រាជធានីភ្នំពេញ៖ កម្លាំងសមត្ថកិច្ចនៃមន្ទីរប្រឆាំងគ្រឿងញៀន បានចុះបង្ក្រាបករណីជួញដូរគ្រឿងញៀនដោយឃាត់ខ្លួនជនសង្ស័យជាជនជាតិចិនម្នាក់ និងរឹបអូសសារធាតុញៀនសរុបបាន២០៨១,៤១ក្រាម នៅខណ្ឌមានជ័យ និងខណ្ឌចំការមន រាជធានីភ្នំពេញ...។
មន្ទីរប្រឆាំងគ្រឿងញៀន បានគូសបញ្ជាក់ឱ្យដឹងនៅរសៀលថ្ងៃទី២៨ ខែកុម្ភៈ ឆ្នាំ២០២៤ ថា កាលវេលាម៉ោង១៣ៈ៤០នាទីថ្ងៃទី២៥កុម្ភៈកន្លងទៅ កម្លាំងជំនាញមន្ទីរប្រឆាំងគ្រឿងញៀន បានសហការជាមួយកម្លាំងនៃស្នងការដ្ឋាននគរបាលរាជធានីភ្នំពេញ ធ្វើការបង្រ្កាបករណីជួញដូររក្សាទុកដោយខុសច្បាប់នូវសារធាតុញៀន២គោលដៅផ្សេងគ្នារួមមាន៖ គោលដៅទី១.នៅមុខសណ្ឋាគារកាសា ផ្លូវបេតុង សង្កាត់ទន្លេបាសាក់ ខណ្ឌចំការមន និងគោលដៅទី២.នៅខុនដូរ R&F ជាន់ទី២៩ បន្ទប់លេខ២៩០៦ ផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ប្រភពដដែលបានឱ្យដឹងបន្តទៀតថា ជាលទ្ធផលនៃការបង្ក្រាបនេះ មន្រ្តីជំនាញឃាត់បានជនសង្ស័យម្នាក់ ជាជនជាតិចិន ឈ្មោះ តាក ជ័ង (DA ZHANG) ភេទប្រុស អាយុ៣៤ឆ្នាំ។ ចំពោះវត្ថុតាងដែលដកហូតបានរួមមាន៖ គ្រឿងញៀនប្រភេទអ៊ិចស្តាស៊ី (MDMA) ទម្ងន់៤៥០,៩១ក្រាម គ្រឿងញៀនប្រភេទកេតាមីន (KETAMINE) ទម្ងន់១៦២៤,៥២ក្រាម គ្រឿងញៀនប្រភេទនីមេតាហ្សេប៉ាម (Nimetazepam) ទម្ងន់ ៥,៩៨ក្រាម។ បច្ចុប្បន្នជនសង្ស័យ រួមនិងវត្ថុតាងខាងលើ កម្លាំងជំនាញបានកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធីហើយ។
សូមរំឭកថា កាលពីថ្ងៃទី២១ ខែកុម្ភៈ ឆ្នាំ២០២៤ កន្លងមក សមត្ថកិច្ចជំនាញនៃមន្ទីរប្រឆាំងគ្រឿងញៀនបានចុះបង្ក្រាបនៅខណ្ឌចំការមន និងខណ្ឌបឹងកេងកង ឃាត់ខ្លួនជនជាតិចិនតៃវ៉ាន់៣នាក់ ពាក់ព័ន្ធករណីជួញដូរ និងរក្សាទុកសារធាតុញៀនដកហូតបានវត្ថុតាងរួមមាន៖ សារធាតុញៀនអ៊ិចស្តាស៊ី (MDMA) ទម្ងន់១៦គីឡូ និង១៣៦,១២ក្រាម សារធាតុញៀនកេតាមីន(Ketamine) ៣៦០ក្រាម សារធាតុញៀនអ៊ិនីមេតាហ្សេប៉ាម១,៩៨ក្រាម និងសារធាតុមិនច្បាស់ទម្ងន់៥៦២២ក្រាម។ រីឯសម្ភារផ្សេងៗទៀតដែលរឹបអូសបានមានដូចជាទូរសព្ទដៃ០៤គ្រឿង និងជញ្ជីងថ្លឹង៣គ្រឿងផងដែរ៕
