ទីក្រុងប៉េកាំងបានលើកឡើងថា សហរដ្ឋអាម៉េរិកកំពុងលក់មុខខ្លួនឯង បន្ទាប់ពីទីភ្នាក់ងារស៊ើបការណ៍កំពូលរបស់ទីក្រុងវ៉ាស៊ីនតោនបានលើកឡើងថា ពួកគេជឿថាការរាតត្បាតនៃជំងឺកូវីដ ១៩ ភាគច្រើនបណ្តាលមកពីឧប្បត្តិហេតុមន្ទីរពិសោធន៍នៅទីក្រុងវូហានប្រទេសចិន។

ប្រធានការិយាល័យ​ស៊ើប​អង្កេត​សហព័ន្ធ (FBI) លោក Christopher Wray បានប្រាប់សារព័ត៌មាន Fox News កាលពីថ្ងៃអង្គារទី ២៨ ខែកុម្ភៈថា ការិយាល័យរបស់លោកបានវាយតម្លៃពីប្រភពដើមនៃជំងឺកូវីដ ១៩ គឺទំនងជាកើតឡើងដោយសារឧប្បត្តិហេតុមន្ទីរពិសោធន៍ ដែលមានសក្តានុពលនៅទីក្រុងវូហាន។

ការអត្ថាធិប្បាយរបស់លោក Wray ធ្វើឡើងបន្ទាប់ពីរបាយការណ៍មួយកាលពីដើមសប្តាហ៍នេះបានបង្ហាញថា ក្រសួងថាមពលសហរដ្ឋអាម៉េរិកបានកំណត់ថាការលេចធ្លាយមេរោគចេញពីមន្ទីរពិសោធន៍ចិនគឺជាមូលហេតុដែលទំនងបំផុតនៃការផ្ទុះឡើងនៃជំងឺរាតត្បាតកូវីដ ១៩។ ការរកឃើញរបស់នាយកដ្ឋានគឺមានសារសំខាន់ ព្រោះពួកគេធ្វើការជាមួយបណ្តាញមន្ទីរពិសោធន៍ជាតិ រួមទាំងមួយចំនួនដែលធ្វើការស្រាវជ្រាវជីវសាស្ត្រកម្រិតខ្ពស់។ ប៉ុន្តែទីភ្នាក់ងារផ្សេងទៀតនៅក្នុងសហគមន៍ស៊ើបការណ៍សម្ងាត់អាម៉េរិកជឿថា មេរោគនេះកើតចេញពីធម្មជាតិនៅក្នុងពិភពលោកប៉ុណ្ណោះ។

នៅក្នុងបទសម្ភាសកាលពីថ្ងៃអង្គារ លោក Wray ក៏បានចោទប្រកាន់រដ្ឋាភិបាលចិនពីការព្យាយាមបញ្ឈប់កិច្ចខិតខំប្រឹងប្រែងរបស់សហរដ្ឋអាម៉េរិកក្នុងការស៊ើបអង្កេតមូលហេតុនៃជំងឺរាតត្បាត។ លោក Wray បានលើកឡើងថា៖«រដ្ឋាភិបាលចិនបាននិងកំពុងប្រឹងប្រែងអស់ពីសមត្ថភាព ដើម្បីព្យាយាមរារាំង និងធ្វើឱ្យរំខានដល់ការងារនៅទីនេះ ការងារដែលយើងកំពុងធ្វើ ការងារដែលរដ្ឋាភិបាលសហរដ្ឋអាម៉េរិក និងដៃគូបរទេសជិតស្និទ្ធរបស់យើងកំពុងធ្វើ។ ហើយនោះជាអកុសលសម្រាប់មនុស្សគ្រប់គ្នា»។

មន្ត្រី​ចិន​បាន​បដិសេធ​យ៉ាង​ខឹងសម្បា​ចំពោះ​ការ​លើក​ឡើង​នេះ ដោយ​ហៅ​វា​ថា​ជា​យុទ្ធនាការ​លាបពណ៌​ប្រឆាំង​ក្រុង​ប៉េកាំង។ អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បានប្រាប់សន្និសីទសារព័ត៌មានមួយកាលពីថ្ងៃពុធទី ១ ខែមីនាថា សហរដ្ឋអាម៉េរិកបានជំរុញទ្រឹស្តីការលេចធ្លាយមេរោគចេញពីមន្ទីរពិសោធន៍ម្ដងទៀត ដែលនឹងមិនធ្វើឱ្យខូចកិត្តិយសដល់ប្រទេសចិននោះឡើយ ប៉ុន្តែវានឹងប៉ះពាល់ដល់មុខមាត់របស់ទីក្រុងវ៉ាស៊ីនតោនទៅវិញទេ។

នៅក្នុងសន្និសីទសារព័ត៌មានកាលពីថ្ងៃពុធ លោកស្រី ម៉ៅ បានរំលឹកឡើងវិញនូវការអះអាងរបស់ជនជាតិចិនដែលមានរយៈពេលយូរ និងមិនមានភស្តុតាងថា មេរោគនេះអាចលេចចេញពីមន្ទីរពិសោធន៍ស្រាវជ្រាវយោធាអាម៉េរិកនៅទីក្រុង Fort Detrick រដ្ឋ Maryland ។ លោកស្រីបានសង្កត់ធ្ងន់ថា៖«សហរដ្ឋអាម៉េរិកគួរតែគោរពតាមវិទ្យាសាស្ត្រ និងការពិត សហការជាមួយអង្គការសុខភាពពិភពលោកឱ្យបានឆាប់តាមដែលអាចធ្វើទៅបាន អញ្ជើញអ្នកជំនាញអន្តរជាតិឱ្យធ្វើការស្រាវជ្រាវតាមដានក្នុងប្រទេសរបស់ខ្លួន និងចែករំលែកលទ្ធផលស្រាវជ្រាវជាមួយសហគមន៍អន្តរជាតិ»។

សហគមន៍វិទ្យាសាស្ត្រមើលឃើញថាវាមានសារសំខាន់ណាស់ក្នុងការកំណត់ប្រភពដើមនៃជំងឺរាតត្បាតដើម្បីប្រយុទ្ធប្រឆាំងនឹងជំងឺឬសូម្បីតែការពារជំងឺបំប្លែងផ្សេងៗ៕