រាជធានីភ្នំពេញ៖ ក្នុងរយៈពេល៧ខែឆ្នាំ២០២៣នេះ កម្ពុជារកចំណូលពីការលក់សំបុត្រឱ្យភ្ញៀវបរទេសចូលទស្សនាតំបន់កម្សាន្តអង្គរចំនួនជាង ២០,៣១លានដុល្លារអាម៉េរិក កើនឡើង៥០២,៧៩ភាគរយ បើធៀបនឹងរយៈពេលដូចគ្នាក្នុងឆ្នាំ២០២២។
ផ្អែកតាមរបាយការណ៍របស់គ្រឹះស្ថានអង្គរ ចាប់ពីខែមករាដល់ខែកក្កដាឆ្នាំនេះ ភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរ មានចំនួនសរុប៤៣៩ ៣៦៥នាក់ ពោលគឺកើនឡើងចំនួន ៤២៣,៩៦ភាគរយ បើធៀបនឹងរយៈពេលដូចគ្នាក្នុងឆ្នាំ២០២២ ក្នុងនោះភ្ញៀវបរទេសភាគច្រើនគឺសហរដ្ឋអាម៉េរិក ចិន អង់គ្លេស បារាំង និងកូរ៉េខាងត្បូង។
ទន្ទឹមនឹងនោះ គ្រឹះស្ថានអង្គរបានឱ្យដឹងដែរថា ការប្រមូលចំណូលពីការលក់សំបុត្រចូលទស្សនាប្រាសាទបុរាណទៅដល់ភ្ញៀវទេសចរបរទេសតាមរមណីយដ្ឋានផ្សេងៗ រួមមាន៖ រមណីយដ្ឋានអង្គរ ប្រាសាទកោះកែរ និងសំបុត្រទូកនៅកំពង់ផែចុងឃ្នៀសជាដើម ដោយក្នុងនោះចំណូលពីការលក់សំបុត្រចូលទស្សនាប្រាសាទកោះកែរមានចំនួន ១០៦ ១២៥ ដុល្លារ និងការលក់សំបុត្រទូកបានចំនួន ៣២៨ ៦៦៨ដុល្លារ។
ដោយឡែក សម្រាប់ខែកក្កដា ឆ្នាំ២០២៣ គ្រឹះស្ថានអង្គររកចំណូលបានចំនួនជាង២,៤លានដុល្លារអាម៉េរិក ពីការលក់បណ្ណជូនភ្ញៀវទេសចរបរទេសចំនួន ៥៣ ៥៩៦នាក់។ ជាទូទៅ គ្រឹះស្ថានអង្គរបែងចែកតម្លៃចូលទស្សនារមណីយដ្ឋានអង្គរជា៣ប្រភេទ រួមមាន៖ កញ្ចប់ទី១ ទស្សនា១ថ្ងៃតម្លៃ៣៧ដុល្លារ កញ្ចប់ទី២ ទស្សនា៣ថ្ងៃតម្លៃ៦២ដុល្លារ និងកញ្ចប់ទី៣ ទស្សនា១សប្ដាហ៍តម្លៃ៧២ដុល្លារ។
គួររំលឹកដែរថា ក្នុងឆមាសដំបូងឆ្នាំ២០២៣ ពោលគិតចាប់ពីខែមករា ដល់ខែមិថុនា កម្ពុជារកចំណូលបានពីការលក់បណ្ណចូលទស្សនារមណីយដ្ឋានអង្គរ និងប្រាសាទកោះកែរបានចំនួនជាង ១៧,៨លានដុល្លារ និងមានភ្ញៀវទេសចរបរទេស ចំនួនសរុប ៣៨៥ ៧៦៩នាក់ នាក់៕
