រាជធានីភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ដុតកម្ទេចចោលផលិតផលបារីអេឡិចត្រូនិក(E-Cigarette) ចំនួន ៧២០០ប្រអប់។

បារីអេឡិចត្រូនិក(E-Cigarette) ដែលត្រូវបានដុតកម្ទេចចោល មានចំនួន២៨៨កាតុង ស្មើនឹង ៧២០០ប្រអប់ ដែលត្រូវបានដកហូតកាលពីថ្ងៃទី៣ ខែវិច្ឆិកា ឆ្នាំ២០២២ ពីទីតាំងស្តុកទុកចែកចាយមួយកន្លែង តាមដីការសម្រេចរឹបអូសចាប់យកវត្ថុតាងទៅបំផ្លាញចោលលេខ០១៤ របស់ ឯកឧត្តមព្រះរាជអាជ្ញា អមសាលាដបូងរាជធានីភ្នំពេញ។ ការដុតកម្ទេចចោលនេះ ធ្វើឡើងនាព្រឹកថ្ងៃទី៣០ ខែធ្នូ ឆ្នាំ២០២២ នៅទីលានចាក់សំរាមខណ្ឌដង្កោ ដោយក.ប.ប សហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន ស្នងការនគរបាលរាជធានីភ្នំពេញ រដ្ឋបាលខណ្ឌដង្កោ មន្ទីរពាណិជ្ជកម្មរាជធានីភ្នំពេញ។

កន្លងទៅ ឯកឧត្ដម​ នាយឧត្តមសេនីយ៍​ មាស​ វិរិទ្ធ​ អគ្គលេខាធិការ​នៃអាជ្ញាធរជាតិប្រយុទ្ធប្រឆាំងគ្រឿងញៀន​ និងនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលបន្ទុកគ្រឿងញៀន ជំរុញឱ្យអាជ្ញាធរមានសមត្ថកិច្ចចាត់វិធានការជាបន្ទាន់បញ្ឈប់លែងឱ្យមានការប្រើប្រាស់បារីអេឡិចត្រូនិក ដើម្បីលើកកម្ពស់សុខមាលភាពប្រជាពលរដ្ឋ ជាពិសេសយុវជនដែលកំពុងឈ្លក់វង្វេងនឹងឧបករណ៍ញៀននាសម័យថ្មីនេះ។

ឧបករណ៍អេឡិចត្រូនិកមួយចំនួនមានរូបរាង្គដូចជាប៊ិក ឬUSB​ ធ្វើឱ្យយុវវ័យដែលប្រើប្រាស់វា មានអារម្មណ៍ថាទាន់សម័យ ប៉ុន្តែតាមការស្រាវជ្រាវបង្ហាញថា វាបង្កផលប៉ះពាល់ដូចជា ជំងឺសួតធ្ងន់ធ្ងរ (ដោយសារភាគល្អិតចូលជ្រៅក្នុងសួត) បណ្តាលឱ្យញៀន បង្កជំងឺមហារីក (ដោយសារលោហៈធ្ងន់) ប៉ះពាល់ដល់ការសិក្សា និងការផ្ចង់អារម្មណ៍។ 

បារីអេឡិចត្រូនិក ជាផលិតផលគ្រោះថ្នាក់ ផ្ទុកជាតិនីកូទីន ដែលធ្វើឱ្យអ្នកប្រើប្រាស់ញៀនខ្លាំង ជាពិសេស ចំពោះកុមារ និងយុវជន បង្កឱ្យមានការខូចខាតធ្ងន់ធ្ងរដល់ការលូតលាស់ខួរក្បាល ធ្វើឱ្យមានការចង់ចាំមិនល្អ ភ្លេចភ្លាំង ពិបាកក្នុងការផ្ចង់អារម្មណ៍ ដែលនាំឱ្យប៉ះពាល់ដល់សមត្ថភាពការងារ និងរៀនសូត្រ។ ចំណែក​សារធាតុផ្សេងទៀត ដូចជា ប្រូពីលែន គ្លីសេរីនគ្លីកូល វាធ្វើឱ្យប៉ះពាល់យ៉ាងធ្ងន់ធ្ងរដល់សួត និងបេះដូង។​ តាមការស្រាវជ្រាវប្រមូលទិន្នន័យរយៈពេល៦ខែរបស់មជ្ឈមណ្ឌលCDC នៃសហរដ្ឋអាម៉េរិក (ដែលធ្វើចាប់ពីខែកញ្ញា ឆ្នាំ២០១៩ ដល់ខែកុម្ភៈ ឆ្នាំ២០២០) បានបង្ហាញថា ពលរដ្ឋអាម៉េរិកចំនួន២៨០៧នាក់បានឈឺ និង៦៨នាក់បានស្លាប់ដោយសារជំងឺសួតដែលបណ្ដាលមកពីការប្រើប្រាស់បារីអេឡិចត្រូនិក។

សូមជម្រាបថា រាជរដ្ឋាភិបាលកម្ពុជា តាមរយៈអាជ្ញាធរជាតិប្រយុទ្ធប្រឆាំងគ្រឿងញៀន បានចេញសេចក្តីណែនាំស្ដីពី ការចាត់វិធានការបង្ការ ទប់ស្កាត់ការនាំចូល ការជួញដូរ ការធ្វើអាជីវកម្ម និងការប្រើប្រាស់ផលិតផល អេចឈ៍ ធី ភី (HTPs) ក្នុងព្រះរាជាណាចក្រកម្ពុជា កាលពីថ្ងៃទី១៨​ ខែមីនា ឆ្នាំ២០២១ កន្លងទៅ៕