រាជធានីភ្នំពេញ៖ គ្រោះថ្នាក់ចរាចរណ៍រវាងម៉ូតូ២គ្រឿងបុកគ្នា ស្រាប់តែមានភាគី២ក្រុមទៀតឈ្លោះប្រកែកគ្នាបង្កហិង្សាវាយដំផ្អើលសមត្ថកិច្ច រហូតផ្ទុះអាវុធជាច្រើនគ្រាប់ និងឃាត់ក្រុមបង្កចំនួន៣នាក់យកទៅសួរនាំ ខណៈហេតុការណ៍នេះ កើតឡើងវេលាម៉ោង៣ៈ៣០នាទីព្រឹកថ្ងៃទី១៦ ខែសីហា ឆ្នាំ២០២៣ នៅតាមបណ្ដោយផ្លូវសហព័ន្ធរុស្ស៊ី ជាប់របងព្រលានយន្តហោះអន្តរជាតិភ្នំពេញ...។
មុនពេលកើតហេតុ គេឃើញម៉ូតូម៉ាកហុងដាឌ្រីម ស៊េរីឆ្នាំ២០២២ ពណ៌ខ្មៅ ពាក់ស្លាកលេខ កណ្តាល 1AG-5749 ជិះគ្នា៣នាក់ ក្នុងទិសដៅពីជើងទៅត្បូងជិះ ដោយស៊ីញ៉ូឆ្វេងបម្រុងឆ្លងផ្លូវ ស្រាប់តែឃើញម៉ូតូមួយគ្រឿងទៀតម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ 1GI-8447 ជិះគ្នា២នាក់ ក្នុងទិសដៅពីជើងទៅត្បូងក្នុងល្បឿនយ៉ាងលឿន ជាន់ហ្វ្រាំងមិនជាប់ក៏ជ្រុលទៅបុកម៉ូតូហុងដាឌ្រីម ស៊េរីឆ្នាំ២០២២ បណ្តាលឱ្យរងរបួសធ្ងន់ម្នាក់ និងស្រាល២នាក់ ត្រូវបានរថយន្តសង្គ្រោះឯកជនដឹកយកទៅសង្គ្រោះភ្លាមៗ ហើយសមត្ថកិច្ចបានបាញ់ថ្នាំយកម៉ូតូដាក់អែបខាងភ្លាមៗ។ ខណៈពេលនគរបាលប៉ុស្តិ៍យកម៉ូតូ២គ្រឿងដាក់អែបខាង ដើម្បីសម្រួលចរាចរណ៍តាមដងផ្លូវ ស្រាប់តែភាគីទាំងពីរបានជជែកយកត្រូវរៀងៗខ្លួន។
ពេលនោះមានយុវជន២ក្រុមទៀត បានមកជជែកជាមួយ និងដោះខ្សែក្រវាត់បម្រុងវាយគ្នា ក៏ជិះម៉ូតូចេញពីកន្លែងគ្រោះថ្នាក់ចរាចរណ៍ទៅបាត់ហើយ ក៏លេចក្រុមពួកផឹកស៊ីនៅរបងព្រលានយន្តហោះអន្តរជាតិភ្នំពេញ បានដេញវាយគ្នាផ្អើលពេញផ្លូវធ្វើឱ្យនគរបាលប៉ុស្តិ៍ដែលកំពុងតែសម្រួលចរាចរណ៍ ឃើញហិង្សាវាយគ្នាយ៉ាងអាណាធិបតេយ្យ ក៏បានផ្ទុះអាវុធគំរាមជិត១០គ្រាប់ឃាត់បានមនុស្ស៣នាក់ និងម៉ូតូ២គ្រឿង ។ ក្រោយពេលកើតគ្រោះថ្នាក់ចរាចរណ៍សមត្ថកិច្ចនគរបាលជំនាញចរាចរណ៍ធ្វើការវាស់វែងយកទៅរក្សាទុកដើម្បីរង់ចាំការដោះស្រាយ ចំណែកករណីហិង្សាសមត្ថកិច្ចនគរបាលប៉ុស្តិ៍ឃាត់យកទៅសួរនាំនៅប៉ុស្តិ៍ ដើម្បីចាត់ការតាមនីតិវិធីបន្ត៕
