(បាត់ដំបង)៖ ឯកឧត្ដមសុខ លូ អភិបាលខេត្តបាត់ដំបង បានដឹកនាំមន្ត្រីជំនាញចុះទៅធ្វើការត្រួតពិនិត្យលើផលិតផលចំណីអាហារដែលវេចខ្ចប់រួចដូចជា ណែមសាច់ត្រី ណែមស្បែកជ្រូក សង្វាក់សាច់ត្រី ដែលកំពុងតែធ្វើការដាក់តាំងលក់នៅតាមដងផ្លូវជាតិលេខ៥ ស្រុកសង្កែ និងនៅក្នុងក្រុងបាត់ដំបង និងស្រុកឯកភ្នំ ខេត្តបាត់ដំបង ថ្ងៃទី០១ ខែកញ្ញា ឆ្នាំ២០២២។
ការចុះត្រួតពិនិត្យនេះ ត្រូវបានធ្វើឡើងដើម្បីផ្តល់នូវសេចក្តីទុកចិត្តសម្រាប់អ្នកលក់ណែមត្រី ពិសេសទំនុកចិត្តពីអ្នកនិយមចូលចិត្តបរិភោគណែមត្រី ដោយមានការចូលរួមពី ឯកឧត្ដមស៊ិន ស៊ីដេត អគ្គនាយករង នៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្រ្កាបការក្លែងបន្លំ នៃក្រសួងពាណិជ្ជកម្ម និងមន្ត្រីជំនាញ ដែលបាននាំយករថយន្តមន្ទីរពិសោធន៍ចល័តផ្នែកម្ហូបអាហារ យកសំណាកចំនួន២០គំរូមកធ្វើការពិនិត្យ ក្នុងគោលបំណងដើម្បីស្វែងសារធាតុគីមីបូរ៉ាក់ ដែលកន្លងមកធ្លាប់មានការលួចដាក់បន្ថែមម្សៅសារធាតុគីមីបូរ៉ាក់នៅលើណែមទាំងនោះ ដើម្បីការរក្សារទុកបានយូរពីអ្នកផលិតណែមត្រី។
ឯកឧត្ដម បានបញ្ជាក់ថា ក្រោយពីការធ្វើពិសោធន៍ទៅលើសំណាកផលិតផលណែម ដែលលក់ជាច្រើនកន្លែងនៅចំណុចផ្លូវជាតិលេខ៥ ស្ថិតក្នុងឃុំអន្លង់វិល ស្រុកសង្កែ និងទីតាំងសិប្បកម្មផលិតណែម មួយចំនួនទៀត នៅភូមិព្រែកខ្ពប ឃុំព្រែកខ្ពប ស្រុកឯកភ្នំរួចមក។ ជាលទ្ធផលផលិតផលណែមទាំងនោះពុំមានផ្ទុកសារធាតុគីមីបូរ៉ាក់ ដែលនាំឱ្យមានការប៉ះពាល់ដល់សុខភាព និងអាយុជីវិតអ្នកបរិភោគនោះឡើយ ហើយការត្រួតពិនិត្យនេះនឹងធ្វើឡើងជាបន្តបន្ទាប់ទៀតទៅលើគ្រប់មុខម្ហូបអាហារដែលសង្ស័យថា មានផ្ទុកសារធាតុគីមីពុល។
«បន្ទាប់ពីពិសោធន៍ទាំងការលក់ដូរនៅតាមតាមដងផ្លូវ ទាំងការផលិតតាមនៅផ្ទះនិងសហគមន៍រួចមក ឃើញថាណែមត្រីនៅបាត់ដំបង មិនមានសារធាតុគីមីហាមឃាត់ទេ។ យើងអាចហូបបានដោយការជឿជាក់»។ នេះជាការអះអាងរបស់ឯកឧត្តម សុខ លូ
ឯកឧត្ដម បានអំពាវនាវដល់ម្ចាស់សិប្បកម្ម និងអ្នកផលិតផលិតផលអាហារទាំងអស់ សូមកុំប្រើប្រាស់សារធាតុគីមីពុលក្នុងចំណីអាហារជាដាច់ខាត ព្រោះវាបណ្តាលឱ្យខូចសុខភាពដល់អ្នកបរិភោគ និងធ្វើឱ្យប៉ះពាល់ដល់កេរ្តិ៍ឈ្មោះម្ហូបអាហារប្រចាំខេត្តរបស់យើងទាំងមូលផងដែរ។
គួររំលឹកថា រថយន្តមន្ទីរពិសោធន៍ចល័តនេះ អាចពិសោធន៍រកសារធាតុគីមីពុល ដែលផ្ទុកក្នុងចំណីអាហារដោយប្រើពេលត្រឹមតែ១០នាទីប៉ុណ្ណោះ ដែលរថយន្តនេះត្រូវបានផ្ដល់ដោយក្រសួងពាណិជ្ជកម្ម៕ រាយការណ៍ដោយ៖ លោក សុខ វិឆ័យ
សូមទស្សនាវីដេអូព័ត៌មាន៖
