សៀមរាប+ភ្នំពេញ៖ ថ្ងៃទី១នៃព្រះរាជពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ មានអ្នកទេសចរជាតិ និងអន្តរជាតិទៅលេងកម្សាន្តនៅរាជធានីភ្នំពេញ មានចំនួនប្រមាណ១ ២០០ ០០០នាក់ និងខេត្តសៀមរាបមានអ្នកទៅលេងកម្សាន្តប្រមាណ ៨៤៤៣១នាក់ ខណៈបញ្ហាសន្ដិសុខ សណ្ដាប់ធ្នាប់ និងសុវត្ថិភាពសាធារណៈ ត្រូវបានធានាទាំងស្រុងពីកងកម្លាំងសមត្ថកិច្ចបានយ៉ាងល្អប្រសើរ។ នេះបើតាមរបាយការណ៍របស់អនុគណៈកម្មការការពាររក្សាសន្ដិសុខ របៀបរៀបរយ សណ្ដាប់ធ្នាប់សង្គម ចរាចរណ៍ សង្គ្រោះទូកលិច និងអ្នកជំងឺ និងរបាយការណ៍ មន្ទីរទេសចរណ៍ខេត្តសៀមរាប។
របាយការណ៍ខាងលើបង្ហាញឱ្យដឹងថា នៅថ្ងៃទី០១នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក សភាពការណ៍សន្តិសុខសណ្តាប់ធ្នាប់ មានភាពល្អប្រសើរ ដែលមានប្រជាពលរដ្ឋមកចូលរួមកម្សាន្ត សប្បាយ យ៉ាងច្រើនកុះករ ប្រមាណ ១,២០០,០០០នាក់។ ថ្ងៃទី១នេះ បទល្មើសព្រហ្មទណ្ឌ ពុំមានអ្វីកើតឡើងគួរឱ្យកត់សម្គាល់នោះឡើយ។ ក្រុមគ្រូពេទ្យប្រចាំការនៅតាមគោលដៅ បានធ្វើការសង្រ្គោះបឋមដល់អ្នកដែលមានបញ្ហាសុខភាពសរុបចំនួន១៦៧៤នាក់ (ស្រី២៤៣នាក់) និងបានដឹកបញ្ជូនទៅសង្រ្គោះ នៅមន្ទីរពេទ្យចំនួនម្នាក់។
ចំពោះកម្លាំងការពារតាមគោលដៅនានា បានរកឃើញក្មេងវង្វេងសាច់ញាតិចំនួន០៦នាក់ និងបានធ្វើការផ្សព្វផ្សាយ ហើយត្រូវបានសាច់ញាតិក្រុមគ្រួសារមកទទួលយកទៅវិញបានចំនួន០៤នាក់ និងកំពុងស្វែងរកសាច់ញាតិចំនួន០២នាក់បន្តទៀត។ ជាមួយគ្នានោះ អាជ្ញាធរសមត្ថកិច្ចបានត្រៀមអន្តរាគមន៍ ចេញជួយសង្រ្គោះក្នុងករណីទូកប្រណាំងលិចទឹក បានចំនួន០៩ទូក និងបានជួយសង្រ្គោះកីឡាករសរុប ១៩៨នាក់ ប្រកបដោយសុវត្ថិភាព។ សូមជម្រាបផងដែរថា កម្លាំងសមត្ថកិច្ចចម្រុះប្រមាណជាង១៦០០០នាក់ ត្រូវបានដាក់ពង្រាយតាមគោលដៅសំខាន់ៗ ដើម្បីការពារសន្ដិសុខ សណ្ដាប់ធ្នាប់ និងសុវត្ថិភាព ក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅចាប់ពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣នៅរាជធានីភ្នំពេញ។
ដោយឡែក យោងតាមរបាយការណ៍ នៃមន្ទីរទេសចរណ៍ខេត្តសៀមរាប បានឱ្យដឹងថា ភ្ញៀវទេសចរទស្សនានៅខេត្តសៀមរាប អំឡុងថ្ងៃទី១ នៃព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ មានចំនួនប្រមាណ៨៤៤៣១នាក់ ក្នុងនោះភ្ញៀវទេសចរអន្ដរជាតិមានចំនួនប្រមាណ៧៤៣១នាក់ និងបងប្អូនប្រជាពលរដ្ឋក្នុងខេត្តសៀមរាប និងមកពីតាមបណ្រតាខេត្តនានា មានចំនួនសរុបប្រមាណ៧៧០០០នាក់។ ក្នុងនោះអញនកទេសចរបានទៅទស្សនានៅតំបន់រមណីយដ្ឋានអង្គរ មានចំនួនប្រមាណ៣៩០០០នាក់, រមណីយដ្ឋានភ្នំគូលែន មានចំនួនប្រមាណ៤២០០នាក់។ ដងស្ទឹងសៀមរាប មានចំនួនប្រមាណ២៥០០០ នាក់ និងនៅតាមសហគមន៍ទេសចរណ៍នានាមានចំនួនប្រមាណ៨៨០០នាក់។
ជាមួយគ្នានោះ រដ្ឋបាលខេត្តសៀមរាប បានរៀបចំប្រារព្ធព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ចាប់ពីថ្ងៃទី២៦-២៧ ខែវិច្ឆិកា ឆ្នាំ២០២៣ នៅតាមបណ្តោយដងស្ទឹងសៀមរាប ដែលកម្មវិធីនោះក៏មានរៀបចំនូវពិធីកម្សាន្តនានា ក៏ដូចជាមានការប្រណាំងទូក-ង ខ្នាតតូច (ចំណុះ២២នាក់) ការបណ្តែតប្រទីប, ការអុំទូកកម្សាន្តតាមដងស្ទឹងសៀមរាប, ការតាំងលក់ផលិតផល, ការប្រគំតន្ត្រី និងការប្រកួតប្រដាល់គុនខ្មែរជ្រើសរើសជើងឯកពិភពលោកផងដែរ៕
