លោកស្រី ឆ្លូ ជេត Chloe Jade ជាមនុស្សមានឥទ្ធិពលម្នាក់ បានចងក្រងឯកសារអំពីការធ្វើដំណើរជុំវិញពិភពលោកនៅលើបណ្តាញសង្គមអ៊ីនស្តាក្រាម Instagram ដោយបានលើកឡើងថា លោកស្រីបានទៅទស្សនាជាង៨០ប្រទេសរួចមកហើយ។ ទន្ទឹមគ្នានោះដែរ លោកស្រីបានលើកឡើងថា មានកន្លែងមួយចំនួនដែលលោកស្រីមានអារម្មណ៍ថា មិនមានសុវត្ថិភាពបំផុតក្នុងនាមអ្នកធ្វើដំណើរជាស្ត្រី។ តើប្រទេសណាខ្លះ ឬកន្លែងណាខ្លះ ដែលលោកស្រីគិតថាជាកន្លែងដែលគ្មានសុវត្ថិភាពបំផុតនោះ...? ខាងក្រោមនេះ ជាទីក្រុងចំនួន៥នៃ៥ប្រទេសផ្សេងគ្នា ដែលលោកស្រី ឆ្លូ ជេត គូសបញ្ជាក់ថា ជាកន្លែងទេសចរណ៍ដែលគ្មានសុវត្ថិភាពបំផុតនៅលើពិភពលោក។
ទី១. ទីក្រុងប៉ាតាយ៉ា ប្រទេសថៃ៖ មែនទែនទៅ មានកន្លែងជាច្រើនដើម្បីទៅទស្សនានៅក្នុងប្រទេសថៃ ប៉ុន្តែប៉ាតាយ៉ា ត្រូវបានគេស្គាល់ថា ជាទីក្រុងនៃសេវាកម្មផ្លូវភេទដ៏អាក្រក់បំផុតរបស់ប្រទេសនៅអាស៊ីអាគ្នេយ៍មួយនេះ។ ជាទឡ្ហីករណ៍ លោកស្រី ឆ្លូ ជេត បានសង្កត់ធ្ងន់ថា៖«ខ្ញុំមានអារម្មណ៍ថា បុរសបរទេសជាច្រើនដែលទៅទីនោះ មានគោលបំណងក្នុងចិត្តតែមួយគត់ ហើយវាជាក់លាក់ណាស់ គឺដើម្បីរកសេវាកម្មផ្លូវភេទ។ ដូច្នេះ ការដែលនៅទីនោះក្នុងនាមជាមនុស្សស្រី បានធ្វើឱ្យខ្ញុំមានអារម្មណ៍មិនស្រណុកក្នុងចិត្ត និងមិនស្រួលជាខ្លាំង។ និយាយតាមត្រង់ទៅ ខ្ញុំតែងតែមានអារម្មណ៍ថា មានសុវត្ថិភាពនៅបណ្តាប្រទេសអាស៊ី ប៉ុន្តែទីក្រុងប៉ាតាយ៉ានៃប្រទេសមួយនេះ បានក្លាយជាសមោលតាមបន្លាចខ្ញុំ»។ តាមពិតទៅ ប៉ាតាយ៉ា ធ្លាប់ជាភូមិនេសាទដ៏ស្ងប់ស្ងាត់មួយនៅឆ្នេរសមុទ្រនៃប្រទេសថៃ ហើយបានរីកចម្រើនក្លាយជាគោលដៅទេសចរណ៍ដ៏ពេញនិយមបំផុតមួយនៅក្នុងប្រទេសថៃ ជាមួយនឹងសណ្ឋាគារដ៏ស្រស់ស្អាតរាប់មិនអស់ ប៉ុន្តែពេលខ្លះទីក្រុងមួយនេះត្រូវបានគេដាក់ឈ្មោះថាជា «ទីក្រុងឃាតកម្មនៃប្រទេសថៃ»។ ជាមួយនឹងការលើកឡើងនេះ អត្រាឧក្រិដ្ឋកម្មនៅប៉ាតាយ៉ាមានកម្រិតខ្ពស់បំផុត ក៏ដូចជាអំពើពុករលួយ និងការស៊ីសំណូក ជាពិសេសការប្រើប្រាស់ និងការជួញដូរគ្រឿងញៀនដ៏សម្បូរបែប។
ទី២. រដ្ឋធានីប៊ែលក្រាដ ប្រទេសស៊ែប៊ី៖ ជាការពិតណាស់ រដ្ឋធានីប៊ែលក្រាដរបស់ប្រទេសស៊ែប៊ី ក៏ជាកន្លែងដែលមិនមានសុវត្ថិភាពបំផុតសម្រាប់ លោកស្រី ឆ្លូ ជេត ផងដែរ។ ស្ត្រីជនជាតិអាម៉េរិករូបនេះ បាននិយាយថា៖«មានពេលមួយ ខ្ញុំនៅខាងក្រោយឡានតាក់ស៊ី ហើយអ្នកបើកបរប្រាប់ខ្ញុំថា លោកស្អប់អាម៉េរិកណាស់។ ហើយបុរសរូបនោះមិនឱ្យខ្ញុំឡើងឡានទេ ដោយទុកខ្ញុំចោល ហើយក្នុងនាមជាស្ត្រីឯកោនៅខាងក្រោយរថយន្ត នោះគឺជារឿងគួរឱ្យខ្លាចរអាខ្លាំងណាស់។ វាជារឿងឆ្កួតលីលាសម្រាប់ខ្ញុំ ដែលខ្ញុំមានអារម្មណ៍ថា មិនមានសុវត្ថិភាពនៅក្នុង រដ្ឋធានីប៊ែលក្រាដ»។
