(សៀមរាប)៖ អត្តពលិកកីឡាកង់ភ្នំជម្រើសជាតិកម្ពុជា កំពុងហ្វឹកហាត់យ៉ាងសស្រាក់សស្រាំនៅខេត្តសៀមរាប ដើម្បីត្រៀមបង្ហាញវត្តមានក្នុងព្រឹត្តិការណ៍កីឡាអាស៊ីអាគ្នេយ៍ [ស៊ីហ្គេម] លើកទី៣២ ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ...។
គ្រូបង្វឹក លោក អ៊ុច សុខវិបុល និងជាអត្តពលិកកីឡាកង់ភ្នំកម្ពុជា បានឱ្យដឹងថា ក្រុមអត្តពលិកកីឡាកង់ភ្នំកម្ពុជា មានសមាជិក៨នាក់កំពុងហ្វឹកហាត់នៅភូមិខ្នារសណ្តាយ ឃុំខ្នារសណ្តាយ ស្រុកបន្ទាយស្រី ខេត្តសៀមរាប (ឧទ្យាជាតិព្រះជ័យវរ័្មន-នរោត្តម ភ្នំគូលែន) ជាទីតាំងប្រកួតផ្ទាល់សម្រាប់ស៊ីហ្គេម ឆ្នាំ២០២៣។
លោក អ៊ុច សុខវិបុល បានឱ្យដឹងថា ការហ្វឹកហាត់ គឺមានវឌ្ឍនភាពជាបន្តបន្ទាប់, ទាំងទីលានហ្វឹកហាត់ Performance កីឡាករ-កីឡាការីនី, លទ្ធផលនៃការប្រកួតជាតិ និងអន្តរជាតិ, ចំណេះដឹង និងជំនាញ, ការរស់នៅប្រកបដោយ សេចក្ដីថ្លៃថ្នូរ។ ទាំងអស់នេះ គឺកើតឡើងដោយកិច្ចការងារជំនាញ មានផែនការជាក់លាក់ មានការប្រតិបត្តិ ការតាមដានដោយយកចិត្តទុកដាក់ ការធ្វើបច្ចុប្បន្នភាពឱ្យទាន់សម័យកាល កិច្ចសហការប្រកបដោយទំនុកចិត្ត និងទំនុកចិត្តរបស់ក្រុម គួបផ្សំនឹងការគាំទ្រពីថ្នាក់លើដល់ថ្នាក់ក្រោម រួមមាន សហព័ន្ធកីឡា ក្រសួងពាណិជ្ជកម្ម ស្ថាប័នកីឡា ស្ថាប័នអប់រំ និងថ្នាក់ដឹកនាំប្រទេស។
គ្រូបង្វឹករូបនេះ លើកឡើងបន្ថែមថា កាលពីស៊ីហ្គេម លើកទី៣១ ឆ្នាំ២០២១ (លើកមកឆ្នាំ២០២២) នៅប្រទេសវៀតណាម កង់ភ្នំកម្ពុជា ធ្វើបានល្អ ដោយកៀកទៅនឹងការប្រជែងមេដាយ តាមរយៈកីឡាករ ឆាន ឆៃហ្វុង ឈរនៅលេខ៥ ខណៈកីឡាករ ហួត លយរស្មី ឈរនៅលេខ៦ ក្នុងកម្រិតអ្នករត់ផ្តាច់មុខ២ជុំ ពីកីឡាករជើងខ្លាំងៗ និងមានបទពិសោធ ស្របពេលកីឡាការិនី ខេន ម៉ាឡៃ និង យត់ កន្និកា នៅក្មេងខ្ចី ប៉ុន្តែក្លាហានរត់ដេប៉ាឈានមុខកីឡាការិនីជើងខ្លាំងៗ និងមានបទពិសោធន៍។
លោកបញ្ជាក់ថា «ខ្ញុំបានដាក់ក្ដីរំពឹងខ្ពស់ ថានឹងអាចទទួលបានលទ្ធផលល្អនៃការប្រកួតស៊ីហ្គេមនាពេលខាងមុខ។ យើងសម្លឹង Podium ក្តាលេខ១ ២ ៣។ យើងចង់បំបែកកំណត់ត្រានៃកីឡាប្រណាំងកង់ជាប្រវត្តិសាស្ត្រ ដែលកម្ពុជាធ្វើជាម្ចាស់ផ្ទះ។ ក្នុងនាមពួកខ្ញុំ ជាគ្រូបង្វឹកជំនាញ និងក្រុមការងារ ព្រមទាំងកូនសិស្សជាអត្តពលិក នៅរំជំហ្វឹកហាត់ទាំងអស់ មានសេចក្ដីសោមន្សរីករាយ នឹងការទទួលបានឱកាសកិច្ចការនេះ។ យើងមានស្មារតីខ្ពស់ចំពោះកិច្ចការយើងមានទឹកចិត្ត និងគោរពប្រតិបត្តិឱ្យតម្លៃចំពោះកិច្ចការងាររបស់ខ្លួន និងកិច្ចការងារកីឡា (ការងារសង្គម)»។ កង់ភ្នំ ជាវិញ្ញាសាក្នុងប្រភេទកីឡាទោចក្រយាន នឹងត្រូវប្រកួតក្នុងស៊ីហ្គេម ឆ្នាំ២០២៣ នៅឧទ្យាជាតិព្រះជ័យវរ័្មន-នរោត្តម (ភ្នំគូលែន) ដោយនៅក្នុងវិញ្ញាសាកង់ភ្នំមានវិញ្ញាសាបន្ថែមទៀត ដូចជាបុរស-នារី (XCO Men-Women) បណ្តាក់បុរស-នារី (XCO Mix Relay) និង Eliminate បុរស-នារីជាដើម៕
