(ស៊ីហ្គេម)៖ វិញ្ញាសាសម្តែងថ្វាយបង្គំគ្រូ២ប្រភេទ ដែលម្ចាស់ផ្ទះកម្ពុជា រំពឹងទទួលបានលទ្ធផលល្អ ពោលគឺអាចឈានដល់វគ្គមេដាយមាស ក្នុងចំណោមវិញ្ញាសា១៩ សម្រាប់ប្រដាល់គុនខ្មែរក្នុងព្រឹត្តិការណ៍កីឡាស៊ីហ្គេម លើកទី៣២...។
វិញ្ញាសាសម្តែងថ្វាយបង្គំគ្រូ ផ្នែកបុរសរបស់កម្ពុជា គឺប្រកួតដោយកីឡាករប្រដាល់ កាន់ ម៉េងហុង ដែលរូបគេប្រកួតតែសម្តែងតែមួយគត់។ ចំណែកវិញ្ញាសាសម្តែងនារីរបស់កម្ពុជាគឺដោយកីឡាការិនី ម៉ើយ ស៊ឹង។ ក្រៅពីប្រកួតវិញ្ញាសាសម្តែង កីឡាការិនីកម្ពុជារូបនេះត្រូវប្រកួតវិញ្ញាសាប្រយុទ្ធទម្ងន់៥១គីឡូក្រាមមួយទៀត ហើយជាអត្តពលិកកម្ពុជាតែ១រូបគត់ដែលប្រកួតពីរវិញ្ញាសាក្នុងកីឡាគុនខ្មែរ។
សម្រាប់គុនខ្មែរមានប្រទេស៧បានចុះឈ្មោះចូលរួមប្រកួតក្នុងកីឡាស៊ីហ្គេម លើកទី៣២។ បើសម្លឹងទៅមើល ហ្វីលីពីន ម៉ាឡេស៊ី ឥណ្ឌូណេស៊ី មីយ៉ាន់ម៉ា និងវៀតណាម មិនសូវមានជំនាញខ្លាំងពីរបៀបថ្វាយបង្គំគ្រូទេ ប៉ុន្តែប្រទេសឡាវអាចចាត់ទុកជាដៃគូប្រជែងមេដាយមាសដែរ ដោយសារប្រទេសនេះក៏មានក្បាច់គុនមួយឡាវ និងមានរបៀបថ្វាយបង្គំច្រើនរបៀបដូចកម្ពុជាដែរ។
ទោះជាយ៉ាងណា មុនចូលរួមប្រកួតស៊ីហ្គេម ប្រទេសនីមួយៗសុទ្ធតែបានហ្វឹកហាត់ និងត្រៀមខ្លួនយ៉ាងល្អ ដូច្នេះ ក្នុងនាមជាម្ចាស់ក្បាច់គុនខ្មែរមិនត្រូវមើលស្រាលដៃគូប្រកួតឡើយ។ ការប្រកួតគុនខ្មែរនឹងចាប់ផ្តើមពីថ្ងៃទី៦ ដល់ទី១១ ខែឧសភា នៅពហុកីឡដ្ឋានជាតិមរតកតេជោ...៕