ទី៣. រដ្ឋធានីប៉ារីស ប្រទេសបារាំង៖ ប៉ារីសគឺជារដ្ឋធានីគោលដៅដ៏ពេញនិយមសម្រាប់ភ្ញៀវទេសចរអាម៉េរិកជាច្រើន។ យ៉ាងណា លោកស្រី ឆ្លូ ជេត បានបរិហារថា៖«នៅពេលខ្ញុំទៅលេងប៉ារីស ខ្ញុំមានបទពិសោធដ៏គួរឱ្យខ្លាចមួយ ជាមួយបុរសក្នុងស្រុកម្នាក់ ដែលបានបង្ខំខ្ញុំឱ្យផឹកស្រាជាមួយគេ។ ពេលខ្ញុំទៅផ្ទះសំណាក់នៅយប់នោះ ខ្ញុំបែកញើស និងត្រជាក់ចុងដៃចុងជើង ហើយមានអារម្មណ៍ថាមិនស្រួល។ ខ្ញុំមានអារម្មណ៍ថា ដូចត្រូវបានគេដាក់ថ្នាំសណ្តំ។ យ៉ាងណា ខ្ញុំគិតថា ខ្ញុំមានសំណាងណាស់ ដែលខ្ញុំបានគេចចេញពីកណ្តាប់ដៃរបស់បុរសរូបនោះបាន»។
ទី៤. ទីក្រុងម៉ារ៉ាកេស ប្រទេសម៉ារ៉ុក៖ លោកស្រីបានលើកឡើងថា៖«ទីក្រុងនេះ ត្រូវបានបង្កើតឡើង ដោយមានផ្លូវដើរតូចៗ ហើយជួនកាលពិតជាគួរឱ្យខ្លាចណាស់ ក្នុងការដើរតែម្នាក់ឯង ខណៈបុរសជាច្រើនមើលទៅគួរឱ្យខ្លាចណាស់»។ យ៉ាងណា ស្ត្រីទេសចរជនជាតអាម៉េរិករូបនេះ បានកត់សម្គាល់ថា ទីនោះជាកន្លែងដែលស្ត្រីមានសិទ្ធិតិចជាងបុរស ប៉ុន្តែលោកស្រីពិតជាមានអារម្មណ៍ថា មានសុវត្ថិភាពបំផុតនៅក្នុងប្រទេសទាំងនោះ ដោយសារតែមានតំបន់សម្រាប់តែស្ត្រី ហើយវាមិនត្រូវបានអនុញ្ញាតឱ្យបុរសចូលទៅជិតស្ត្រីនោះទេ។
ទី៥. រាជធានីឃីងស្តូន ប្រទេសហ្សាម៉ាអ៊ីក៖ ជុំវិញការចំណាយពេលវេលាកម្សាន្តនៅឃីងស្តូន លោកស្រី ឆ្លូ ជេត បានបញ្ជាក់ថា៖«នៅពេលខ្ញុំនៅហ្សាម៉ាអ៊ីក ជាទូទៅខ្ញុំមានអារម្មណ៍សុខស្រួល។ ប៉ុន្តែគ្រប់តំបន់ដែលខ្ញុំទៅ មានគេប្រាប់ខ្ញុំថា កុំឱ្យធ្វើខ្លួនជាមនុស្សស្រី។ មួយសន្ទុះក្រោយមក ខ្ញុំយល់ថាអ្វីៗមិនមានសុវត្ថិភាព។ ជាឧទាហរណ៍ នៅពេលដែលខ្ញុំបានទៅផ្សារមួយចំនួននៅទីនោះ ខ្ញុំត្រូវបានគេប្រាប់ថា ខ្ញុំមិនគួរទៅទីនោះទេ ព្រោះវាគ្មានសុវត្ថិភាព»។ គួរបញ្ជាក់ថា រាល់ការរៀបរាប់ខាងលើនេះ គ្រាន់តែផ្អែកលើបទពិសោធផ្ទាល់ខ្លួនរបស់លោកស្រី ឆ្លូ ជេត តែប៉ុណ្ណោះ វាមិនទាន់ត្រូវបានកំណត់ ឬមានការបញ្ជាក់ជាផ្លូវការដោយស្ថាប័នអន្តរជាតិណាមួយពីការស៊ើបអង្កេតស្រាវជ្រាវជាក់ច្បាស់លើទឡ្ហីករណ៍ ដែលបានរៀបរាប់ដូច លោកស្រី ឆ្លូ ជេត នេះនៅឡើយទេ ប៉ុន្តែដោយសារ លោកស្រី ឆ្លូ ជេត ជាមនុស្សមានឥទ្ធិពលក្នុងសង្គម ទើបអង្គភាព SBM News សម្រេចយកមកចុះផ្សាយ ដើម្បីជាទុនមួយក្នុងការគិតពិចារណា សម្រាប់បងប្អូនប្រជាពលរដ្ឋខ្មែរណាដែលមានបំណងចង់ទៅដើរលេងកម្សាន្តនៅបណ្តាប្រទេសខាងលើនេះ ងាយស្រួលមានការប្រុងប្រយ័ត្នលើដំណើរកម្សាន្តរបស់ខ្លួនឱ្យបានល្អ ចៀសវៀងជួបរឿងហានិភ័យណាមួយកើតឡើងជាយថាហេតុ ជាពិសេសអ្នកដែលនិយមទៅលេងប្រទេសថៃ ដែលជាប្រទេសជាប់ភូមិផងរបងជាមួយនឹងកម្ពុជាយើងនេះ៕
