(ក្រុងបាវិត)៖ បន្ទាប់ពីមានសេចក្តីរាយការណ៍ថា មានម្ចាស់កាស៊ីណូមួយចំនួននៅក្នុងអាគារមជ្ឈមណ្ឌលពាណិជ្ជកម្មទីក្រុងហេងហេង ថាបានបង្ខាំងមនុស្សខុសច្បាប់ ដោយថៅកែជនជាតិចិន និងវៀតណាម រហូតមានការធ្វើទារុណកម្មលើពលករខុសច្បាប់ ការបង្ខំស្ត្រីជនជាតិវៀតណាមវ័យក្មេងឱ្យបម្រើសេវាកម្មផ្លូវភេទ និងបានលក់ដូរពួកនាងពីក្រុមហ៊ុនមួយទៅក្រុមហ៊ុនមួយផ្សេងទៀត។ ដំណឹងនេះ ត្រូវបានលោកអធិការនគរបាលក្រុងបាវិតទាត់ចោល និងថាមិនដែលទទួលបានដំណឹងខាងលើនេះឡើយ។ យ៉ាងណា កាលពីម្សិលមិញ សម្តេចក្រឡាហោម ស ខេង បញ្ជាក់ថា មានការរកឃើញពលករខុសច្បាប់ជិត៣០០នាក់ ចូលធ្វើការខុសច្បាប់នៅកាស៊ីណូអនឡាញ នៅក្រុងបាវិត...។
ថ្លែងប្រាប់ SBM News កាលពីរសៀលថ្ងៃទី២៧ ខែតុលា ឆ្នាំ២០២២ លោកវរៈសេនីយ៍ទោ អែម សុវណ្ណារិទ្ធ អធិការ នៃអធិការដ្ឋាននគរបាលក្រុងបាវិត បានឱ្យដឹងថា លោកមិនបានចុះទៅអង្កេត ឬទៅត្រួតពិនិត្យនៅបណ្តុំអាគារនៃមជ្ឈមណ្ឌលពាណិជ្ជកម្មទីក្រុងហេងហេងនោះទេ ព្រោះបើគ្មានច្បាប់អនុញ្ញាត លោកគ្មានសិទ្ធិចេញចូលទីតាំងក្រុមហ៊ុនឯកជននោះឡើយ។ លោកបញ្ជាក់ថា «ខ្ញុំមិនដឹងថា ខាងសារព័ត៌មានទាំងនោះ បានព័ត៌មានមកពីណាទេ តែគ្មានទេនៅក្រុងបាវិតចំពោះករណីបង្ខាំងមនុស្សខុសច្បាប់..! បង្ខាំងម៉េច...គេដើរពេញទឹកពេញដីហ្នឹង! ចំពោះអ្នកខាងក្រៅគេមិនឱ្យចូលទេ ព្រោះគេខ្លាចចូលទៅលួចអីវ៉ាន់គេ[..] អ្នកចេញចូលបានទាល់តែមានកាតបុគ្គលិកទើបគេអនុញ្ញាត»។ បន្ថែមលើនេះ លោកអធិការក្រុងនៅតែបញ្ជាក់ថា គ្មានករណីបង្ខាំងមនុស្សដូចការលើកឡើងនោះឡើយ។
ដោយឡែក នៅថ្ងៃដដែលនោះដែរ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានមានប្រាសសន៍ថា អាជ្ញាធរបានចុះបង្ក្រាបទីតាំងមួយកន្លែងនៅក្រុងបាវិត រកឃើញជនជាតិវៀតណាមជិត៣០០នាក់ដែល អត់មានលិខិតឆ្លងដែន អត់មានទិដ្ឋាការស្របច្បាប់ ចូលមកធ្វើការនៅស្រុកខ្មែរ។ ទន្ទឹមនឹងនោះ អាជ្ញាធរក៏បានរកឃើញ ករណីមិនប្រក្រតីមួយចំនួនទៀត ដែលសម្តេចកំពុងឱ្យញែកការងារនោះជាចំណែកៗ និងពិនិត្យមើលថា តើក្រុមហ៊ុនទាំងនោះមានអាជ្ញាបណ្ណត្រឹមត្រូវ ឬអត់ ប៉ុន្តែជាទូទៅ គឺអាជីវកម្មអនឡាញគ្មានច្បាប់អនុញ្ញាតនោះឡើយ។
ទោះយ៉ាងណា ការបញ្ជាក់របស់ សម្តេចក្រឡាហោម ស ខេង នាពេលនេះ បង្ហាញថា លោកអធិការវ័យក្មេងរូបនេះ ហាក់នៅមានភាពស្រពិចស្រពិល ព្រោះតែការបញ្ជាក់របស់លោកមិនមានភាពច្បាស់លាស់ និងមិនបានចុះទៅត្រួតពិនិត្យផ្ទាល់ដល់ទីតាំងខាងលើនោះទេ ប៉ុន្តែលោកបែរជាហ៊ានអះអាងផ្ទុយពីប្រសាសន៍ របស់សម្តេចក្រឡាហោមទៅវិញ..? បណ្តុំអគារនៃមជ្ឈមណ្ឌលពាណិជ្ជកម្មទីក្រុងហេងហេង ត្រូវបានគេរាយការណ៍ថា