ខេត្តកណ្តាល៖ សម្តេចមហាបវរធិបតី ហ៊ុន ម៉ាណែត នៅថ្ងៃទី១៣មីនា មានប្រសានស៍ថា ការសម្រេចបាននូវមន្ទីរពេទ្យ តេជោសែន កោះធំ នឹងអនុញ្ញាតឱ្យពលរដ្ឋទទួលបាននូវបទពិសោធថ្មី តាមរយៈមកទទួលយកសេវាថែទាំសុខភាពនៅមន្ទីរពេទ្យរដ្ឋ ដែលបំពាក់ដោយឧបករណ៍វេជ្ជសាស្ត្រទំនើប និងមានធនធានមនុស្ស ប្រកបដោយវិជ្ជាជីវៈ ក៏ដូចជាប្រព័ន្ធបច្ចេកវិទ្យាព័ត៌មាន ស្របតាមកម្រិតស្ដង់ដារ ដែលអាចបំពេញតម្រូវការថែទាំសុខភាពពលរដ្ឋបានច្រើនប្រភេទ ដូចជាសេវាពិគ្រោះជំងឺ សេវាអប់រំលើកកម្ពស់សុខភាព និងបង្ការជំងឺ សេវាធ្វើរោគវិនិច្ឆ័យ និងសេវាសម្រាកព្យាបាលនិងថែទាំ។ សម្តេចនាយកដ្ឋមន្រ្តី ថ្លែងបែបនេះអំឡុងពិធីសម្ពោធដាក់ឱ្យប្រើប្រាស់ជាផ្លូវការ «មន្ទីរពេទ្យតេជោសែន កោះធំ» ស្ថិតនៅខេត្តកណ្តាល។
សម្តេចនាយករដ្ឋមន្រ្តីថ្លែងបន្តថា មន្ទីរពេទ្យ តេជោសែន កោះធំ នឹងផ្ដល់សេវាសុខាភិបាលជូនប្រជាពលរដ្ឋប្រមាណ ៦០ ម៉ឺននាក់ ដែលកំពុងរស់នៅក្នុងស្រុកស្អាង ស្រុកកោះធំ ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវ។ ជាមួយគ្នានេះ លោកនាយករដ្ឋមន្ត្រី បានសាទរចំពោះសមិទ្ធផលថ្មីនេះ សម្រាប់ជូនដល់ប្រជាជនក្នុងខេត្កកណ្តាល នាទិសនិរតី នៃកម្ពុជា ក៏ដូចជាទូទាំងប្រទេស ក្រោមគោលដៅរបស់រាជរដ្ឋាភិបាល ក្នុងការបង្ខិតសេវាសុខាភិបាល រួមមាន ហេដ្ឋារចនាសម្ព័ន្ធ ក្រុមគ្រូពេទ្យជំនាញ និងសម្ភារបរិក្ខាប្រកបដោយគុណភាព ទៅដល់មូលដ្ឋានរបស់ប្រជាជន ដើម្បីលើកកម្ពស់សេវាពិនិត្យ ព្យាបាល និងការពារអាយុជីវិតប្រជាជនឱ្យកាន់តែល្អប្រសើរ។
គួរឱ្យដឹងថា មន្ទីរពេទ្យតេជោសែនកោះធំ មានតម្លៃ ១០លានដុល្លារអាម៉េរិក ដែលត្រូវបានបើកការដ្ឋានសាងសង់កាលពីថ្ងៃទី៧ ខែមករា ឆ្នាំ២០២២។ មន្ទីរពេទ្យនេះ បានសាងសងលើផ្ទៃដីប្រមាណ ១,៣ហិកតា ដែលមានអគារថ្មីចំនួន ៣ខ្នង ដែលអាចផ្ទុកគ្រែអ្នកជំងឺបានចំនួន ១៥០គ្រែ បំពាក់ដោយម៉ាស៊ីនត្រជាក់ សម្ភារបរិក្ខារពេទ្យ និងឧបករណ៍បច្ចេកទេសទំនើបៗ ដើម្បីបម្រើការព្យាបាលអ្នកជំងឺ៕
