ខេត្តត្បូងឃ្មុំ៖កម្លាំងជំនាញអធិការដ្ឋាននគរបាលក្រុងសួង សហការជាមួយប៉ុស្តិ៍នគរបាលរដ្ឋបាលវិហារលួងបានឃាត់ខ្លួន ក្មេងទំនើងចំនួន០២នាក់យកមកអប់រំ និងកោរសក់ ក្រោយពួកគេនាំគ្នាបង្ហោះម៉ូតូនៅចំណុចផ្លូវបេតុងភូមិ ជើងវត្ត សង្កាត់វិហារលួង ក្រុងសួង ខេត្តត្បូងឃ្មុំ។
ប្រភពពីសមត្ថកិច្ចបានឱ្យដឹងថា ក្មេងទំនើងទាំង០២នាក់នោះរួមមាន៖ ទី១.ឈ្មោះ ម៉ម សុីន អាយុ២១ ឆ្នាំ មានទីលំនៅភូមិ ពោធិ៍កិល សង្កាត់សួង ក្រុងសួង និងទី២ឈ្មោះ ឌឿន ផានុត អាយុ១៦ ឆ្នាំ មានទីលំនៅភូមិសួងកើត សង្កាត់សួង ក្រុងសួង បានធ្វើសកម្មភាពបង្ហោះម៉ូតូនៅចំណុចផ្លូវបេតុងភូមិ ជើងវត្ត សង្កាត់វិហារលួង ក្រុងសួង ភ្លាមនោះសមត្ថកិច្ចបានធ្វើការឃាត់ និងនាំក្មេងទំនើងទាំង០២នាក់យកមកអធិការដ្ឋាននគរបាលក្រុងសួងដើម្បីធ្វើការសាកសួរ។
សមត្ថកិច្ចបានឱ្យដឹងបន្តថា ក្រោយពីបានសួរនាំចប់សព្វគ្រប់ មន្រ្តីជំនាញបានអនុវត្តវិធានការទៅលើពួកគេដោយ កោរសក់ឈូសសក់ និងនាំក្មេងទំនើងទាំង០២នាក់ទៅពន្ធធនាគារខេត្តត្បូងឃ្មុំ ដើម្បីឱ្យពួកគាត់មើលពីការរស់នៅរបស់ជនសង្ស័យ ឬទណ្ឌិតដែលជាប់ឃុំឃាំង និងធ្វើការអប់រំកែប្រែ នៅចំពោះមុខឪពុកម្ដាយ អាណាព្យាបាល ធ្វើកិច្ចសន្យាឱ្យឈប់ប្រព្រឹត្តទង្វើបែបនេះទៅថ្ងៃក្រោយទៀត ខិតខំកែប្រែកសាងខ្លួនក្លាយជាមនុស្សល្អជាទីស្រឡាញ់របស់គ្រួសារក៏ដូចជាសង្គមជាតិ។ បន្ទាប់ពីបានធ្វើកិច្ចសន្យាអប់រំកែប្រែរួចសមត្ថកិច្ចបានប្រគល់ក្មេងទំនើងទាំង០២នាក់នោះ ជូនទៅឪពុកម្ដាយ អាណាព្យាបាល យកត្រឡប់ទៅផ្ទះរៀងៗខ្លួនវិញដើម្បីអប់រំបន្ត៕
រាយការណ៍ដោយ៖ភ្នាក់ងារ ខេត្ត ត្បូងឃ្មុំ