មានបទល្មើសអាជីវកម្មខុសច្បាប់ជាច្រើននៅខាងក្នុងនោះ ដូចជា៖ ករណីបង្ខាំងមនុស្សខុសច្បាប់ កាស៊ីណូអនឡាញ និងការបង្ខំឱ្យធ្វើសច្ចារកម្ម ។ល។ បន្ថែមលើនេះ អ្វីដែលកាន់តែហួសចិត្តបំផុតនោះ គឺលោកអធិការវ័យក្មេងស្ទើរបទពិសោធរូបនេះ បញ្ជាក់ប្រាប់ SBM News ថា «លោកមិនបានដឹងថា មានកាស៊ីណូអនឡាញខុសច្បាប់បង្កប់នៅទីតាំងខាងលើនោះ ឬអត់ឡើយ ព្រោះគេមិនអនុញ្ញាតឱ្យលោកចូល ហើយលោកក៏គ្មានភារកិច្ចអីត្រូវចូលទៅទីនោះដែរ...»។
ចំណែកលោក លឹម សៀងហេង អភិបាលនៃគណៈអភិបាលក្រុងបាវិត SBM news មិនអាចសុំការបំភ្លឺបានទេ ព្រោះទូរសព្ទចូលលោកសួរថាមកពីខាងណា ហើយបានបិទទូរសព្ទវិញភ្លាមៗ ក្រោយដឹងថា ជាសារព័ត៌មាន ខណៈលេខទូរសព្ទនោះមិនអាចទាក់ទងបានតែម្ដង។ យ៉ាងណា មានសេចក្តីរាយការណ៍ពីបុគ្គលិកកាស៊ីណូនៅបណ្តុំអគារពាណិជ្ជកម្មទីក្រុងហេងហេង ថា ក្រោយមានការចុះផ្សាយពីសារព័ត៌មានមក សន្តិសុខនៅក្នុងអគារត្រូវបានរឹតបណ្តឹងជាងមុន ចំពោះអ្នកប្លែកមុខ គឺមិនអនុញ្ញាតឱ្យចូលទៅខាងក្នុងជាដាច់ខាត ទោះកន្លងមកក្រុមអ្នកដឹកជញ្ជូនអីវ៉ាន់ឱ្យបុគ្គលិកនៅក្នុងអគារ ក៏ត្រូវបានហាមឃាត់មិនឱ្យចេញ-ចូលដូចមុនដែរ ពោលគឺអនុញ្ញាតតែអ្នកដែលមានបណ្ណ ដែលចេញដោយក្រុមហ៊ុនប៉ុណ្ណោះ។ ប្រភពពីបុគ្គលិកដដែលបញ្ជាក់ជាថ្មីៗថា ប៉ុន្មានថ្ងៃមុនឃើញមានមន្ត្រីថ្នាក់ដឹកនាំខេត្តចុះមកសួរនាំថៅកែៗនៅក្នុងអគារពាណិជ្ជកម្មទីក្រុងហេងហេង និងត្រួតពិនិត្យអគារមួយចំនួនដែរ ប៉ុន្តែមិនមានសកម្មភាពអ្វីគួរឱ្យចាប់អារម្មណ៍នោះទេ ចំណែកឯក្រុមមនុស្សមួយចំនួនដែលត្រូវគេបង្ខាំងទុកនោះ ត្រូវបានមេការបញ្ជូនចេញភ្លាមៗ បន្ទាប់ពីបែកធ្លាយព័ត៌មានដល់អ្នកកាសែតអស់ហើយដែរ..។
សូមបញ្ជាក់ថា មជ្ឈមណ្ឌលពាណិជ្ជកម្មទីក្រុងហេងហេង ស្ថិតនៅជាប់ព្រំដែនកម្ពុជា-វៀតណាម នាក្រុងបាវិត ខេត្តស្វាយរៀង។ បណ្តុំអគារនេះ ជាគម្រោងទីក្រុងរណបពហុពាណិជ្ជកម្មរបស់ក្រុមហ៊ុន ហេង ហ៊ី អ៊ីនវេសមែន អេន ឌីវើលុបមែន គ្រុប (Heng He Investment and Development Group Co.,LTD) ដែលអគ្គនាយកក្រុមហ៊ុននេះមានឈ្មោះ ស៊ូ លាងហ្សេង (Su LIANGSHENG) ជាអ្នកជំនួញជនជាតិចិន មានក្រុមហ៊ុនអាជីវកម្មជាច្រើននៅក្នុងប្រទេសកម្ពុជា។ អំឡុងនៃពិធីសម្ពោធគម្រោងទីក្រុងរណបពហុបំណងនៃបណ្តុំអគារពាណិជ្ជកម្មទីក្រុងហេងហេង កាលពីថ្ងៃទី១២ ខែធ្នូ ឆ្នាំ២០១៨ ក៏មានវត្តមាន អតីតអភិបាលក្រុងបាវិត លោក សេង សិលា បច្ចុប្បន្ន ជាអភិបាលរងខេត្តស្វាយរៀង និងលោកឧត្ដមសេនីយ៍ឯក អ៊ុក កោសា ចូលរួមជាគណៈអធិបតី និងបានថ្លែងសន្ទរកថា គាំទ្រគម្រោងរបស់លោក ស៊ូ លាងហ្សេងនេះផងដែរ...៕
