នៅក្នុងសមយុទ្ធយោធាដ៏ធំបំផុតមួយរបស់ប្រទេសស្វីស ក្នុងរយៈពេលជាង៣ទសវត្សរ៍ ទាហានបានហាត់សមលើការវាយបកសត្រូវ ប្រើប្រាស់គ្រាប់បែកដៃ និងបាញ់គ្រាប់កាំភ្លើង ដើម្បីបង្ហាញពីសមត្ថភាពការពារខ្លួន...។

សមយុទ្ធដែលមានកងទ័ពចូលរួមចំនួន៤០០០នាក់ ត្រូវបានធ្វើឡើងនៅទីប្រជុំជនចំនួន៤ ក្នុងរយៈពេល៩ថ្ងៃ បានធ្វើឡើងខណៈដែលតួនាទីរបស់ប្រទេសក្នុងវិស័យការពារជាតិនៅតំបន់អឺរ៉ុបមួយនេះ បានយកចិត្តទុកដាក់ចំពេលមានការអំពាវនាវឱ្យជួយអ៊ុយក្រែន ក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី។ នៅឯកន្លែងហាត់សម Les Pradieres កាលពីថ្ងៃព្រហស្បតិ៍ទី៤ ខែឧសភាសប្តាហ៍មុន ក្រុមទាហានថ្មើរជើងមួយក្រុម ភាគច្រើនជាជនស៊ីវិល ដែលចូលរួមក្នុងការបម្រើយោធាជាប្រចាំរបស់ពួកគេ បានដើរយឺតៗឡើងលើភ្នំ ដោយប្រើគ្រាប់បែកផ្សែង ដើម្បីលាក់បាំងចលនារបស់ពួកគេ មុនពេលអង្គុយចុះដើម្បីបាញ់សំដៅទៅគោលដៅ។ សមយុទ្ធ LUX 23 ដែលបានគ្រោងទុកតាំងពីឆ្នាំ២០២១ មិនត្រូវបានរៀបចំជាការឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែនកាលពីខែកុម្ភៈឆ្នាំមុនទេ។

លោក Mathias Tuscher មេបញ្ជាការកងពលធំលេខ១ របស់ប្រទេសស្វីសអះអាងថា៖«ឆន្ទៈដៃគូរបស់យើង និងការយល់ដឹងរបស់ប្រជាជនទាក់ទងនឹងសមយុទ្ធប្រភេទនេះ បានផ្លាស់ប្ដូរយ៉ាងខ្លាំង។ ជាការពិតណាស់ នេះគឺទាក់ទងដោយផ្ទាល់ទៅនឹងសង្រ្គាមនៅអ៊ុយក្រែន»។ សម្ពាធសាធារណៈ និងអន្តរជាតិបានកើនឡើងសម្រាប់ប្រទេសស្វីស ដើម្បីបញ្ចប់ការហាមឃាត់ការនាំចេញអាវុធទៅកាន់តំបន់សង្គ្រាម ប៉ុន្តែក្រុមនយោបាយមួយចំនួនបារម្ភថា នេះនឹងជាការបញ្ចប់នៃគោលនយោបាយការបរទេសអព្យាក្រិតភាពដ៏យូរអង្វែងរបស់ប្រទេសនេះ។

ជាចុងក្រោយ លោក Mauro Poggia ទីប្រឹក្សារដ្ឋទទួលបន្ទុកមន្ទីរសន្តិសុខ ប្រជាជន និងសុខាភិបាលទីក្រុងហ្សឺណែវបានបញ្ជាក់ថា ៖«យើងយល់ថាប្រជាជនលាយបញ្ចូលគ្នានូវតម្រូវការក្នុងការគាំទ្រប្រទេសមួយដែលកំពុងរងការវាយប្រហារ និងតម្រូវការដើម្បីរក្សាកន្លែងសម្រាប់អ្នកឈ្លានពាន នៅពេលដែលត្រូវបានចាត់តាំងដូច្នេះ ដើម្បីមកពិភាក្សា និងស្វែងរកដំណោះស្រាយ។ គ្មានអ្វីអាក្រក់ជាងការបិទទ្វារទេ ប្រទេសស្វីសត្រូវតែទាញទ្វារចេញ ហើយទ្វារនេះត្រូវតែបានការពារ»៕