេដ្ឋកិច្ច​ពិសេស ​ពីរាជ​រដ្ឋាភិបាល​ផងដែរ។

យ៉ាងណា សារព័ត៌មានក្រៅស្រុក និងអង្គការអន្តរជាតិមួយចំនួនចាត់ទុករូបលោកជាឈ្មួញកាប់​បំផ្លាញ​ព្រៃឈើ​នៅ​កម្ពុជា។ នៅ​ថ្ងៃទី១៩កក្កដា ​ឆ្នាំ២០១៥ អ្នកឧកញ៉ា ទ្រី ភាព បានផ្តល់បទសម្ភាសដ៏កម្រមួយដល់សារព័ត៌មានក្នុងស្រុកមួយចំនួន ដោយអះអាងថា លោក​បាន​ប្រក​បរបរ​ស្របច្បាប់ បាន​បង់ពន្ធ​ឱ្យ​រដ្ឋ ហើយក៏​កំពុងអភិវឌ្ឍដាំ​ដំណាំ​កៅស៊ូ និង​ម្រេច ដោយ​ផ្តល់​ការងារ​ឱ្យ​ពលរដ្ឋ​ខ្មែរ​ថែម​ទៀតផង។ សូមជម្រាបថា អ្នកឧកញ៉ា ទ្រី ភាព មិនមានឋានៈក្នុងជួររាជរដ្ឋាភិបាលទេ តែលោកត្រូវបានតែងតាំងជាទីប្រឹក្សារបស់ថ្នាក់ដឹកនាំរដ្ឋ ជាហូរហែ រាប់ចាប់តាំងពីទីប្រឹក្សារបស់សម្តេចសង្ឃផងដែរ។ ក្រៅពីនោះ លោកក៏ជាអ្នកដើរតួនាទីសំខាន់ក្នុងជួរបក្សកាន់អំណាច ជាក់ស្តែងលោកជាទីប្រឹក្សាផ្ទាល់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ហើយទើបនឹងត្រូវបានគណៈអចិន្ត្រៃយ៍នៃគណៈកម្មាធិការកណ្ដាលគណបក្សប្រជាជន​កម្ពុជា សម្រេចចាត់តាំងជាអនុប្រធានក្រុមការងារគណបក្សចុះមូលដ្ឋានខេត្តកំពង់ធំ បន្ថែមពីលើខេត្តកណ្តាល កាលពីដើមឆ្នាំ២០២៤នេះ៕