(បន្ទាយមានជ័យ)៖ ការប្រមូលផលស្រូវរដូវវស្សារបស់ប្រជាកសិករ នារដូវប្រមូលផលខាងមុខនេះ ប្រឈមនឹងការធ្លាក់ចុះតម្លៃ ខណៈដែលតម្លៃផលិតកម្ម និងធាតុចូលកសិកម្មមានការកើនឡើង ដូចជា ប្រេងឥន្ទនៈ ជីគីមី និងថ្នាំកសិកម្មបានហក់ ឡើងថ្លៃខ្ពស់ទ្វេដង នៅថ្ងៃទី១៨ ខែវិច្ឆិការ ឆ្នាំ២០២២ អភិបាលខេត្តបន្ទាយមានជ័យ ដឹកនាំមន្ត្រីជំនាញចុះ ពិនិត្យប្រជាកសិករដែលប្រមូលផលស្រូវ ដោយតម្រូវឱ្យឈ្មួញកណ្តាលទិញ១តោនតម្លៃ១លានរៀល។
លោក ប៉ុក ឡៃជី ប្រធានមន្ទីរពាណិជ្ជកម្មខេត្តបន្ទាយមានជ័យ បានប្រាប់ថា ក្រោយមានបាតុភាពដែលឈ្មួញកណ្តាលទិញស្រូវពីប្រជាកសិករបញ្ចុះតម្លៃ ធ្វើឱ្យពួកគាត់បាក់ទឹកចិត្ត លែងចង់បង្កបង្កើនផលស្រូវតទៅទៀត ព្រោះឈ្មួញកណ្តាល ទិញស្រូវក្នុងតម្លៃថោក គឺមិនអាចឱ្យគាត់រួចដើមធ្វើផង។
ប្រធានមន្ទីរបន្ថែមថា ក្រោយទទួលបានព័ត៌មាននេះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានដឹកនាំមន្ត្រីមន្ទីរពាណិជ្ជកម្មខេត្ត និងអាជ្ញាធរមូលដ្ឋាន ចុះពិនិត្យជាក់ស្តែងនៅស្រុកស្វាយចេក ស្រុកថ្មពួក ស្រុកអូរជ្រៅ ស្រុកម៉ាឡៃដែលកំពុងប្រមូលផលស្រូវ។ បន្ទាប់ពីចុះទៅផ្ទាល់ ហើយប្រមូលព័ត៌មាន ប្រជាកសិករបញ្ជាក់ថា ប្រភេទស្រូវផ្កាម្លិៈ ដែលជាស្រូវក្រអូបមួយប្រភេទ ឈ្នួញកណ្តាលទិញដាក់តាមរោងម៉ាស៊ីន ដើម្បីផ្គត់ផ្គង់នាំចេញទៅក្រៅប្រទេស គឺឈ្មួញហ៊ានឱ្យតម្លៃពី៨៦ម៉ឺនរៀលទៅ៩០ម៉ឺនរៀលប៉ុណ្ណោះក្នុង១តោន។
បើតាមលោក ប៉ុក ឡៃជី បញ្ជាក់ថា ក្រោយពេលឯកឧត្តម អភិបាលខេត្ត ចុះពិនិត្យប្រជាកសិករប្រមូលផលស្រូវតាមបណ្តាស្រុកជាប់ជាយដែន បញ្ជារឱ្យមន្ទីរជំនាញ តម្រូវឈ្មួញកណ្តាលទិញស្រូវប្រជាកសិករដែលប្រភេទស្រូវផ្កាម្លិៈក្នុង១តោនតម្លៃមិនទាបជាង១ លានរៀលនោះទេ។ ហើយនេះជាការលើកទឹកចិត្តប្រជាកសិករ ឱ្យសមស្របនិងតម្លៃទីផ្សារស្រូវ។
ជាមួយគ្នានេះដែរ មន្ទីរជំនាញជំរុញឱ្យអាជីរករ ឈ្មួញទិញស្រូវ និងម្ចាស់រោងម៉ាស៊ីនកិនស្រូវទាំងអស់ ជួយសម្របសម្រួលក្នុងការទិញស្រូវប្រជាកសិករឱ្យបានល្អប្រសើរ ជៀសវាងការទិញទម្លាក់ថ្លៃ។ ហើយអាជ្ញាធរមូលដ្ឋាន និងអ្នកពាក់ព័ន្ធសូមចូលរួមជួយពិនិត្យ និងសម្របសម្រួលជាមួយឈ្មូញ និងប្រជាកសិករក្នុងដែនសមត្ថកិច្ចរបស់ខ្លួន រកវិធីផ្សេងៗដើម្បីបង្កភាពងាយស្រួលក្នុងទិញ ប្រមូលផ្តុំទិញ និងការដឹកជញ្ជូនជាដើម៕ រាយការណ៍៖ ឈុន មករា, កែសម្រួល៖ ភោគ រ៉ន
