មនុស្ស ២៦ នាក់បានស្លាប់ និង ៨៥ នាក់បានរងរបួសបន្ទាប់ពីរថភ្លើងពីរបានបុកគ្នាពេញទំហឹងនៅក្នុងប្រទេសក្រិក កាលពីល្ងាចថ្ងៃអង្គារ ទី២៨ ខែកុម្ភៈ ខណៈមូលហេតុនៃការបុកគ្នានៅមិនទាន់ច្បាស់លាស់នៅឡើយ។
អភិបាលនៃតំបន់ Thessaly បាននិយាយថា រថភ្លើងដឹកអ្នកដំណើរដែលធ្វើដំណើរពីទីក្រុង Athens ទៅកាន់ទីក្រុង Thessaloniki ភាគខាងជើង បានបុកជាមួយនឹងរថភ្លើងដឹកទំនិញនៅខាងក្រៅទីក្រុង Larissa នៅកណ្តាលប្រទេសក្រិក។
អភិបាលខេត្តលោក Konstantinos Agorastos បានប្រាប់ទូរទស្សន៍ SKAI ដោយបន្ថែមថា ទូរថភ្លើងទាំងបួនផ្នែកខាងមុខនៃរថភ្លើងដឹកអ្នកដំណើរបានក្រឡាប់ ខណៈរថភ្លើងទាំងពីរបានបុកគ្នាយ៉ាងពេញទំហឹង។ លើសពីនេះ លោកបាននិយាយថា ទូរថភ្លើងពីរខាងមុខដែលបានបុកគ្នាគឺត្រូវបានបំផ្លាញស្ទើរតែទាំងស្រុង។
អ្នកដំណើរប្រហែល ២៥០ នាក់ត្រូវបានជម្លៀសដោយសុវត្ថិភាពទៅកាន់ទីក្រុង Thessaloniki តាមរយៈឡានក្រុង។ អ្នកដំណើរម្នាក់បានប្រាប់ទូរទស្សន៍រដ្ឋ ERT ថា លោកបានរត់គេចខ្លួនបន្ទាប់ពីបានបំបែកបង្អួចរថភ្លើងជាមួយនឹងវ៉ាលីរបស់លោក។ រីឯយុវជនម្នាក់ដែលត្រូវបានជម្លៀសទៅកាន់ស្ពានក្បែរនោះបានប្រាប់ទូរទស្សន៍ SKAI ថា៖ «មានការភ័យស្លន់ស្លោដ៏គួរឱ្យរន្ធត់នៅក្នុងទូរថភ្លើង ខណៈមនុស្សម្នាស្រែកយ៉ាងទ្រហឹង»។ ចំណែកឯអ្នកដំណើរម្នាក់ទៀតបានប្រាប់ទូរទស្សន៍រដ្ឋ ERT ថា ៖«វាប្រៀបដូចជាការរញ្ជួយដី» ។
ប្រព័ន្ធផ្សព្វផ្សាយទូរទសស្សន៍ SKAI បានបង្ហាញវីដេអូនៃទូរថភ្លើងដែលក្រឡាប់ រងការខូចខាតយ៉ាងធ្ងន់ធ្ងរជាមួយនឹងបង្អួចដែលខូច និងផ្សែងហុយទ្រលោម ក៏ដូចជាកំទេចកំទីខ្ទាតពាសពេញផ្លូវ ខណៈក្រុមអ្នកជួយសង្គ្រោះកំពុងកាន់ពិលក្នុងទូរថភ្លើងស្វែងរកអ្នកដំណើរដែលជាប់នៅក្នុងនោះ។
ជុំវិញឧប្បទ្ទវហេតុនេះ អ្នកនាំពាក្យកងពន្លត់អគ្គីភ័យ លោក Vassilis Varthakogiannis បាននិយាយនៅក្នុងសុន្ទរកថាតាមទូរទស្សន៍ថា ៖«ការជម្លៀសអ្នកដំណើរកំពុងដំណើរការក្នុងស្ថានភាពលំបាកខ្លាំង ដោយសារភាពធ្ងន់ធ្ងរនៃការប៉ះទង្គិចគ្នានៃរថភ្លើងទាំងពីរ»។
នៅព្រឹកព្រលឹមថ្ងៃពុធទី ១ ខែមីនា វីដេអូពីទូរទស្សន៍រដ្ឋ ERT បានបង្ហាញអ្នកជួយសង្គ្រោះដែលមានចង្កៀងមុខកំពុងស្វែងរកអ្នកនៅរស់។ ប្រព័ន្ធផ្សព្វផ្សាយក្នុងស្រុកបានរាយការណ៍ថាមានមនុស្សប្រហែល ៣៥០ នាក់បានធ្វើដំណើរលើរថភ្លើងដឹកអ្នកដំណើរ៕
