(ខេត្តមណ្ឌលគិរី)៖ បន្ទាប់ពីមានការចុះផ្សាយពីពូជសត្វខ្យង៣ប្រភេទមានដើមកំណើតមកពីប្រទេសជប៉ុន ហើយត្រូវបានបុរសខ្មែរម្នាក់នាំយកមកចិញ្ចឹម ដោយលក់ក្នុងតម្លៃមួយថ្លៃខ្ពស់កប់ពពក និងមានកសិដ្ឋានបង្កាត់ពូជលក់ជូនអតិថិជន នាំឱ្យមហាជនមួយចំនួនធំមានការភាន់ច្រឡំលើពូជខ្យងជប៉ុនទាំង៣ប្រភេទនោះ ថាជាខ្យងពងក្រហមនាំចូលពីប្រទេសថៃ និងវៀតណាមទៅវិញ…។

សូមរំលឹកថា លោក ហាច ឆន ម្ចាស់កសិដ្ឋាន៤០០ ស្ថិតនៅភូមិអូរណា ឃុំស្រែខ្ទុម ស្រុកកែវសីមា បានផ្តល់បទសម្ភាសដល់ SBM News ដឹងថា លោកបានបញ្ចប់ការសិក្សាផ្នែកកសិកម្មនៅសាកលវិទ្យាល័យកសិកម្មព្រែកលៀប និងបានចូលបម្រើការងារនៅតាមបណ្តាអង្គការ ស្ថាប័នក្រៅរាជរដ្ឋាភិបាលមួយចំនួនរយៈពេលជិត២០ឆ្នាំ ដោយបានបន្លាស់ទីរស់នៅតាមការងាររហូតតាំងទីលំនៅអចិន្ត្រៃនៅស្រុកកែវសីមានេះ។ ដោយសារលោកជាមនុស្សស្រឡាញ់វិស័យកសិកម្ម និងចូលចិត្តស្រាវជ្រាវលើផ្នែកមួយនេះ បច្ចុប្បន្ន លោកបានបើកកសិដ្ឋានចិញ្ចឹមសត្វ ទាំងប្រភេទសត្វរស់លើគោក ប្រភេទសត្វរស់ក្នុងទឹក និងការសិក្សាស្រាវជ្រាវជីវចម្រុះផ្សេងៗរហូតទទួលបានជោគជ័យចំនួន៤០០មុខ និងកំពុងបន្តការស្រាវជ្រាវបន្ថែមទៀតផងដែរ។

ដោយឡែក កាលពីដើមឆ្នាំ២០២២កន្លងទៅនេះ មិត្តភក្តិរបស់លោកម្នាក់រស់នៅប្រទេសថៃ បានណែនាំឱ្យចិញ្ចឹមសត្វខ្យង៣ប្រភេទ មានដើមកំណើតពីប្រទេសជប៉ុន គឺទី១. ខ្យងប័រ ទី២.ខ្យងទុរេន និងទី៣.ខ្យងឈឺរី ដែលមានឱជារសឆ្ងាញ់សម្បូរប្រូតេអ៊ីន ងាយស្រួលចិញ្ចឹម កើតកូនលឿនដល់ទៅរាប់ពាន់ក្បាលក្នុងពេលវាមានវដ្តបន្តពូជម្ដងៗ (មួយឆ្នាំមានកូន៤០ដង) និងមានទីផ្សារខ្ពស់នៅឯក្រៅប្រទេស។ ទន្ទឹមនោះពងខ្យងទាំង៣ប្រភេទនេះ មានពណ៌ក្រហមដូចទៅនឹងខ្យងម្យ៉ាងនាំចូលពីប្រទេសថៃ និងវៀតណាម ដែលកសិករខ្មែរមួយចំនួនយកមកចិញ្ចឹម ដើម្បីផលិតជាចំណីសត្វ និងនាំចេញទៅប្រទេសវៀតណាមវិញក្នុងតម្លៃ១គីឡូក្រាមត្រឹម៣០០រៀលប៉ុណ្ណោះ ហើយក៏ជាសត្វខ្យងបំផ្លាញផលដំណាំកសិកម្មខ្លាំងផងដែរ។ ផ្ទុយទៅវិញ សម្រាប់ពូជខ្យងដែលលោកនាំចូលមកពីប្រទេសជប៉ុននេះ គឺខុសស្រឡះពីពូជខ្យងនាំចូលពីប្រទេសថៃ-វៀតណាមដាច់ឆ្ងាយតែម្ដង។

