រដ្ឋមន្ត្រីការបរទេសចិន លោក ​វ៉ាង យី បាននិយាយថា ប្រទេសចិនសង្ឃឹមថា ប្រទេសបារាំងនឹងបន្តតួនាទីស្ថាបនាក្នុងការអភិវឌ្ឍទំនាក់ទំនងចិន-អឺរ៉ុប ដែលមានសុខភាពល្អ និងស្ថិរភាព ដោយបង្កើនការជឿទុកចិត្តគ្នាទៅវិញទៅមក និងការលើកកម្ពស់ការធ្វើសមាហរណកម្មផលប្រយោជន៍។

រដ្ឋមន្ត្រីចិន នៅក្នុងជំនួបជាមួយប្រធានាធិបតីបារាំង អេម៉ានូអែល ម៉ាក្រុង កាលពីថ្ងៃអង្គារទី២០ ខែកុម្ភៈ បាននិយាយថា ប្រទេសចិនសង្ឃឹមថា នឹងធ្វើការរួមគ្នាជាកម្លាំងរក្សាស្ថិរភាពនៅក្នុងពិភពលោក នេះបើយោងតាមសេចក្តីថ្លែងការណ៍របស់ក្រសួងការបរទេសនៅថ្ងៃពុធ។ លោក វ៉ាង បានលើកឡើងថា៖«យើងមានឆន្ទៈក្នុងការធ្វើការជាមួយប្រទេសបារាំងដើម្បីរក្សានូវសេចក្តីប្រាថ្នាដើមរបស់យើង រក្សាការផ្តោតអារម្មណ៍ ពង្រឹងកិច្ចសហប្រតិបត្តិការឱ្យកាន់តែស៊ីជម្រៅ»។ អ្នកការទូតជើងចាស់រូបនេះ​ ក៏បាននិយាយផងដែរថា៖«ប្រទេសចិនសង្ឃឹមថា ប្រទេសបារាំងនឹងបង្កើតបរិយាកាសធុរកិច្ចដោយយុត្តិធម៌ និងយុត្តិធម៌សម្រាប់ក្រុមហ៊ុនចិននៅទីនោះ ហើយផ្តល់នូវការរំពឹងទុកវិជ្ជមាន ស្ថិរភាព និងរយៈពេលវែង»។

នៅក្នុងជំនួបដាច់ដោយឡែកមួយរវាងលោក វ៉ាង និងទីប្រឹក្សាកិច្ចការបរទេសរបស់ប្រធានាធិបតីបារាំង ទីភ្នាក់ងារសារព័ត៌មានស៊ីនហួ បានរាយការណ៍ថា ភាគីទាំងពីរមានការប្រាស្រ័យទាក់ទងគ្នាយ៉ាងស៊ីជម្រៅលើបញ្ហាទាក់ទងនឹងសន្តិភាព និងសន្តិសុខ ហើយបានព្រមព្រៀងគ្នាថា ពហុភាគី គឺមិនអាចខ្វះបានសម្រាប់សន្តិភាព និងស្ថិរភាព។ ប្រទេសទាំងពីរនឹងបន្តពង្រឹងការសម្របសម្រួលជាយុទ្ធសាស្ត្រ ហើយបានយល់ព្រមធ្វើកិច្ចសហប្រតិបត្តិការបន្ថែមទៀតលើផ្នែកនៃការប្រែប្រួលអាកាសធាតុ ការអភិរក្សជីវចម្រុះ ផលិតផលកសិកម្ម និងអាហារ និងថាមពលស្អាត ក៏ដូចជាការស្រាវជ្រាវ និងអភិវឌ្ឍន៍ថាមពលនុយក្លេអ៊ែរ។ កិច្ចប្រជុំក៏បានលើកឡើងពីការបង្កើនភាពញឹកញាប់នៃការហោះហើរត្រង់រវាងចិន និងបារាំងផងដែរ។

គួររំឭកថា រដ្ឋមន្ត្រីការបរទេសចិន លោក វ៉ាង​ យី បាននិយាយក្នុងកំលុងដំណើរទស្សនកិច្ចទៅកាន់ប្រទេសអេស្ប៉ាញកាលពីថ្ងៃទី១៩ ខែកុម្ភៈថា ប្រទេសចិនបានត្រៀមខ្លួនជាស្រេចក្នុងការធ្វើការជាមួយសហភាពអឺរ៉ុប ដើម្បីរក្សាពាណិជ្ជកម្មសេរី អនុវត្តពហុភាគីនិយម និងលើកកម្ពស់ពិភពលោក ពហុប៉ូលដោយស្មើភាព និងមានសណ្តាប់ធ្នាប់ និងសកលភាវូបនីយកម្មសេដ្ឋកិច្ចរួមបញ្ចូល៕