រាជធានីភ្នំពេញ៖ ភាពអសន្តិសុខសង្គម ដែលភាគច្រើនបង្កឡើងដោយ​ក្មេង​ទំនើងបានបង្កើតជាក្ដីព្រួយបារម្ភយ៉ាងខ្លាំងដល់ប្រជាពលរដ្ឋ​​រស់​នៅតាមមូលដ្ឋាន ដោយគេតែងសង្កេតឃើញករណី​កាប់ចាក់​គ្នា​យ៉ាង​អនាធិបតេយ្យ​រហូត​បណ្តាលឱ្យមាន​អ្នករងគ្រោះ និង​រហូតដល់​ស្លាប់​ជា​បន្តបន្ទាប់ និងស្ទើរតែជាងរៀងរាល់ថ្ងៃ​។ ​មិនត្រឹមតែប៉ុណ្ណោះ ករណីឃាតកម្ម អំពើលួចឆក់ប្លន់ ការចរាចរគ្រឿងញៀន ក៏បានរួមចំណែក​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គមមួយផ្នែកផងដែរ។

ទោះជាយ៉ាងណា ការយកចិត្តទុកដាក់របស់អាជ្ញាធរមានសមត្ថកិច្ច ដោយអនុវត្តតាមបទដ្ឋានគោលនយោបាយភូមិ-ឃុំ-សង្កាត់មានសុវត្ថិភាព ការបង្រ្កាបបទល្មើសទាំងនោះ គឺជាកាតព្វកិច្ចចម្បងមួយ​ដើម្បី​ទប់ស្កាត់ភាព​ចលាចលក្នុងសង្គម ម្យ៉ាង​ដើម្បី​​ទប់ស្កាត់​កុំ​ឱ្យមាន​ភាពអសន្តិសុខ​ក្នុងសង្គម​។​ តាមរយៈអ្នកនាំពាក្យរងក្រសួងមហាផ្ទៃ លោក ទូច សុខៈ បានឱ្យដឹងនៅព្រឹកថ្ងៃទី២៥ មីនា​ +ថា ត្រឹមតែមួយថ្ងៃ​ អាជ្ញាធរបានចេញធ្វើប្រតិបត្តិការបង្ក្រាបបទល្មើសទូទៅប្រទេសបានប្រមាណ៣៦ករណី និងឃាត់ខ្លួនអ្នកពាក់ព័ន្ធចំនួន៨៥នាក់ឯណោះ។ អ្នកនាំពាក្យរងរូបនេះបន្តថា ក្នុងករណីព្រហ្មទណ្ឌ ដូចជា អំពើហិង្សា អំពើលួចប្លន់ អំពើឃាតកម្ម និង បង្ខាំងមនុស្សជំរិតទារប្រាក់ អាជ្ញាធរបានបង្ក្រាបបានចំនួន៩ករណី និងឃាត់ខ្លួនបានចំនួន ១៦នាក់។

ចំពោះបទល្មើសគ្រឿងញៀន លោក ទូច សុខៈ ថ្លែងថា អាជ្ញាធរបង្ក្រាបបាន២០ករណី ដោយឃាត់ខ្លួនបាន៥០នាក់។ រីឯករណីក្មេងស្ទាវបង្កហិង្សា និងការបង្រ្កាបល្បែងស៊ីសងខុសច្បាប់ លោកថា អាជ្ញាធរបង្រ្កាបបានចំនួន ៧ករណី ព្រមទាំងឃាត់ខ្លួនមនុស្សប្រមាណ១៩នាក់។ ចំពោះវិធានការទប់ស្កាត់បទល្មើសខាងលើ គឺជាទិសដៅអាទិភាពក្នុងចំណោមទិសដៅអាទិភាពទាំង៦ ដែលឯកឧត្ដម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាក់ចេញកាលពីដើមអាណត្តិទី៧នេះ តាមគោលការណ៍ «សម្អាតផ្ទះយើង» របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា៕