ខេត្តព្រះសីហនុ៖ អាជ្ញាធរខេត្តព្រះសីហនុ កាលពីយប់​ថ្ងៃទី​២៥ ខែ​កុម្ភៈ​​ បានឃាត់ខ្លួនជនសង្ស័យ៧នាក់ មានជនជាតិចិន និងខ្មែរ ក្រោយពីបានត្រួតពិនិត្យ និង​ឃើញថា ពួកគេបានរក្សាទុក​ម្សៅក្រាមពណ៌សថ្លា សង្ស័យជាសារធាតុ​ញៀន នៅគោលដៅត្រួតពិនិត្យ​អាវុធ​ជាតិ​ផ្ទុះ និងជាតិអាកុលចំនួន​៤ទីតាំងផ្សេងគ្នានៅក្នុងក្រុងព្រះសីហនុ។

ប្រភពពីអាជ្ញាធរបានឱ្យដឹងបន្ថែមថា ជនសង្ស័យទាំង៧នាក់ដែលត្រូវបានឃាត់ខ្លួនមានជនជាតិខ្មែរ២នាក់ និងចិន៥នាក់ ហើយបច្ចុប្បន្នជនសង្ស័យខាងលើ ត្រូវបានអាជ្ញាធរនាំយកទៅអនុវត្តតាមនីតិវិធីច្បាប់ដោយគ្មានការលើកលែងឡើយ។ គួរបញ្ជាក់ថា ការឃាត់ខ្លួនជនសង្ស័យទាំង៧នាក់ខាងលើធ្វើឡើយកំលុងពេលអាជ្ញាធរ​ដាក់គោលដៅត្រួតពិនិត្យអាវុធជាតិផ្ទុះ និងជាតិអាកុលនៅ​៤គោលដៅផ្សេងៗគ្នា ក្នុងស្រុកព្រៃនប់​​ ខេត្តព្រះសីហនុ ដោយអាជ្ញាធរបានធ្វើការត្រួតពិនិត្យលើ​រថយន្ត​តូច ​និងធំ​​ចំនួន​៦៧៧គ្រឿង​​ ម៉ូតូ​និងPassapp ចំនួន២៩៤គ្រឿង។ ក្នុងពេលត្រួតពិនិត្យអាជ្ញាធរ ក៏បានធ្វើ​តេស្ដជាតិអាកុលទៅលើអ្នកបើកបរ​​ចំនួន១៧នាក់ និងរកឃើញវិជ្ជមានលើជនជាតិចិនម្នាក់។ បន្ថែមលើនេះ អាជ្ញាធរក៏បានផាកពិន័យអ្នកបើកបរម៉ូតូគ្មានមួក​សុវត្ថិភាព​ចំនួន​៦នាក់ និងឃាត់រក្សាទុករថយន្ត១គ្រឿង និងម៉ូតូ៣គ្រឿងផងដែរ៕ រាយការណ៍ដោយ៖ ភ្នាក់ងារខេត្ត​ព្រះសីហនុ