រដ្ឋមន្ត្រីក្រសួងរតនាគារសហរដ្ឋអាម៉េរិក លោកស្រី ចេណេត យេឡេន (Janet Yellen) បានចោទប្រកាន់មន្ត្រីរុស្ស៊ីដែលមានវត្តមានក្នុងកិច្ចប្រជុំមេដឹកនាំហិរញ្ញវត្ថុនៃក្រុមប្រទេសមានសេដ្ឋកិច្ចរីកចម្រើនទាំង ២០ (G20) ថា បានចូលរួមក្នុងអំពើឃោរឃៅនៃការលុកលុយរបស់រុស្ស៊ីលើអ៊ុយក្រែន និងសម្រាប់ការខូចខាតដែលសង្រ្គាមបានបង្កឡើងដល់សេដ្ឋកិច្ចពិភពលោក។

នៅក្នុងសុន្ទរកថាបើកកិច្ចប្រជុំមួយក្នុងឱកាសខួបលើកទីមួយនៃការឈ្លានពានរបស់រុស្ស៊ី លោក យេឡេន បានអំពាវនាវដល់សមភាគី G20 ឱ្យបង្កើនកិច្ចខិតខំប្រឹងប្រែងរបស់ពួកគេទ្វេដង ដើម្បីគាំទ្រអ៊ុយក្រែន និងរឹតបណ្តឹងសមត្ថភាពបង្កសង្គ្រាមរបស់រុស្ស៊ី។ លោកស្រីបានលើកឡើងថា អាវុធរបស់ប្រធានាធិបតីរុស្ស៊ី វ្ល៉ាឌីមៀ ពូទីន ពោលគឺស្បៀងអាហារ និងថាមពល មិនត្រឹមតែប៉ះពាល់ដល់អ៊ុយក្រែនប៉ុណ្ណោះទេ ប៉ុន្តែវាបានបង្កផលវិបាកដល់សេដ្ឋកិច្ចពិភពលោកទាំងមូល ជាពិសេសប្រទេសកំពុងអភិវឌ្ឍ។

លោកស្រីបានថ្លែងយ៉ាងដូច្នេះថា៖ «ខ្ញុំសូមជំរុញឱ្យមន្រ្តីរុស្ស៊ី ដែលមានវត្តមាននៅក្នុងកិច្ចប្រជុំ G20 ឱ្យយល់ថា ការងាររបស់ពួកគេសម្រាប់វិមានក្រែមឡាំង ធ្វើឱ្យពួកគេចូលរួមចំណែកនៅក្នុងអំពើឃោរឃៅរបស់ លោក ពូទីន។ ពួកគេ​ត្រូវតែទទួល​ខុសត្រូវ​ចំពោះអាយុ​ជីវិត និងស្ថានភាពរស់នៅរបស់ប្រជាជន​អ៊ុយក្រែន ក៏ដូចជា​គ្រោះថ្នាក់​ដែល​បង្ក​ឡើង​នៅ​ទូទាំង​ពិភពលោកទាំងមូល»។

ប្រទេសរុស្ស៊ីបានបញ្ជូនមន្ត្រីសេដ្ឋកិច្ចជាន់ខ្ពស់ ជាតំណាងនៅក្នុងកិច្ចប្រជុំខាងលើ នេះបើយោងតាមមន្ត្រីរតនាគារសហរដ្ឋអាម៉េរិក។ ដោយឡែក រដ្ឋមន្ត្រីហិរញ្ញវត្ថុរុស្ស៊ីលោក អេនតុន ស៊ីលូនូវ (Anton Siluanov) និងទេសាភិបាលធនាគារកណ្តាល លោកស្រី អេលវីរ៉ា ណាប៊ីអូលីណា (Elvira Nabiullina) មិនបានចូលរួមក្នុងកិច្ចប្រជុំនេះទេ។

ជាចុងក្រោយ លោកស្រី យេឡេន បានបន្ថែមថា ការបញ្ចប់សង្រ្គាម គឺជាភាពចាំបាច់ខាងសីលធម៌ សម្រាប់សេដ្ឋកិច្ចពិភពលោក ហើយបានសង្កត់ធ្ងន់ម្ដងទៀតថា សហរដ្ឋអាម៉េរិក នឹងឈរក្បែរអ៊ុយក្រែនឱ្យបានយូរតាមដែលប្រទេសនេះត្រូវការ៕