រាជធានីភ្នំពេញ៖ ក្រសួងអភិវឌ្ឍន៍ជនបទ បានត្រួតពិនិត្យវាយតម្លៃ និងបញ្ចប់សុពលភាព លើការងារថែទាំខួបផ្លូវចំនួន ០៣គម្រោង ក្នុងខេត្តចំនួន៣ផ្សេងៗគ្នា នាថ្ងៃទី២៣ ខែធ្នូ ឆ្នាំ២០២២ នេះ។
ឯកឧត្តម ហួត សារឹម អនុរដ្ឋលេខាធិការ និងឯកឧត្តម យឺន សូផល អនុរដ្ឋលេខាធិការ បានដឹកនាំគណៈកម្មការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុបានអញ្ជើញទៅត្រួតពិនិត្យ វាយតម្លៃ និងបញ្ចប់សុពលភាព លើការងារថែទាំខួបផ្លូវចំនួន ០៣គម្រោង រួមមាន៖
- គម្រោងទី១ ៖ ការងារថែទាំខួបផ្លូវដោយក្រាលល្បាយថ្មភ្នំចំនួន ០១ខ្សែ ប្រវែង ១ ៦០០ម៉ែត្រ ទទឹងខ្នងលើ ៧មម៉ែត្រ និងសាងសង់លូមូលចំនួន ០១កន្លែងស្ថិតនៅភូមិជ័យ ឃុំជ័យធំ ស្រុកខ្សាច់កណ្តាល ខេត្តកណ្តាល ( វាយតម្លៃ ១០០% )។
- គម្រោងទី២ ៖ ការងារថែទាំខួបផ្លូវកំណាត់ផ្លូវសំរោង-តាលោ ដោយក្រាលកៅស៊ូ DBST ប្រវែងសរុប ៤ ៣៥០ម៉ែត្រ រ ទទឹងខ្នងលើ ៥ម៉ែត្រ ស្ថិតក្នុងឃុំសំរោង ឃុំផ្ទះរុង និងឃុំតាលោ ស្រុកភ្នំក្រវ៉ាញ និងស្រុកតាលោសែនជ័យ ខេត្តពោធិ៍សាត់ (បញ្ចប់សុពលភាព) ។
- គម្រោងទី៣ ៖ ការងារថែទាំខួបផ្លូវក្រាលកៅស៊ូ DBST ចំនួន ០១ខ្សែ ( ១០កំណាត់ ) ប្រវែងសរុប ៣ ៨១០ម៉ែត្រ ទទឹងខ្នងលើ ៦ម៉ែត្រ ស្ថិតនៅឃុំស្វាយនិងឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ( បញ្ចប់សុពលភាព ) ។
ក្រសួងអភិវឌ្ឍន៍ជនបទ បានបញ្ជាក់ថា បន្ទាប់ពីបានពិនិត្យរួចមកគណៈកម្មការ បានសម្រេចចំពោះគម្រោងទី១ ទទួលយក ១០០% និងគម្រោងទី២ និងទី៣ ទទួលយកដោយបញ្ចប់រយៈពេលធានាសុពលភាពជាស្ថាបពរ៕
