រាជធានីភ្នំពេញ៖ អ្នកជំនាញអះអាងថា ក្រុមសម្តែងគុនល្បុក្កតោចំនួន១២០០នាក់ នឹងសម្តែងទម្រង់ទស្សនីយភាពចំនួនពីរធំៗ ដើម្បីធ្វើឱ្យកាន់តែអស្ចារ្យនៅក្នុងពិធីបើក-បិទជាផ្លូវការព្រឹត្តិការណ៍កីឡាស៊ីហ្គេម លើកទី៣២ នាខែឧសភា ឆ្នាំ២០២៣ ដែលជាប្រវត្តិសាស្ត្រដំបូងរបស់ប្រទេសកម្ពុជា…។
ថ្លែងក្នុងឱកាសបើកវគ្គហ្វឹកហ្វឺនទម្រង់ល្បុក្កតោ ដើម្បីអបអរសាទរកម្មវិធីបើក-បិទ ក្នុងព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។ ក្រោមអធិបតីភាពឯកឧត្តម ឧត្តមសេនីយ៍ឯក ឌៀង សារុន នាយរងសេនាធិការចម្រុះ នៃកងយុទ្ធពលខេមរភូមិន្ទ និងមេបញ្ជាការរងប្រចាំការបញ្ជាការដ្ឋានអង្គរក្ស។ កាលពីថ្ងៃទី២៧ ខែកុម្ភៈ ឆ្នាំ២០២៣ លោក អ៊ួ តារា អគ្គលេខាធិការរងសហព័ន្ធកីឡាគុនល្បុក្កតោកម្ពុជា បានឱ្យដឹងថា ក្នុងពិធីបើក-បិទស៊ីហ្គេម ២០២៣ ក្រុមសម្តែងទស្សនីយ៍ភាពគុនល្បុក្កតោ ទាំងគ្រូបង្គោល និងសិក្ខាកាមទាំងអស់សហការជាមួយបញ្ជាការដ្ឋានអង្គរក្ស ដើម្បីរៀបចំសម្តែងទស្សនីយភាពដ៏អស្ចារ្យ និងមានទម្រង់ចំនួនពីរធំៗគឺទី១ ផែនទស្សនីយភាពរុងរឿងសម័យអង្គរ និងទី២ គុនល្បុក្កតោសម័យទំនើប ដែលបានធ្វើទំនើបកម្មគុនល្បុក្កតោទៅជាចង្វាក់ភ្លេងជាមួយ នឹងបច្ចេកវិទ្យាភ្លើង LED ដែល និងឆ្លុះបញ្ចាំងពីទស្សនីយភាពថ្មីមួយ នៃភាពរុងរឿងរបស់កម្ពុជា។ ដូច្នេះ លោក សង្ឃឹមថា តាមរយៈការហាត់សមនេះ នឹងបង្ហាញចេញនូវភាពអស្ចារ្យក្នុងពិធីបើកស៊ីហ្គេម។
លោកបញ្ជាក់ថា សម្រាប់ទស្សនីយភាពការសម្តែងគុនល្បុក្កតោ នឹងមានកម្លាំងមនុស្សចំនួន១២០០នាក់ ដែលនេះជាចំនួនតិច បើធៀបជាមួយចំនួនមនុស្សដែលបានចូលរួមសម្តែងក្នុងព្រឹត្តិការណ៍កីឡាជាតិលើកទី៣ កាលពីចុងឆ្នាំ២០២២កន្លងទៅ។ ប៉ុន្តែគុណភាព និងទម្រង់សម្តែងសម្រាប់ព្រឹត្តិការណ៍ស៊ីហ្គេម នាខែឧសភា ឆ្នាំ២០២៣ ខាងមុខនេះ លោកថា នឹងព្យាយាមធ្វើឱ្យល្អ និងអស្ចារ្យតាមគោលដៅដែលបានគ្រោងទុក។ ទន្ទឹមនឹងនោះ លោកបញ្ជាក់ថា ក្នុងកម្មវិធីបិទស៊ីហ្គេម ក៏នឹងមានកងកម្លាំង៦០០នាក់ សម្តែងទស្សនីយភាពមួយ «មហាព្រលឹងគុនល្បុក្កតោ»។
គួរបញ្ជាក់ថា គិតត្រឹមថ្ងៃទី២៨ ខែកុម្ភៈនេះ រហូតដល់ថ្ងៃទី០៥ ខែឧសភា ឆ្នាំ២០២៣ ដែលជាថ្ងៃបើកជាផ្លូវការនៃព្រឹត្តិការណ៍កីឡាស៊ីហ្គេម លើកទី៣២ គឺនៅសល់រយៈពេលត្រឹមតែ៦៦ថ្ងៃទៀតប៉ុណ្ណោះ និងឈានដល់កម្មវិធីបើក-បិទស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ៕