ប្រភេទខ្យងប័រ និងខ្យងទុរេន មានតម្លៃដល់ទៅ៤០ម៉ឺនរៀល ឯខ្យងឈឺរី មានតម្លៃ២០ម៉ឺនរៀលក្នុងមួយគីឡូក្រាម នេះគឺសម្រាប់តែទីផ្សារក្នុងស្រុក ដែលលោកលក់ចែកចាយជូនបងប្អូនប្រជាពលរដ្ឋចិញ្ចឹមធ្វើមេពូជ «បើនៅប្រទេសជប៉ុន និងបណ្តាប្រទេសផ្សេងៗដែលគេចិញ្ចឹមដែរ គឺក្នុង១គីឡូក្រាមមានតម្លៃ២លានរៀលឯណោះ ដូច្នេះ សូមបងប្អូនកុំមានការភាន់ច្រឡំថា ពូជខ្យងមកពីជប៉ុនទាំង៣ប្រភេទនេះ ជាខ្យងនាំចូលមកពីថៃ-វៀតណាមដែលជាពូជមិនល្អនោះឱ្យសោះ មិនមែនទេ!» នេះជាការបញ្ជាក់បន្ថែមរបស់លោកហាច ឆន។ ដ្បិតថាពងខ្យងមកពីជប៉ុនមានពណ៌ដូចខ្យងពងក្រហម(ឬភាសាវៀតណាមហៅថា អ៊ុកភូយ៉ាង) ឬភាសាថៃហៅថា ហយខៃឌែង ប៉ុន្តែបងប្អូនប្រជាពលរដ្ឋត្រូវមើលលើប្រភេទពណ៌ និងពូជខ្យងឱ្យច្បាស់សិន មិនអាចចេះតែវិនិច្ឆយដោយមើលនឹងភ្នែកទទេបានទេ។

ថ្លែងប្រាប់ SBM News តាមទូរសព្ទនៅព្រឹកថ្ងៃពុធទី២២ ខែមិថុនា ឆ្នាំ២០២២ជាថ្មីម្តងទៀត ម្ចាស់កសិដ្ឋាន៤០០ លោក ហាច ឆន បានបញ្ជាក់ថា លោកធានាថាខ្យងទាំង៣ប្រភេទដែលលោកនាំចូលមកពីប្រទេសជប៉ុន គឺជាខ្យងដែលមានតម្លៃជាអន្តរជាតិ ព្រោះមិនមែនមានចិញ្ចឹមតែនៅប្រទេសជប៉ុន និងកម្ពុជាទេ ខ្យងនេះមានចិញ្ចឹមនៅបណ្តាប្រទេសមួយចំនួនជុំវិញពិភពលោក ហើយយើងទើបតែយកមកសាកល្បងទេ គឺរូបលោកជាអ្នកនាំយកមកដំបូងគេតែម្ដង។ បន្ថែមលើនេះ លោក ហាច ឆន ក៏បានគូសបញ្ជាក់ចំពោះការរិះគន់លោកថា ខ្យងគ្មានភេទញី ឬឈ្មោលទេ ពោលគឺជាសត្វទ្វេភេទ ដោយលោកបញ្ជាក់ច្បាស់ថា ក្នុងនាមលោកជាអ្នកស្រាវជ្រាវលើប្រភេទសត្វខ្យងនេះ គឺសត្វខ្យងពិតជាមានញីមានឈ្មោល ដើម្បីធ្វើការបង្កាត់បន្តពូជជាមួយគ្នា។ សម្រាប់អ្នកចង់ដឹងច្បាស់ពីភេទរបស់សត្វខ្យង ហើយចង់បានការបញ្ជាក់ សូមធ្វើដំណើរមកកាន់កសិដ្ឋានរបស់លោកផ្ទាល់ លោកនឹងបង្ហាញប្រាប់ជាក់ស្តែងតែម្ដង…៕

សូមទស្សនាវីដេអូព័ត៌មាន៖