តម្លៃមាសបានចាប់ផ្តើមហក់ឡើងចាប់តាំងពីដើមខែមីនាមក ដោយបានកើនលើសពីតម្លៃ២ពាន់ដុល្លារក្នុងមួយឱន ឬស្មើនឹងជាង៨ជីមាស។ មាសឡើងថ្លៃ កើតឡើងស្របពេលដែលអ្នកវិនិយោគមួយចំនួនផ្តើមពិចារណា ដោយសាររារែកលើការវិនិយោគផ្សារហ៊ុនថ្មីៗ នៅចំពោះមុខការដួលរលំនៃធនាគារធំៗនៅអាម៉េរិក ហើយគេបែរមកចាប់អារម្មណ៍លើទីផ្សារមាសវិញ ដោយហេតុថា វាមានសុវត្ថិភាពជាង។  

ជាក់ស្តែង តម្លៃមាសនៅទីផ្សារក្រុងញូយ៉ក សហរដ្ឋអាម៉េរិក បានកើនឡើងជាង៤០ភាគរយធៀបនឹងរយៈពេលដូចគ្នាកាលពីឆ្នាំ២០២២ ដែលមានតម្លៃជាង ២០១០ដុល្លារក្នុងមួយឱន។ បន្ថែមពីលើនេះ តម្លៃមាសបានកើនឡើងភ្លាមៗពីតម្លៃទៀតបំផុតកាលពីចុងសប្តាហ៍ទី១នៃដើមខែមីនា ពោលគឺនៅមុនពេលដែលធនគារធំៗនៅសហរដ្ឋអាម៉េរិកក្ស័យធន។ បើតាមអ្នកវិភាគទីផ្សារមាស នឹងបន្តឡើងថ្លៃដល់ជិត២០៩០ដុល្លារ ក្នុងមួយឱន ដែលជាតម្លៃខ្ពស់បំផុត រាប់ចាប់តាំងពីខែសីហាឆ្នាំមុន ជាពេលដែលសេដ្ឋកិច្ចពិភពលោករងការវាយប្រហារដោយជំងឺកូវីដ១៩។ មិនដូចជាផ្សារភាគហ៊ុនទេ មូលបត្របំណុលឯកជន និងរបស់រដ្ឋ និងទ្រព្យសកម្មផ្សេងទៀត មាសត្រូវបានគេស្គាល់ថា ជាជម្រកមួយសុវត្ថិភាពជាង ដោយវាមិនសូវមានហានិភ័យខ្ពស់នៃការដួលរលំ ដូចទីផ្សារភាគហ៊ុន។ ទីផ្សារមាស បានក្លាយជាទីផ្សារដ៏មានសុវត្ថិភាព និងពេញនិយមមួយ ក្នុងចំណោមវិនិយោគិន ពិសេសអំឡុងពេលដែលទីផ្សារធ្លាក់ចុះ ដោយសារតែភាពតានតឹងភូមិសាស្ត្រនយោបាយ អស្ថិរភាពហិរញ្ញវត្ថុ ឬការធ្លាក់ចុះសេដ្ឋកិច្ច។

សូមជម្រាបថា ទីផ្សារ​ហិរញ្ញវត្ថុ​អឺរ៉ុប​ និង​អាស៊ី នៅ​តែ​បន្ត​ដាំក្បាល​ធ្លាក់​ចុះ​ដដែល។ នេះ​សបញ្ជាក់​ឱ្យ​ឃើញ​ថា អ្នក​វិនិយោគ​ពិភពលោក ពុំ​ទាន់​មាន​ទំនុក​ចិត្ត​ឡើង​វិញ​ទេ បើ​ទោះបី​ជា​ធនាគារ​ដ៏​ធំ​ជាង​គេ​បង្អស់​របស់​ស្វីស UBS ​ បានប្រកាស​​ទិញ ធនាគារ Credit Suisse ដែល​កំពុង​ជួប​បញ្ហា​ក៏​ដោយ។ ទោះយ៉ាងណា ធនាគារ​កណ្តាល​អឺរ៉ុប​ ​បារាំង និងអាល្លឺម៉ង់ និងធនាគារផ្សេងទៀតនៅអាស៊ី បាន​ប្រកាស​ជារឿយៗថា ប្រព័ន្ធ​ធនាគាររបស់ពួកគេ នៅតែមាន​ភាព​ធុន ​និង​រឹង​មាំ ព្រោះ​មាន​ច្បាប់​សុវត្ថិភាព ​ខុស​ពី​នៅ​សហរដ្ឋ​អាម៉េរិកបច្ចុប្បន្ន៕