ខេត្តបាត់ដំបង៖ ខណៈការប្រជុំកំពូលអាស៊ាន ដែលកម្ពុជានឹងរៀបចំចាប់ពីសប្តាហ៍ក្រោយតទៅ សម្តេចក្រឡាហោម ស ខេង ឧបនាយករដ្ឋ មន្ត្រីរដ្ឋមន្ត្រីក្រសួងមហាផ្ទៃ ចាត់ទុកកិច្ចប្រជុំកំពូលអាស៊ាន គឺជាការនាំមាស នាំពេជ្រ និងនាំប្រាក់មកឱ្យប្រជាជនកម្ពុជាគ្រប់ៗរូប...។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សា នៃវិទ្យាល័យសម្តេចតេជោ ហ៊ុន សែន ភ្នំសំពៅ នាថ្ងៃទី២ ខែវិច្ឆិកា ឆ្នាំ២០២២ នេះ សម្តេចក្រឡាហោម ស ខេង បានបញ្ជាក់ថា ចាប់ពីសប្តាហ៍ក្រោយតទៅ កម្ពុជានឹងរៀបចំកិច្ចប្រជុំកំពូលអាស៊ាន គឺជាសមាគមបណ្តាប្រទេសអាស៊ីប៉ែកអាគ្នេយ៍ ដែលមាន១០ប្រទេស ជាសមាជិក ហើយកម្ពុជាធ្វើជាប្រធានប្តូរវេន ដោយមានការចូលរួមពីថ្នាក់ដឹកនាំពិភពលោក ដែលជាដៃគូអាស៊ាន ដូចជាសហរដ្ឋអាម៉េរិក ចិន ជប៉ុន កូរ៉េ អូស្ត្រាលី ញ៉ូហ្សឺឡែន រុស្ស៊ី និងបណ្តាប្រទេសមួយចំនួនទៀតនៅតំបន់អឺរ៉ុប។
សម្តេចក្រឡាហោម បានចាត់ទុកការប្រជុំកំពូលអាស៊ាននេះ គឺជាព្រឹត្តិការណ៍ធំសម្រាប់ប្រទេសកម្ពុជា បើសិនជាប្រទេសយើងនៅមានសង្រ្គាម ប្រទេសអស្ថិរភាព មានភេរវកម្ម សន្តិសុខសណ្តាប់ធ្នាប់សាធារណៈមិនល្អ គឺគេមិនមកនោះទេ។ សម្តេច ស ខេង បន្ថែមថា ការណ៍ដែលប្រតិភូជាថ្នាក់ដឹកនាំពិភពលោកមកយ៉ាងដូច្នេះ ប្រៀបបាននឹងការនាំមាស នាំពេជ្រ នាំប្រាក់យកមកឱ្យប្រជាពលរដ្ឋយើង មានន័យថា មិនមែននាំមកឱ្យថ្នាក់ដឹកនាំរាជរដ្ឋាភិបាល ឬថ្នាក់ដឹកនាំជាតិសំខាន់ៗប៉ុន្មាននាក់នោះទេ ក្នុងន័យនេះ យើងត្រូវចូលរួមស្វាគមន៍ភ្ញៀវ ដែលបានមកកម្ពុជា បើទោះបីជាភ្ញៀវមិនបានមកកាន់ខេត្តបាត់ដំបងយ៉ាងណាក៏ដោយ តែក្នុងឋានៈជាប្រជាជនកម្ពុជា យើងត្រូវប្រកាន់យកឥរិយាបថថ្លៃថ្នូរ ប្រកបដោយការទទួលស្វាគមន៍ ភាពរាក់ទាក់ចំពោះភ្ញៀវ ដោយមិនធ្វើអ្វីដែលនាំឱ្យគ្មានសណ្តាប់ធ្នាប់នោះឡើយ៕
