ខេត្តកំពង់ស្ពឺ៖ ព្រោះតែភាពគ្មានការទទួលខុសត្រូវលើសត្វចិញ្ចឹមរបស់ពលរដ្ឋមួយចំនួនក្នុងខេត្តកំពង់ស្ពឺ បណ្តាលឱ្យកើតមានករណីគ្រោះថ្នាក់ចរាចរណ៍ ស្លាប់អ្នកជិះម៉ូតូពីរនាក់យ៉ាងអាណោចអាធម្ម។ ករណីនេះកើតឡើងនៅវេលាម៉ោង០០:៤០នាទី រំលងអាធ្រាត្រឈានចូលថ្ងៃទី១៧ ខែមីនា ឆ្នាំ២០២៤ លើផ្លូវជាតិលេខ៤ ចន្លោះគីឡូម៉ែត្រលេខ(៤៦-៤៧) ស្ថិតនៅភូមិសំណង់ សង្កាត់រការធំ ក្រុងច្បារមន ខេត្តកំពង់ស្ពឺ។
ប្រភពពីសមត្ថកិច្ចខេត្តកំពង់ស្ពឺបានឱ្យដឹងថា ដំបូងឡើយគេបានឃើញម៉ូតូ១គ្រឿងម៉ាក យ៉ាន់ម៉ាហាអ៊ិច-អរ (XR) ព័ណខ្មៅពាក់ស្លាកលេខភ្នំពេញ១XQ-៥៣៥៤ បើកបរពីកើត-ទៅលិច អ្នកបើកបរឈ្មោះ សឿង វើន ភេទប្រុស អាយុ២៧ឆ្នាំ អ្នករួមដំណើរឈ្មោះ ឡាំ បូរាណ ភេទប្រុស អាយុ២៥ឆ្នាំ រស់នៅភូមិព្រៃក្បុង ឃុំព្រៃក្មេង ស្រុកភ្នំស្រួច ខេត្តកំពង់ស្ពឺ។ លុះដល់ចំណុចកើតហតុ បានបុកសត្វគោញីមួយក្បាលដើរឆ្លងផ្លូវ បណ្តាលឱ្យស្លាប់នៅហ្នឹងកន្លែងទាំងពីរនាក់តែម្តង រីឯសត្វគោក៏ងាប់នៅកន្លែងកើតហេតុដូចគ្នា ។
យ៉ាងណាជុំវិញករណីនេះ មន្រ្ដីនគរបាលមូលដ្ឋាន ក៏បានបញ្ជាក់បន្ថែមថា បច្ចុប្បន្នក្នុងតំបន់នោះពលរដ្ឋជាម្ចាស់សត្វចិញ្ចឹមនៅតែបន្ដលែងសត្វមិនទទួលខុសត្រូវ និងតែងតែបង្កបញ្ហាគ្រោះថ្នាក់ផ្សេងៗជាញឹកញាប់។ ទោះបីជាអាជ្ញាធរមូលដ្ឋានបានផ្សព្វផ្សាយអំពីបញ្ហានេះក៏ដោយ ក៏បញ្ហាទាំងនេះនៅតែបន្ដកើតមាន។ ជាក់ស្តែង ដូចជាករណីនេះជាដើមបណ្តាលឱ្យបាត់បង់អាយុជីវិតមនុស្ស២នាក់។ ចំពោះមុខបញ្ហានេះ កម្លាំងជំនាញកំពុងបន្តស្រាវជ្រាវកំណត់មុខសញ្ញាម្ចាស់សត្វចិញ្ចឹមនោះ ដើម្បីទទួលខុសត្រូវចំពោះផ្លូវច្បាប់។ ទន្ទឹមគ្នានេះ អាជ្ញាធរក៏បានអំពាវនាវដល់ពលរដ្ឋដែលជាម្ចាស់សត្វចិញ្ចឹមនានា មេត្ដាយកចិត្ដទុកដាក់ និងអនុវត្តតាមការណែនាំរបស់អាជ្ញាធរផង មិនដូច្នេះនឹងត្រូវប្រឈមមុខចំពោះផ្លូវច្បាប់៕
