កីឡា៖ បន្ទាប់ពីរៀបចំការប្រកួតបាល់ទះពានរង្វាន់ឯកឧត្តម ស សុខា ឆ្នាំ២០២៣ ទទួលបានជោគជ័យ សហព័ន្ធកីឡាបាល់ទះកម្ពុជា គ្រោងបង្កើតលីគអាជីពជាលើកដំបូង ដើម្បីជំរុញ និងអភិវឌ្ឍវិស័យកីឡាបាល់ទះនៅកម្ពុជាឱ្យរីកចម្រើនដូចប្រទេសជាច្រើននៅតំបន់អាស៊ាន ក៏ដូចជាពិភពលោក ដែលបណ្តាប្រទេសទាំងនោះ មានលីគអាជីពបាល់ទះប្រចាំឆ្នាំ...។
លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានឱ្យដឹងថា ការបង្កើតលីគអាជីពនៅកម្ពុជា ពិតជាសំខាន់ណាស់សម្រាប់កីឡាករបាល់ទះកម្ពុជា ដើម្បីទទួលបានឱកាសច្រើនក្នុងការបង្ហាញសមត្ថភាព និងបង្កើនបទពិសោធ។ គម្រោងការបង្កើតនេះ ដើម្បីឱ្យកីឡាករបាល់ទះជម្រើសជាតិកម្ពុជា ត្រៀមខ្លួនបានច្រើន និងល្អប្រសើរសម្រាប់ការប្រកួតលើឆាកអន្តរជាតិ ជាពិសេសក្នុងព្រឹត្តិការណ៍កីឡាទ្វីបអាស៊ី Asian Games នៅប្រទេសចិន ដែលកម្ពុជាត្រូវជួបកូរ៉េខាងត្បូង និងឥណ្ឌា ព្រមទាំងត្រៀមខ្លួនសម្រាប់កីឡាស៊ីហ្គេម ឆ្នាំ២០២៥ នៅប្រទេសថៃ ព្រមទាំងពានរង្វាន់អន្តរជាតិផ្សេងៗទៀត។
គូសបញ្ជាក់ផងដែរថា ប៉ុន្មានឆ្នាំចុងក្រោយនេះ ក្រុមបាល់ទះជម្រើសជាតិកម្ពុជា ធ្វើបានយ៉ាងល្អក្នុងព្រឹត្តិការណ៍កីឡាស៊ីហ្គេម ដោយបានឈានដល់វគ្គពាក់កណ្តាលផ្តាច់ព្រ័ត្រ ឆ្នាំ២០២២ នៅប្រទេសវៀតណាម ទទួលបានមេដាយសំរិទ្ធ និងឆ្នាំ២០២៣ ឡើងដល់វគ្គផ្តាច់ព្រ័ត្រទទួលបានមេដាយប្រាក់។ មុនពេលទទួលបានជោគជ័យ ជាប្រវត្តិសាស្ត្រនេះ ក្រុមបាល់ទះជម្រើសជាតិកម្ពុជា បានធ្វើការប្រកួតមិត្តភាពអន្តរជាតិជាច្រើន ជាមួយក្រុមខ្លាំងៗមកពីប្រទេសបារាំង គុយប៉ា ចិន និងសិង្ហបុរីជាដើម។ នៅពេលនេះ ក្រុមបាល់ទះកម្ពុជា បានបោះជំហានចូលកីឡាទ្វីបអាស៊ីជាលើកដំបូង បន្ទាប់ពីខកខានអស់រយៈពេលជិត ៥០ឆ្នាំ ហើយបើគិតចាប់តាំងពីធ្លាប់ចូលរួមប្រកួតចុងក្រោយ កាលពីឆ្នាំ១៩៧០៕
