(រាជធានីភ្នំពេញ)៖ រាជរដ្ឋាភិបាលកម្ពុជា បានជំរុញឱ្យក្រសួងស្ថាប័នពាក់ព័ន្ធ និងរដ្ឋបាលខេត្តសៀមរាប រៀបចំអភិវឌ្ឍតំបន់[រុនតាឯក] ទៅជាភូមិធម្មជាតិរុនតាឯក ដែលជាទីតាំងបន្តមរតកពីសម្តេចវិបុលបញ្ញា សុខ អាន និងឱ្យក្លាយទៅជាទីក្រុងរណបថ្មី។ នេះបើតាមការលើកឡើង នៅក្នុងកិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី០៩ ខែកញ្ញា ឆ្នាំ២០២២...។
តំបន់រុនតាឯកនេះ ជាតំបន់សម្រាប់ការផ្លាស់ទីលំនៅរបស់ប្រជាពលរដ្ឋ ដែលបានស្ម័គ្រចិត្តរុះរើសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀត ដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា។ ដោយមានការរៀបចំកសាងនូវហេដ្ឋារចនាសម្ព័ន្ធរូបវន្តសំខាន់ៗ រួមមាន៖ ផ្លូវលំ សាលារៀន មន្ទីរពេទ្យ សេវាទឹកស្អាត និងអគ្គិសនីជាដើម។
សូមរំលឹកថា កាលពីថ្ងៃទី១៧ ខែសីហា ឆ្នាំ២០២២ ក្រុមការងារអន្តរក្រសួង ដឹកនាំដោយ ឯកឧត្តម ឧបនាយករដ្ឋមន្ត្រី ជា សុផារ៉ា បានបើកយុទ្ធនាការទ្រង់ទ្រាយធំ ចុះវាស់វែង កំណត់[និយាមកា]ក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ ក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្នុងការគ្រប់គ្រងរបស់អាជ្ញាធរជាតិអប្សរា។ យុទ្ធនាការនេះ មានកម្លាំងសរុបប្រមាណ១២០០នាក់ ចែកចេញជា៦៨ក្រុម រួមមាន៖ ការចូលរួមពីមន្រ្តីជំនាញរបស់ក្រសួងរៀបចំដែនដី នគរូបនីយកម្ម និងសំណង់ មន្រ្តីជំនាញរបស់ក្រសួងវប្បធម៌ និងវិចិត្រសិល្បៈ និងមន្រ្តីរដ្ឋបាលខេត្តសៀមរាប។
គិតត្រឹមថ្ងៃទី៣ ខែកញ្ញា ឆ្នាំ២០២២ ក្រុមការងារបោះបង្គោលព្រំដី និងស្លាកលេខដីឡូតិ៍បានចំនួនសរុប១៤២៧ឡូតិ៍ ក្នុងនោះដីឡូតិ៍ដែលបានចាប់ឆ្នោតរួចមានចំនួន១១១៧ឡូតិ៍ និងបានបោះបង្គោលព្រំ និងស្លាកលេខរួចរាល់ផងដែរ។
ទន្ទឹមនឹងនេះ រាជរដ្ឋាភិបាល បានថ្លែងនូវការកោតសរសើរដល់ ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានដឹកនាំ និងសហការជាមួយក្រសួងវប្បធម៌និងវិចិត្រសិល្បៈ ក្រសួងបរិស្ថាន អាជ្ញាធរជាតិអប្សរា ក្រសួងស្ថាប័នពាក់ព័ន្ធ និងរដ្ឋបាលខេត្តសៀមរាប ដោះស្រាយផលប៉ះពាល់ចំពោះអ្នកកាន់កាប់ដីធ្លី និងសំណង់ខុសច្បាប់ ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ដើម្បីបំពេញតាមលក្ខខណ្ឌនៃការបន្ត ការថែរក្សាសម្បត្តិបេតិកភណ្ឌនៅតំបន់រមណីយដ្ឋានអង្គរ ជា [បេតិកភណ្ឌពិភពលោក]៕
សូមទស្សនាវីដេអូព័ត៌មាន៖
