រាជធានីភ្នំពេញ៖ ថ្លែងនៅក្នុងពិធីជួបសំណេះសំណាល និងផ្តល់​​​រង្វាន់​​​​លើកទឹកចិត្តដល់សិស្សប្រលងជាប់និទ្ទេស A ឆ្នាំសិក្សា២០២២-២០២៣ ចំនួន១០៤៩នាក់ទូទាំងប្រទេស នៅមជ្ឈ​​មណ្ឌល​​​​​​​សន្និសីទ និងពិពណ៌អន្តរជាតិជ្រោយចង្វា នាព្រឹកថ្ងៃទី២ ខែកុម្ភៈ ឆ្នាំ២០២៣នេះ សម្តេចតេជោហ៊ុន សែន នាយករដ្ឋមន្ត្រី នៃកម្ពុជា បានមានប្រសាសន៍ថា ក្នុងចំណោមសិស្សនិស្សិត១,៥លាននាក់ ដែលរៀនជំនាញវិជ្ជាជីវៈ ក្នុងនោះសិស្សនិស្សិតពី២ទៅ៤ភាគរយ និងត្រូវរៀនជំនាញដូនតា...។

សម្តេចតេជោនាយករដ្ឋមន្ត្រី បានគូសបញ្ជាក់យ៉ាងដូច្នេះថា «ជំនាញវិជ្ជាជីវៈដូនតាដែលត្រូវបានបណ្តុះបណ្តាលនៅតាមទីកន្លែងមួយចំនួន ស្ថិតក្រោមការគ្រប់គ្រង់របស់ក្រសួងវប្បធម៌ ដើម្បីកុំឱ្យបាត់បង់។ ចំពោះមុខវិជ្ជា(វិជ្ជាជីវៈដូនតា)នេះ មានដូចជា ជាងចម្លាក់ ស្មូន ជាងគំនូរ តម្បាញ និងវិជ្ជាជីវៈមួយចំនួនទៀតដែលដូនតាបានបន្សល់ទុក កុំឱ្យបាត់បង់។ យើងមិនត្រឹមតែរៀនមុខវិជ្ជាថ្មីៗទេ តែមុខវិជ្ជាដូនតា ក៏ត្រូវតែរៀនដែរ ដើម្បីរក្សាអត្តសញ្ញាណផង និងដើម្បីរក្សាកេរមរតកដូនតារបស់យើងផង ហើយអាចយកមុខវិជ្ជាជីវៈជំនាញនោះ មកធ្វើជាមុខរបរចិញ្ចឹមជីវិតផងដែរ»។ បន្ថែមលើនេះ សម្តេចតេជោ ក៏បានបញ្ជាក់ពីការលើកទឹកចិត្តរបស់រាជរដ្ឋាភិបាល លើការចេញថ្លៃការសិក្សាជូនដល់សិស្សនិស្សិតដែលមានបំណងរៀនមុខជំនាញវិជ្ជាជីវៈដូនតា ដោយមិនតម្រូវឱ្យសិស្សនិស្សិតបង់ថ្លៃការសិក្សាឡើយ។

សូមបញ្ជាក់ផងដែរថា ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សម័យប្រឡង៥ធ្នូ ឆ្នាំ២០២២ ជាលទ្ធផល បេក្ខជនប្រឡងជាប់សរុប៩០ ៩៥០នាក់ ត្រូវជា៧២,៣៣ភាគរយ នៃចំនួនបេក្ខជនប្រឡងសរុប។ ក្នុងនោះសិស្សដែលទទួលបាននិទ្ទេសA ចំនួន១០៤៩នាក់, និទ្ទេសB មានចំនួន៧ ២៣២នាក់ និទ្ទេសC មានចំនួន១៩ ០៥៣នាក់ និទ្ទេសD មានចំនួន ៣១ ១៦៦នាក់ និងនិទ្ទេសE មានចំនួន៣២ ៤៥០នាក់..៕