ខេត្តបន្ទាយមានជ័យ៖ ពលរដ្ឋខ្មែរចំនួន៣នាក់ដែលបម្រុងលួចរត់ឆ្លងដែនខុសច្បាប់ទៅប្រទេសថៃ នាថ្ងៃទី៦ ខែមិថុនា តាមចំណុចមាត់អូរព្រំដែន ក្នុងភូមិក្បាលទំនប់ ឃុំអូរសំព័រ ស្រុកម៉ាឡៃ ខេត្តបន្ទាយមានជ័យ ត្រូវបានអាជ្ញាធរខេត្តបន្ទាយមានជ័យឃាត់បានទាន់ពេលវេលា។
ការឈានដល់ការស្កាត់ និងឃាត់បានពលរដ្ឋខ្មែរចំនួន៣នាក់នោះ គឺសម្រេចបានតាមរយៈក្រោមការចង្អុលបង្ហាញពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ។ ក្នុងចំណោមពលរដ្ឋដែលបម្រុងលួចឆ្លងដែនខុសច្បាប់ទៅប្រទេសថៃទាំង៣នាក់នោះ គឺមានស្រីចំនួន២នាក់។ ពួកគេទាំង៣នាក់នោះមានទីលំនៅក្នុងខេត្តបន្ទាយមានជ័យទាំងអស់។
ក្រោយស្កាត់បានពលរដ្ឋទាំង៣នាក់នោះហើយ អាជ្ញាធរក៏បានឲ្យពួកគេធ្វើកិច្ចសន្យា និងប្រគល់ពួកគេទៅឲ្យផ្នែកជំនាញរបស់អធិការដ្ឋាននគរបាលស្រុកម៉ាឡៃ ដើម្បីចាត់ការបន្តតាមនីតិវិធីច្បាប់។
សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃកន្លងមកធ្លាប់បានណែនាំឲ្យអាជ្ញាធរនៅតាមព្រំដែនកម្ពុជា ថែ និងវៀតណាម ត្រូវពង្រឹង និងទប់ស្កាត់ពលរដ្ឋកុំឲ្យឆ្លងដែនទៅប្រទេសជិតខាងខុសច្បាប់ ទោះបីនៅតាមព្រំដែនពុំមានករណីឆ្លងរាលដាលជំងឺកូវីដ-១៩៕
