ជប៉ុនបានបញ្ជាក់ពីការផ្លាស់ប្ដូរគោលនយោបាយថាមពលនុយក្លេអ៊ែរដ៏សំខាន់មួយកាលពីថ្ងៃសុក្រទី ១៦ ខែធ្នូ ដើម្បីដោះស្រាយវិបត្តិថាមពលជាងមួយទសវត្សរ៍ បន្ទាប់ពីគ្រោះមហន្តរាយនុយក្លេអ៊ែរ Fukushima ឆ្នាំ ២០១១ បានជំរុញឱ្យប្រទេសនេះឈប់ដំណើរការម៉ាស៊ីនរ៉េអាក់ទ័រភាគច្រើនរបស់ខ្លួន។

មតិសាធារណៈមានអរិភាពចំពោះថាមពលនុយក្លេអ៊ែរ ចាប់តាំងពីការរញ្ជួយដីដ៏ធំ និងរលកយក្សស៊ូណាមិ បានបង្កឱ្យមានគ្រោះមហន្តរាយនៅរោងចក្រថាមពល Fukushima Daiichi ប៉ុន្តែវាបានផ្លាស់ប្ដូរដោយសារតែការកើនឡើងនៃថ្លៃថាមពលចំពេលមានសង្រ្គាមអូសបន្លាយក្នុងប្រទេសអ៊ុយក្រែន និងការខ្វះខាតថាមពលម្ដងហើយម្ដងទៀតទាំងរដូវក្ដៅ និងរដូវរងា។

ក្រសួងឧស្សាហកម្ម ដែលពីមុនបានបញ្ជាក់ថា ប្រទេសជប៉ុនដែលងាយនឹងរញ្ជួយដី ដូច្នេះខ្លួនមិនមានគម្រោងសាងសង់ម៉ាស៊ីនរ៉េអាក់ទ័រថ្មី ប៉ុន្តែ​ ឥឡូវនេះនឹងធ្វើការលើការពង្រីកម៉ាស៊ីនរ៉េអាក់ទ័រថ្មី។ ការផ្លាស់ប្ដូរគោលនយោបាយដ៏ស្រឡះកើតឡើងបន្ទាប់ពីនាយករដ្ឋមន្ត្រី លោក ហ្វូមីអូ គីស៊ីដា (Fumio Kishida) បាននិយាយកាលពីខែសីហាថា ប្រទេសជប៉ុននឹងពិនិត្យមើលការអភិវឌ្ឍម៉ាស៊ីនរ៉េអាក់ទ័រជំនាន់ក្រោយ ដោយណែនាំក្រសួងឧស្សាហកម្មឱ្យរៀបចំផែនការគោលនយោបាយដើម្បីពង្រីកការប្រើប្រាស់ថាមពលនុយក្លេអ៊ែរនៅចុងឆ្នាំនេះ។

រដ្ឋាភិបាលនៅទូទាំងទ្វីបអឺរ៉ុប និងអាស៊ីក៏កំពុងពង្រីករយៈពេលការប្រើនៃកងនាវានុយក្លេអ៊ែរដែលមានវ័យចំណាស់របស់ពួកគេផងដែរ ដោយចាប់ផ្តើមម៉ាស៊ីនរ៉េអាក់ទ័រឡើងវិញ និងបន្តគម្រោងដែលត្រូវបានទុកចោលបន្ទាប់ពីគ្រោះមហន្តរាយហ្វូគូស៊ីម៉ា។

នៅក្រោមផែនការថាមពលយុទ្ធសាស្ត្រដែលត្រូវបានអនុម័តដោយគណៈរដ្ឋមន្ត្រីកាលពីឆ្នាំមុន ប្រទេសជប៉ុនមានបំណងកាត់បន្ថយការពឹងផ្អែករបស់ខ្លួនលើថាមពលនុយក្លេអ៊ែរតាមដែលអាចធ្វើទៅបាន។ ប៉ុន្តែគោលនយោបាយថ្មីដែលត្រូវបានអនុម័តដោយក្រុមអ្នកជំនាញនៅក្រោមក្រសួងឧស្សាហកម្មនឹងអនុញ្ញាតឱ្យម៉ាស៊ីនរ៉េអាក់ទ័រនុយក្លេអ៊ែរដែលមានស្រាប់អាចដំណើរការលើសពីដែនកំណត់បច្ចុប្បន្ននៃ ៦០ ឆ្នាំក៏ដូចជាគាំទ្រដល់ការអភិវឌ្ឍថ្មី។ មន្ត្រីម្នាក់នៅក្រសួងឧស្សាហកម្មបាននិយាយថា ព័ត៌មានលម្អិតបន្ថែមនឹងត្រូវពិភាក្សានៅក្នុងសភានៅឆ្នាំក្រោយ៕