រាជធានីភ្នំពេញ៖ ជំនួបដ៏ក្ដៅគគុក និងតស៊ូស្វិតស្វាញមួយនឹងកើតមានឡើងរវាងក្រុមបាល់ទាត់ផ្ការីគ្រប់រដូវ នាយ ពាក់មី និងក្រុមបាល់ទាត់គុនខ្មែរ ធឿន ធារ៉ា នៅថ្ងៃសុក្រ ទី២២ ខែធ្នូ ឆ្នាំ២០២៣ នៅពហុកីឡដ្ឋានជាតិ អូឡាំពិក ដើម្បីដណ្តើមប្រាក់រង្វាន់៧៧៧៧ដុល្លារសហរដ្ឋអាម៉េរិក យកទៅជូនមន្ទីរពេទ្យ គន្ធបុប្ផា...។
លោក ចែម ចាន់រ៉ា មានរហស្សនាមថា នាយ ពាក់មី បានឱ្យដឹងនារសៀលថ្ងៃទី១២ ខែធ្នូ ឆ្នាំ២០២៣ នេះថា៖«7777$ ក្រុមណាឈ្នះ ក្រុមនោះនឹងនាំថវិកានេះ ទៅជូនមន្ទីរពេទ្យគន្ធបុប្ផា ការប្រកួតបាល់ទាត់មិត្តភាពរវាងក្រុម (ផ្ការីកគ្រប់រដូវ VS គុនខ្មែរ)នៅថ្ងៃសុក្រ ទី២២ ខែ១២ នៅពហុកីឡដ្ឋានជាតិ អូឡាំពិកចាប់ពីម៉ោង៦ ល្ងាចតទៅ ចូលរួមទស្សនាដោយសេរី»។ នេះមិនមែនជាលើកទី១នោះទេ ដែលក្រុមបាល់ទាត់«ផ្ការីកគ្រប់រដូវ» ត្រូវប៉ះគ្នាជាមួយក្រុមផ្សេងៗ ដើម្បីប្រមូលថវិកាជួយដល់មន្ទីរពេទ្យគន្ធាបុប្ផា តាមរយៈការប្រកួតដោយប្រើថ្វីជើងរបស់សមាជិកក្រុម។ គេនៅចាំបានថា ជាច្រើនលើកហើយដែលក្រុមបាល់ទាត់នាយពាក់មី ប្រគល់ថវិកាសប្បុរសធម៌ដល់មន្ទីរពេទ្យគន្ធាបុប្ផា រាជធានីភ្នំពេញ បន្ទាប់ពីទទួលបានប្រាក់រង្វាន់ពីម្ចាស់ឧបត្ថម្ភដែលមានធនធាន ក្នុងន័យរួមចំណែកជួយសង្គ្រោះជីវិតកុមារនៅកម្ពុជា។ ដូច្នេះ ដើម្បីគាំទ្រ និងលើកទឹកចិត្តដល់ក្រុមអត្តពលិកកម្ពុជាទាំងអស់ និងដើម្បីស្មារតីកីឡា ក៏ដូចជាការលើកទឹកចិត្តដល់សកម្មភាពសប្បុរសធម៌ សូមកុំភ្លេចចូលរួមទស្សនាឱ្យបានច្រើនកុំករផងដែរ៕
