(ស៊ីហ្គេម)៖ ក្នុងចំណោមកីឡាប្រកួតប្រជែងដណ្តើមមេដាយជាផ្លូវការចំនួន៣៨ប្រភេទ គឺមានកីឡាអត្តសញ្ញាណជាតិរបស់កម្ពុជាចំនួន៣ រួមមាន៖ កីឡាគុនល្បុក្កតោ កីឡាគុនខ្មែរ និងកីឡាអុកចត្រង្គ។ កីឡាអត្តសញ្ញាណជាតិទាំង៣ប្រភេទនេះគឺជាមរតកដូនតារបស់ខ្មែរសុទ្ធសាធតាំងពីរាប់ពាន់ឆ្នាំមកហើយ។
លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ (CAMSOC) បានឱ្យដឹងថា «កម្ពុជាធ្វើជាម្ចាស់ផ្ទះស៊ីហ្គេម យើងមានប្រភេទកីឡាជាអត្តសញ្ញាណជាតិរបស់យើងគឺគុនខ្មែរ ល្បុក្កតោ និងអុកចត្រង្គ។ ការងារនេះត្រូវបានក្រុមប្រឹក្សា (អាស៊ីអាគ្នេយ៍) ឯកភាពគ្នា និងយល់ព្រមរួចរាល់ ក្នុងការផ្តល់ឱ្យបុព្វសិទ្ធិដល់ម្ចាស់ផ្ទះកម្ពុជាក្នុងការរៀបចំ»។
ប្រការនេះពិតជាគួរទីមោទនភាពសម្រាប់កម្ពុជាក្នុងនាមជាម្ចាស់ផ្ទះលើកដំបូងបានប្រឹងប្រែង និងតស៊ូដាក់បញ្ចូលប្រភេទកីឡាអត្តសញ្ញាណជាតិរបស់ខ្លួនក្នុងព្រឹត្តិការណ៍កីឡាធំប្រចាំតំបន់អាស៊ាន។ ប្រទេសអាស៊ានមួយចំនួនដែលធ្លាប់ធ្វើម្ចាស់ផ្ទះកីឡាស៊ីហ្គេមកន្លងមកក៏បានដាក់ប្រភេទកីឡាអត្តសញ្ញាណជាតិរបស់ខ្លួនឱ្យប្រកួតជាផ្លូវការដែរ។
សម្រាប់ប្រភេទកីឡាគុនខ្មែរមានប្រទេសមួយចំនួនបានយល់ព្រមបញ្ជូនអត្តពលិករបស់ខ្លួនចូលរួមប្រកួតគុនខ្មែរគឺ វៀតណាម ឡាវ មីយ៉ាន់ម៉ា ម៉ាឡេស៊ី ហ្វីលីពីន និងឥណ្ឌូណេស៊ី បូករួមទាំងម្ចាស់ផ្ទះកម្ពុជាគឺមាន៦ប្រទេសដែលមានអត្តពលិកចូលរួមប្រកួតគុនខ្មែរនៅស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា។
លោក វ៉ាត់ ចំរើន បានឱ្យដឹងទៀតថា កម្ពុជាក្នុងនាមអ្នករៀបចំស៊ីហ្គេម មិនមានការព្រួយបារម្ភចំពោះការសម្រេចចិត្តពីប្រទេសថៃរឿងមិនបញ្ចូនអត្តពលិកមកនោះទេ ដោយនោះគឺជាសិទ្ធិរបស់គេ ហើយកម្ពុជាក៏នឹងត្រៀមរៀបចំការប្រកួត«គុនខ្មែរ»ឱ្យខាងតែបានដែរ។ បន្ថែមពីលើនេះ លោកអគ្គលេខាធិការ CAMSOC ក៏បានបង្ហើបដែរថា «ក្នុងព្រឹត្តិការណ៍កីឡាស៊ីហ្គេម ឆ្នាំ ២០២៥ ដែលប្រទេសថៃធ្វើជាម្ចាស់ផ្ទះនោះ កម្ពុជាក៏នឹងមិនបញ្ជូនអត្តពលិកទៅចូលរួមការប្រកួត «មួយថៃ» ដូចគ្នា»។ ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាទទួលរៀបចំធ្វើជាម្ចាស់ផ្ទះលើកដំបូងក្នុងប្រវត្តិសាស្ត្រត្រូវបានសម្រេចដាក់កីឡាចំនួន៣៨ប្រភេទ ស្មើនឹង ៦០៨វិញ្ញាសា និង១ប្រភេទកីឡាទៀតជាការប្រកួតសម្តែង..៕
