ព្រះសីហនុ៖ នាវាទេសចរណ៍បរទេសមួយគ្រឿង ឈ្មោះ Nautica ផ្ទុកមនុស្សចម្រុះ​ជាតិសាសន៍ជិត ១០០០នាក់ ចេញ​ដំណើរមកពីប្រទេសថៃ បានចូលចត​នៅ​កំពង់ផែស្វយ័តក្រុងព្រះសីហនុ (ផែចាស់) ដោយសុវត្ថិភាព នៅព្រឹកថ្ងៃទី២២ ខែកុម្ភៈ ឆ្នាំ​២០២៣ ក្នុងគោលបំណងមកទស្សនាប្រទេសកម្ពុជា រយៈពេល១ថ្ងៃ។ នេះបើយោង​តាមនាយប៉ុស្តិ៍ន​គរបាលច្រកទ្វា​រកំ​ព​ង់ផែអន្តរជាតិខេត្តព្រះសីហនុ។

នាវានេះ មានប្រវែងបណ្តោយជាង១៨០ម៉ែត្រ ប្រវែងទទឹងជាង៣០ម៉ែ្រត ជម្រៅជាង៦ម៉ែត្រ ផ្ទុកមនុស្សចម្រុះ​ជាតិ​សាសន៍សរុបចំនួន៩៤២នាក់ ដែលមាននាវិកសរុបចំនួន ៤០៧នាក់ ស្រី៦៩នាក់ (៣៦សញ្ជាតិ) និងមានភ្ញៀវទេស​ចរសរុបចំនួន៥៣៥នាក់ ស្រី២៨៨នាក់ (២៤សញ្ជាតិ ) សញ្ជាតិដែលមានភ្ញៀវច្រើនជាងគេ គឺជនជាតិអាម៉េរិក ។ នាវានេះ នឹងចាកចេញទៅវិញនៅល្ងាចថ្ងៃដដែល និងបន្តដំណើរឆ្ពោះទៅប្រទេសវៀតណាម។ នេះជានាវាទី២ហើយ ដែលចូលចតនៅកំពង់ផែស្វយ័តក្រុងព្រះសីហនុ ដើម្បីដាក់ភ្ញៀវទេសចរចុះ​ទស្សនកិច្ចពីតំ​បន់មា​ន​សក្តានុពលធំៗ ក្នុងខេត្តព្រះសីហនុ បន្ទាប់ពីនាវាទេសចរណ៍ខ្នាតធំ ឈ្មោះ SEABOURN ENCORE បានចូលចត​នៅ​កំពង់ផែស្វយ័តក្រុងព្រះសីហនុ កាលពីថ្ងៃទី២៨ ខែមករា ឆ្នាំ២០២៣កន្លងទៅ ក្រោយការរាតត្បាតដោយជំងឺកូវីដ-១៩​។ 

នាវាទេសចរណ៍ខ្នាតធំ SEABOURN ENCORE មាននាវិកចំនួន ៤៤២នាក់ ស្រី៧២នាក់ មាន៤៨សញ្ជាតិ មានភ្ញៀវទេ​ស​ចរចំនួន ៣៣៨នាក់ ស្រី ១៦៧នាក់ មាន២២សញ្ជាតិ។ នាវានេះបានចេញមកពីប្រទេសថៃ ចូលមកប្រទេសកម្ពុជា និង​បន្តចេញទៅវិញ និងបន្តចាកចេញទៅកាន់ប្រទេសវៀតណាមវិញ។ នាវាទេសចរណ៍ខ្នាតធំ SEABOURN ENCORE មានសញ្ជាតិអាម៉េរិកច្រើនជាងគេ ចំនួន១២៧នាក់ អង់គ្លេសចំនួន៧៨នាក់ និងអូស្ត្រាលីចំនួន ៣៣នាក់៕