រាជធានីភ្នំពេញ៖ គិតចាប់ពីថ្ងៃទី២១ ដល់ថ្ងៃទី៣១ ខែឧសភា ឆ្នាំ២០២២ តម្លៃសាំងធម្មតាលក់រាយឡើងដល់៥៦០០រៀលក្នុងមួយលីត្រ ខណៈប្រេងម៉ាស៊ូតចុះថ្លៃមកត្រឹម៥៤០០រៀលវិញ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជាដែលចេញផ្សាយនៅថ្ងៃទី២៣ ខែឧសភា។
តម្លៃសាំងធម្មតាលក់រាយឡើងថ្លៃ៥៦០០រៀលក្នុងមួយលីត្រ ពោលគឺឡើង៥០រៀលក្នុងមួយលីត្រ បើធៀបកាលពី១០ថ្ងៃមុនគឺមានតម្លៃ៥៥៥០រៀលក្នុងមួយលីត្រ។ ចំណែកប្រេងម៉ាស៊ូតនៅរយៈពេល១០ថ្ងៃខាងមុខ គឺចុះថ្លៃមកត្រឹម៥៤០០រៀលក្នុងមួយលីត្រ គឺចុះ៤០០រៀល បើធៀបនឹង១០ថ្ងៃមុន គឺមានតម្លៃ៥៨០០រៀល។
ក្រសួងពាណិជ្ជកម្មបានបញ្ជាក់ថា តម្លៃប្រេងសាំងនេះ គឺក្រសួងស្រង់តម្លៃឡើង ចុះនៃប្រេងតាមទីផ្សារអន្តរជាតិមកគណនា។ ដើម្បីជួយសម្រួលដល់ជីវភាពរបស់ពលរដ្ឋ សម្តេចតេជោ នាយករដ្ឋមន្ត្រីកម្ពុជា បានសម្រេចបញ្ចុះតម្លៃប្រេងសាំងនៅកម្ពុជាចំនួន៦,៥សេនដុល្លារក្នុងមួយលីត្រ។
គូសរំលឹកថា តម្លៃប្រេងសំាងបានឡើងថ្លៃចាប់ពីពាក់កណ្តាលខែកុម្ភៈ ឆ្នាំ២០២២មកម្ល៉េះ។ ការណ៍ដែលតម្លៃសាំងឡើងថ្លៃបែបនេះ គឺដោយសារតែការដាក់ទណ្ឌកម្មសេដ្ឋកិច្ចគ្នាទៅវិញទៅមកលើប្រទេសរុស្ស៊ីដែលឈានពានអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ទើបធ្វើឱ្យតម្លៃសាំងបានកើនឡើងបែបនេះ។
កាលពីពិធីជួបសំណេះសំណាលជាមួយនឹងសហគមន៍ខ្មែរនៅទ្វីបអឺរ៉ុបប្រមាណ២១០០នាក់ នៅរាត្រីថ្ងៃទី២១ ខែឧសភា ឆ្នាំ ២០២២ សម្តេច ហ៊ុន សែនបានអំពាវនាវដល់ពលរដ្ឋកុំឱ្យចាញ់បោកការឃោសនារបស់បក្សនយោបាយដែលនិយាយពីគោលនយោបាយបញ្ចុះតម្លៃប្រេងសាំងនៅកម្ពុជា៕
