(គុនខ្មែរ)៖ ក្រោយផ្តួលកីឡាករជើងខ្លាំងញូសេលែន ដានីញ៉ែល ជែម ឱ្យបោះបង់ការប្រកួតត្រឹមទឹកទី៣ កីឡាករព្រំ សំណាង បានបង្កើតប្រវត្តិសាស្ត្រឱ្យខ្លួនឯង ដែលមិនដែលស្គាល់ការបរាជ័យ រយៈពេល១ត្រីមាសពេញ សម្រាប់ឆ្នាំ២០២៣ ទាំងប្រកួតមិត្តភាព ដណ្តើមខ្សែក្រវាត់នៅឆាកអន្តរជាតិនានា...។
បើនិយាយពីការប្រកួតដើមឆ្នាំ២០២៣ កីឡាករប្រដាល់គុនខ្មែរ ព្រំ សំណាង បានធ្វើព្យុះភ្លៀងពេញសង្វៀនក្នុងស្រុក និងការដណ្តើមបានខ្សែក្រវាត់គុនខ្មែរនៅប្រទេសថៃពីសង្វៀនខ្នាតអន្តរជាតិមួយប្រចាំប្រទេសថៃ គឺថៃហ្វៃត៍ រហូតសង្វៀនប្រដាល់មួយនេះលែងហ៊ាននាំយកកីឡាករគុនខ្មែរឡើងប្រកួតតទៅទៀតខ្លាចបាក់មុខ បន្ទាប់ពីកីឡាករកម្ពុជា២រូប ដណ្តើមបានជ័យជម្នះត្រចេះត្រចង់ ខណៈជនបរទេសមួយចំនួន បានដឹងថា មរតកក្បាច់គុនដែលពួកគេហ្វឹកហាត់នៅប្រទេសថៃ ជាក្បាច់គុនដើមមកពីប្រទេសកម្ពុជា។ ងាកមកមើលកីឡាករជើងខ្លាំងរបស់កម្ពុជា សម័យបច្ចុប្បន្នឯណេះវិញ កីឡាករព្រំ សំណាង បានផ្តួលជើងខ្លាំងថៃ សាម៉ីបានចាមេកឱ្យសន្លប់នៅទឹកទី២ នៅសង្វៀនទទក, ផ្តួលជើងខ្លាំងថៃ ប៊ន ស៊ីតមុនឆៃ ត្រឹមទឹកទី១, ផ្តួលកីឡាករអង់គ្លេស ថូម៉ាស ដោយប្រើពេលត្រឹម២នាទីក្នុងទឹកទី១ នៅសង្វៀនថៃហ្វៃត៍ដណ្តើមខ្សែក្រវាត់, ផ្តួលកីឡាករថៃ ស៊ីងនុម នៅទឹកទី២, ផ្តួល កីឡាករ ហ្វែ ដាវហ្សូន នៅសង្វៀនថៃហ្វៃត៍ នៅទឹកទី១, ឈ្នះជើងខ្លាំងភូមា ទុន ទុនមីន នៅព្រឹត្តិការណ៍ស៊ីហ្គេម, ឈ្នះពិន្ទុកីឡាករអ៊ីរ៉ង ម៉ាស៊ូត និងផ្តួលកីឡាករញូសេលែន កាលពីម្សិលម៉ិញនេះផងដែរ។
តាមរយៈការផ្តួលដៃគូជាបន្តបន្ទាប់នេះ កីឡាករ ព្រំ សំណាង ធ្លាប់ឱ្យ SBM News ដឹងថា នេះជាជោគជ័យមួយដែលខ្លួនមិនដែលស្រម៉ៃ ក្រោយអាជីពមួយនេះស្ទើរធ្លាក់ដល់ចំណុចសូន្យទៅហើយ។ កីឡាករ ព្រំ សំណាង ជាអ្នកប្រដាល់ចិត្តធំ មិនចេះខ្លាច មិនចេះញញើត ព្រមទាំងចូលវាយមិនចេះបន្ធូរដៃឱ្យដៃគូនោះឡើយ។ គួររម្លឹកថា កីឡាករ ព្រំ សំណាង មួយរយៈពេលនៃការប្រមូលផ្ដុំហ្វឹកហាត់ ក្នុងក្រុមជម្រើសជាតិ ត្រូវបានគេកត់សម្គាល់ឃើញថា សមត្ថភាពរីកចម្រើនខ្លាំង ដ្បិតថាយឺតបន្តិចមែន ប៉ុន្តែកណ្ដាប់ដៃរបស់គេធ្ងន់ល្អណាស់ និងមានអាវុធជង្គង់បោះចេញមួយៗធ្ងន់តែម្ដង...៕
