(គុនខ្មែរ)៖ ប្រសិនបើមិនមានការប្រែប្រួលទេ អ្នកលេងពូថៅដៃ ធឿន ធារ៉ា នឹងត្រូវឡើងទៅតតាំងជាមួយកី​ឡាករ​ជើងខ្លាំង​៣​រូប​ផ្សេង​ទៀត មកពីអឺរ៉ុបពីររូប និងកីឡាករថៃ​ សៃយុគ នៅសង្វៀន ថៃហ្វៃស៍ នាថ្ងៃទី២០ ខែវិច្ឆិកា​ខាងមុខនេះ​ ដើម្បីប្រជែងឡើងទៅប្រកួតដណ្តើមខ្សែរក្រវាត់ រួមជាមួយពានរង្វាន់ខ្នាត់ធំប្រចាំសង្វៀននេះ ខណៈលោកគ្រូ​ អេ​ ភូថង​ រំពឹងខ្ពស់លើ ធឿន ធារ៉ា ថាអាចយកខ្សែក្រវាត់នៅសង្វៀន ថៃហ្វៃស៍បានមិនខាន...។

លោក អេ ភូថង ដែលជាគ្រូបង្ហាត់ផ្ទាល់របស់ កីឡាករ ធឿន ធារ៉ា បានបង្ហោះវីដេអូមួយ​នៅក្នុងទំព័រហ្វេ​ស​បុក​ក្លឹប​របស់លោក​ថា លោកជឿជាក់លើកូនសិស្ស គឺអាចនឹងធ្វើបានល្អនៅក្នុងការប្រកួតដ៏សំខាន់មួយនេះ​។ លោក អេ ភូថង បានបញ្ចាក់យ៉ាងដូច្នេះថា៖ «ទៅលើកនេះ មិនមែនទៅកំដរគេទេ គឺទៅវ៉ៃតែម្ដង វ៉ៃឱ្យអស់ពីសមត្ថភាព ដើម្បីដណ្តើមខ្សែក្រវាត់ នឹងពានរង្វាន់ខ្នាតធំមួយរបស់ថៃហ្វៃស៍»​។

លោកគ្រូ អេ ភូថង បន្ថែមថា ដោយសារការប្រកួតនេះ ជាការប្រកួតចាប់គូ អ៊ីចឹង..ខ្ញុំចង់ឱ្យធារ៉ា ប៉ះសៃយុគមុន ព្រោះដល់ពេលដែលយើងប៉ះសៃយុគមុន យើងត្រៀមលក្ខណៈ ទៅហើយអត់ទាន់ឈឺ អាហ្នឹងវៃគ្នាល្អ១០០ភាគរយតែម្ដង ឯធារ៉ាក៏មិនមែនកីឡាថយវ៉ៃដែរ ខ្ញុំថាពីណាភ្លាត់ស្នៀតមុន ដឹងចាញ់ហើយ។ 

ជាមួយគ្នានេះ លោក​ អេ ភូថង បានលើកពីចំណុចខ្សោយរបស់ កីឡាករ ធឿន ធារ៉ា ផងដែរ ប៉ុន្តែលោកកំពុងពង្រឹងបន្ថែមទៀត​ ព្រោះកីឡាករដែលត្រូវប្រកួតនៅសង្វៀន ថៃហ្វៃស៍ទាំងអស់ គេយកតែកីឡាករល្អមកប៉ុណ្ណោះ ចឹងយើងត្រូវពង្រឹងសមត្ថភាពបន្ថែមដល់គាត់​។ លោក អេ ភូថង បញ្ជាក់ថា៖ « ធារ៉ា..គាត់ហ្វឹកហាត់បាន២សប្តាហ៍ពេញ ចឹងការត្រៀមខ្លួន គឺគ្រប់គ្រាន់ហើយ នៅឡើយតែពេលប្រកួត​ គាត់មានឆន្ទៈប្រកួតឬអត់ ប៉ុន្តែ ធារ៉ា ជាកីឡាករដើរចូលវាយ»​ ដូច្នេះដឹងតែល្អមើលមិនខាន។

សូមបញ្ជាក់ផងដែរថា កីឡាករ ធឿន ធារ៉ា នៅថ្ងៃទី១៧ ខែវិច្ឆិកា​ ឆ្នាំ២០២២ ស្អែកនេះ នឹងចេញដំណើរទៅប្រទេសថៃ ដើម្បីត្រៀមការប្រកួតនៅ ថៃហ្វៃស៍ [Thai Fight ] នា​ថ្ងៃ​ទី២០ ខែ​វិច្ឆិកា។​ កីឡាករ ធឿន ធារ៉ា ត្រូវឡើងទៅតតាំងនឹងកីឡាករថៃ នឹងកីឡាករបរទេស២រូបផ្សេងទៀត នៅក្នុងព្រឹត្តិការណ៍ដណ្តើមខ្សែក្រវាត់ ហើយបើ ធឿន ធារ៉ា ឈ្នះនៅជំទី១ រូបគេនឹងមានឱកាសឡើងទៅប្រកួតបន្ត ដើម្បីដណ្តើមខ្សែរក្រវាត់ តែបើចាញ់ គឺធ្លាក់ត្រឹមវគ្គដំបូងនេះ​។ ដូច្នេះ យើងរង់ចាំមើលថា អ្នកលេងពូថៅដៃរបស់គុនខ្មែរ អាចយកឈ្នះជើងខ្លាំងមកពីបរទេស រួមទាំងកីឡាករម្ចាស់ផ្ទះបាន ឬយ៉ាងណា ខណៈគ្រូបង្វឹក បានបង្ហាញជំនឿចិត្ត ថាអាចនឹងឡើងទៅវគ្គបន្តដណ្តើមយកខ្សែក្រវាត់...៕