(បាល់ទាត់)៖ ក្រុមមេឃខៀវ​ Manchester City កំពុងស្វែករកខ្សែការពារដ៏មានគុណភាពបន្ថែមទៀត ខណៈដែលក្រុមដឹកនាំដោយលោក Pep Guardiola សម្លឹងមើលកីទ្បាករ Josko Gvardiol របស់ក្រុម RB Leipzig ដែលក្លិបអាល្លឺម៉ង់មួយនេះបានកំណត់តម្លៃរហូតដល់ ១០០ លានអឺរ៉ូ ឬស្មើនឹង ៨៥,៧៧ លានផោនឯណោះ។

លោក Pep Guardiola ជាគ្រូបង្វឹករបស់ក្រុម City បានសរសេរកីទ្បាកសញ្ជាតិក្រូអាតវ័យ ២១ ឆ្នាំរូបនេះមិនដាច់ពីមាត់សោះ បន្ទាប់ពីបានបង្ហាញខ្លួនគ្រប់នាទីនៅក្នុងក្រុមជម្រើសជាតិបានយ៉ាងល្អពោលគឺ ៧ប្រកួត អំទ្បុងពេលព្រឹត្តិការណ៍ World Cup កាលពីឆ្នាំមុន។ កាលពីរដូវកាលមុន Josko Gvardiol បានបង្ហាញខ្លួនឱ្យក្រុម RB Leipzig ចំនួន ៤១ប្រកួត ហើយរកបាន ១គ្រាប់ទៀត ពេលលេងទល់ជាមួយនឹងក្រុម Manchester City ក្នុងជើងទី១ វគ្គ ១៦ក្រុមចុងក្រោយ នៃក្របខណ្ឌ UEFA Champions League ខណៈដែលក្រុម City បានយកឈ្នះទាំងពីរជើងរហូតដល់ ៨-១ ឯណោះ។ 

Josko Gvardiol លេងឱ្យក្រុមជម្រើសជាតិក្រូអាត ២១ប្រកួត និងជួយឱ្យក្រុមទទួលបានចំណាត់ថ្នាក់លេខ ៣ នៅ World Cup ឆ្នាំ ២០២២ ផងដែរ បន្ទាប់ពីយកឈ្នះលើក្រុមជម្រើសជាតិម៉ារ៉ុក។ Josko Gvardiol ក៏អាចលេងជំនួសកីទ្បាករ Aymeric Laporte នៅក្នុងតំបន់ការពារកណ្តាលរបស់ក្រុម Manchester City ផងដែរ សម្រាប់រដូវកាលក្រោយ។

ទន្ទឹងនោះដែរ  Manchester City គឺជាក្រុមទី ២ បន្ទាប់ពីក្លិប Arsenal កំពុងសម្លឹងមើលលើប្រធានក្រុម West Ham United គឺកីទ្បាករអង់គ្លេស Declan Rice ដែលក្លិបយក្សអង់គ្លេសនេះហ៊ានឱ្យតម្លៃប្រមាណជាង ៨០ លានផោន រួមទាំងប្រាក់បន្ថែមទៀតរហូតដល់ ១០ លានផោន ខណៈដែល Arsenal ហ៊ានឱ្យតម្លៃរហូតដល់ ៧៥ លានផោន រួមទាំងប្រាក់បន្ថែមទៀត ១៥ លានផោន ប៉ុន្តែត្រូវក្រុមញញួរធំបដិសេធសំណើ កាលពីសប្តាហ៍មុន៕ 

ប្រភព៖ BBC