(បាល់ទាត់)៖ នៅទីបំផុត!​ ក្រុម Inter Miami បានទ្បើងទៅវគ្គផ្តាច់ព្រ័ត្រម្ដងទៀតហើយ បន្ទាប់ពីយកឈ្នះលើក្រុម Cincinnati ដោយបាល់កាត់សេចក្តី១១ម៉ែត្រ ក្នុងលទ្ធផល ៤-៥ ក្រោយប្រកួតស្មើគ្នា ៣-៣ នាការប្រកួត៩០នាទី និងម៉ោងបន្ថែម១៥នាទី២ដងនៃពានរង្វាន់ U.S. Open Cup ឆ្នាំ២០២៣ វគ្គ៤ចុងក្រោយ នៅឯកីឡដ្ឋាន TQL កាលពីព្រឹកថ្ងៃទី២៤សីហានេះ...។

នេះជាលើកទី២​ជាប់ៗគ្នាសម្រាប់ក្រុម Inter Miami ទ្បើងទៅវគ្គផ្តាច់ព្រ័ត្រ បន្ទាប់ពីក្រុមដែលនៅក្រោមការដឹកនាំរបស់គ្រូបង្វឹក លោក Gerardo Martino និងវត្តមានរបស់កំពូលខ្សែប្រយុទ្ធ​ Lionel Messi ដែលបានមកចូលរួមក្នុងទឹកដីសហអាម៉េរិក។ ក្រុម Inter Miami ទើបតែលើកពាន Leagues Cup បន្ទាប់ពីយកឈ្នះលើក្រុម Nashville ដោយទាត់បាល់កាត់សេចក្តី១១ម៉ែត្រ ក្នុងលទ្ធផល១០-៩ ក្រោយលេងអស់១២០នាទី ស្មើគ្នា ១-១។ ហើយក៏ជាម្ចាស់ស្បែកជើងមាស ក្នុងពានរង្វាន់ខាងលើនេះផងដែរ។

គួររំលឹកថា Lionel Messi បានចាកចេញពីក្រុម Paris Saint Germain មកចូលរួមជាមួយក្រុម Inter Miami ដែលមានលោក David Beckham ជាប្រធានក្លឹប ដោយបានចុះកិច្ចសន្យារយ:ពេល២​ឆ្នាំកន្លះ និងទទួលបានថ្លៃនឿយហត់ប្រមាណជាង៥៤លានដុល្លារអាម៉េរិកក្នុង១រដូវកាល រួមទាំងមានជម្រើសបន្តកិច្ចសន្យារយ:ពេល១ឆ្នាំបន្ថែមទៀត។ដូច្នេះ សម្រាប់ការប្រកួតវគ្គផ្តាច់ព្រ័ត្ររបស់ក្រុម Inter Miami ក្នុងពានរង្វាន់ U.S. Open Cup ឆ្នាំ២០២៣នេះ នឹងត្រូវប៉ះគ្នាជាមួយក្រុម Houston Dynamo ដែលទើបតែយកឈ្នះលើក្រុម Real Salt Lake ដោយលទ្ធផលក្នុងម៉ោងបន្ថែម១៥នាទី​​២ដង ៣-១ កាលពីព្រឹកមិញដូចគ្នា..៕