ភ្នំពេញ៖ កីឡាចំនួន ១៣ ប្រភេទ រួមជាមួយកីឡាសម្ដែង មួយប្រភេទ ត្រូវបានអនុម័តរួចរាល់ហើយ សម្រាប់​​ការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជាធ្វើម្ចាស់ផ្ទះ។ នេះបើតាមការបញ្ជាក់របស់លោក យី វាសនា អគ្គលេខាធិការរងនៃគណៈកម្មាធិការជាតិរៀបចំការប្រកួតកីឡាអាស៊ានប៉ារ៉ាហ្គេម លើកទី១២ (CAMAPGOC)។

លោក យី វាសនា បានឱ្យដឹងថា កិច្ចប្រជុំក្រុមប្រឹក្សាអភិបាល កីឡាជនពិការអាស៊ាន នៅឥណ្ឌូណេស៊ី បានអនុម័តកីឡាចំនួន១២ ប្រភេទ តែមានកីឡា១ប្រភេទត្រូវដាក់បន្ថែម ហើយពេលនេះ បានឯកភាពលើកីឡា១ប្រភេទទៀត ដែលនាំឱ្យមានការសម្រេចចុងក្រោយ គឺកំណត់យកកីឡា ១៣ ប្រភេទ សម្រាប់ការប្រកួតកីឡាអាស៊ានប៉ារ៉ាហ្គេម ឆ្នាំ២០២៣ រួមទាំងកីឡាសម្ដែង ១ (Demonstration) ដែលកំណត់យកកីឡាអេឡិចត្រូនិក (E-Sports) តែមិនរាប់បញ្ចូលមេដាយនោះទេ។

កីឡាទាំង ១៣ ប្រភេទ ដែលត្រូវបានអនុម័តរួចរាល់ រួមមានកីឡាអត្តពលកម្មជនពិការ, កីឡាហែលទឹកជនពិការ, កីឡាវាយសីជនពិការ, កីឡាបាល់ទាត់ ៥ម្ខាង, កីឡាបាល់ទាត់ ៧ម្ខាង, កីឡាលើកទម្ងន់ជនពិការ, កីឡាបូស្យាជនពិការ, កីឡាវាយកូនឃ្លីលើតុជនពិការ, កីឡាយូដូជនពិការ, កីឡាបាល់បោះជិះរទេះជនពិការ, កីឡាបាល់បោះជនពិការភ្នែក, កីឡាបាល់ទះអង្គុយ និងកីឡាអុក។

លោកថា «១៣ប្រភេទកីឡានេះ បានសម្រេចរួចហើយ ក្នុងនោះ យើងកំពុងតែត្រៀមលក្ខណៈ ដើម្បីរៀបចំឱ្យចេញ​ជាព្រឹត្តិ​ការ​ណ៍​កីឡា ឬជាវិញ្ញាសា តាមប្រភេទកីឡានីមួយៗ​។ បើតាមការគ្រោងទុក ជាបទពិសោធ នៅឥណ្ឌូណេស៊ី វិញ្ញាសាទាំងអស់ មានប្រមាណជាង ៤០០។ កាលពីអាស៊ានប៉ារ៉ាហ្គេម លើកទី១១ នៅឥណ្ឌូណេស៊ី គឺមាន ១៤ ប្រភេទកីឡា ហើយនៅកម្ពុជា មាន ១៣ ប្រភេទកីឡា។ អ៊ីចឹង វិញ្ញាសាដែលយើងគ្រោងរៀបចំ មិនទាន់កំណត់ជាក់លាក់នោះទេ ប៉ុន្ដែប្រហាក់ប្រហែលជាង ៤០០ វិញ្ញាសា»។

ចំពោះដំណើរការចុះឈ្មោះចូលរួមវិញ មាន ៣ ដំណាក់កាល ក្នុងដំណាក់កាលទី១ បានបញ្ចប់ហើយ គឺជាការចុះឈ្មោះប្រទេស ទៅតាមប្រភេទកីឡានីមួយៗ។ រីឯដំណាក់កាលទី២ គឺជាការចុះឈ្មោះ ចំនួនប្រតិភូមន្ដ្រី និងកីឡាករ កីឡាការិនី សរុបប៉ុន្មាននាក់ ដែលត្រូវបញ្ចប់ត្រឹមខែមករា ឆ្នាំ២០២៣ និងដំណាក់កាលទី៣ គឺការចុះឈ្មោះ តាមឯកត្តបុគ្គលនីមួយៗ៕