រាជធានីភ្នំពេញ៖ កងរាជអាវុធហត្ថនិងអាជ្ញាធរចម្រុះ បានបង្រ្កាបបទលើ្មសគ្រឿងញៀនពីរករណីធំៗ​នៅ​ពាក់កណ្តាលខែមីនា ក្នុងចន្លោះថ្ងៃទី១៩ ដល់ថ្ងៃទី២២ មីនា ដោយបានរឹប​អូសគ្រឿងញៀនបានប្រមាណជិត១តោន នៅក្នុងភូមិសាស្ត្ររាជធានីភ្នំពេញ។

សមត្ថកិច្ចជំនាញនៃមន្ទីរប្រឆាំងគ្រឿងញៀនបានបង្ហាញថា ជនសង្ស័យជាជនជាតិវៀតណាម និងជនជាតិខ្មែរ ចំនួន៥នាក់ ត្រូវបានឃាត់ខ្លួន ពាក់ព័ន្ធករណីជួញដូរ និងរក្សាទុកនូវសារធាតុញៀនខុសច្បាប់ ដោយអាជ្ញាធរបានរឹបអូសគ្រឿងញៀនបាន ៨៨៥គីឡូក្រាមនៅ៤ទីតាំងផ្សេងគ្នាក្នុងរាជធានីភ្នំពេញ។ តាមរយៈរបាយការណ៍ចំនួនពីរ របស់មន្ទីរប្រឆាំងបទល្មើសគ្រឿង​ញៀនកាលពីសប្តាហ៍មុន បានឱ្យដឹងថានៅថ្ងៃទី២២មីនា ជនសង្ស័យជាជនជាតិខ្មែរប្រុស ស្រីចំនួន៣នាក់ ត្រូវបានឃាត់ខ្លួន ព្រមទាំងរឹបអូសគ្រឿងញៀនជិត២០០គីឡូក្រាម។ របាយការណ៍ ឱ្យដឹងបន្តថា ជនសង្ស័យទាំង ៣នាក់ ដែលបានឃាត់ខ្លួនរួមមាន ទី១ឈ្មោះ សេង សុខទី ភេទប្រុស ទី២ឈ្មោះ ខៀវ ចិន្តា ភេទស្រី និងទី៣ឈ្មោះ ហេង គឹមលាង ភេទស្រី ខណៈការបង្រ្កាបបទល្មើសនេះធ្វើឡើង នៅខណ្ឌឫស្សីកែវ ក្នុងរាជធានីភ្នំពេញ។ ដោយឡែកនៅថ្ងៃទី១៩ ខែមីនា អាជ្ញាធរបានចុះបង្រ្កាបករណីដឹកជញ្ជូនគ្រឿងញៀនឆ្លងដែនខុសច្បាប់ ព្រមទាំងឃាត់ខ្លួនជនជាតិវៀតណាមបានចំនួន២នាក់ និងរឹបអូសគ្រឿងញៀនប្រមាណជិត ៧០០គីឡូ​ក្រាម ហើយប្រតិបត្តិការនោះធ្វើឡើងនៅខណ្ឌដូនពេញ និងខណ្ឌបឹងកេងកងក្នុងរាជធានីភ្នំពេញផងដែរ។ របាយការណ៍បានឱ្យដឹងបន្ថែមថា បុរសជនជាតិវៀតណាមទាំងពីរនាក់មានឈ្មោះ NGUYEN HOAN DINH និងឈ្មោះ DUONG TIEN។

តាមការបញ្ជាក់ពី មន្ទីរប្រឆាំងបទល្មើសគ្រឿង​ញៀន បានឱ្យដឹងថាបន្ថែមថា ប្រភេទគ្រឿងញៀនដែលរឹបអូសបានជិត១តោននោះភាគច្រើនមាន៖ ប្រភេទ មេតំហ្វេតាមីន(ICE) និងប្រភេទ កេតាមីន (KETAMINE)។ បច្ចុប្បន្នក្រុមឈ្មួញជួញដូរនិងដឹកជញ្ជូនគ្រឿងញៀនទាំងនោះ ត្រូវបានអាជ្ញាធរបញ្ជូនទៅសាលាដំបូងរាជធានីភ្នំពេញ ដើម្បីទទួលទោសតាមផ្លូវច្បាប់។ គួរឱ្យដឹងបន្ថែមថា បទល្មើស​គ្រឿងញៀនបានកើន​ឡើងពីមួយឆ្នាំទៅមួយឆ្នាំ ហើយនៅ​ដើម​ឆ្នាំ២០២៤ អាជ្ញាធរ​ជាតិ​ប្រយុទ្ធ​ប្រឆាំង​គ្រឿងញៀន​ឱ្យ​ដឹង​ថា សមត្ថកិច្ច​បង្ក្រាប​បាន​ការ​ជួញដូរ​គ្រឿងញៀន​ជិត៧០០ករណី ព្រម​ទាំង​ឃាត់​ខ្លួន​មនុស្ស​ជិត ៤ពាន់នាក់។ ការណ៍នេះបង្ហាញថា ក្នុងដើម​ឆ្នាំ២០២៤ ករណី​បង្ក្រាប​ការ​ជួញដូរ​គ្រឿងញៀន​ខុស​ច្បាប់​មាន​ការ​កើន​ឡើង បើ​ប្រៀបធៀប​ទៅ​និង​រយៈ​ពេល​ដូច​គ្នា កាល​ពី​ឆ្នាំ២០២៣ កន្លង​ទៅ៕