(ព្រះសីហនុ)៖ កំពង់ផែស្វយ័តក្រុងព្រះសីហនុនៅឆ្នាំ២០២៥នឹងអាចមានលទ្ធភាពប្រកួតប្រជែងតម្លៃដឹកជញ្ជូនទំនិញតាមផ្លូវទឹក។ ឯកឧត្តម គួច ចំរើន អភិបាលខេត្តព្រះសីហនុបានថ្លែងឱ្យដឹងបែបនេះនៅក្នុងពិធីពិភាក្សាការងារស្ដីពីយុទ្ធសាស្ត្រសូត្រមាសកម្ពុជា ជាមួយឯកឧត្តម Fumiaki Takahashi និងគណ:ប្រតិភូវិនិយោគជប៉ុននាថ្ងៃទី២៨ ខែមេសា ឆ្នាំ២០២២។
ឯកឧត្តម គួច ចំរើន អភិបាលខេត្តព្រះសីហនុបានថ្លែងនៅមុខឯកឧត្តម Fumiaki Takahashi ប្រធានសមាគមជប៉ុន-កម្ពុជាថា តាមរយៈការជួយគាំទ្រពង្រីកកំពង់ផែស្វយ័តក្រុងព្រះសីហនុពីរដ្ឋាភិបាលជប៉ុនកន្លងមកនេះបានធ្វើឱ្យកំពង់ផែបច្ចុប្បន្នមួយនេះអាចឱ្យនាវាដែលមានជម្រៅទឹក៩,៥ម៉ែត្រចូលចត ហើយកំពង់ផែមួយនេះនឹងពង្រីកវិសាលភាពទទួលនាវាជម្រៅ១៣,៥០ម៉ែត្រចូលចតនៅឆ្នាំ២០២៥ខាងមុខនេះ។
ឯកឧត្តមអភិបាលខេត្តព្រះសីហនុបានថ្លែងប្រាប់ប្រធានសមាគមជប៉ុន-កម្ពុជាថា រាជរដ្ឋាភិបាលកម្ពុជាបានកំណត់ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ជាតារារះនាទិសនិរតី និងជាប៉ូលសេដ្ឋកិច្ចរបស់ប្រទេសកម្ពុជា។
ឯកឧត្តម គួច ចំរើន បានវាយតម្លៃខ្ពស់ចំពោះ រដ្ឋាភិបាលជប៉ុនដែលតែងតែជួយកម្ពុជាលើវិស័យជាច្រើនដូចជា វិស័យសុខាភិបាល អប់រំ និងហេដ្ឋារចនាសម្ព័ន្ធនានា។ អភិបាលខេត្តព្រះសីហនុ មានក្ដីរំពឹងថា តាមរយៈការទស្សនកិច្ចរបស់គណ:ប្រតិភូជប៉ុនមកកាន់ខេត្តព្រះសីហនុ នឹងជំរុញឱ្យខេត្តនៅជាប់សមុទ្រមួយនេះកាន់តែអាចទទួលបានការចាប់អារម្មណ៍ពីភ្ញៀវទេសចរ និងអ្នកវិនិយោគបន្ថែមទៀត។
នាឱកាសមកទស្សនកិច្ចនៅខេត្តព្រះសីហនុ ឯកឧត្តម Fumiaki Takahashi បានថ្លែងប្រាប់ឯកឧត្តម គួច ចំរើនថា ជប៉ុនក៏មានបំណងក្នុងការបណ្តាក់ទុនវិនិយោគបង្កើតរោងចក្រគ្រឿងសម្អាងនៅក្នុងខេត្តព្រះសីហនុផងដែរ ដោយសំអាងលើកម្ពុជាមានវត្ថុធាតុដើមសូត្រមាស ហើយជប៉ុនមានខាងបច្ចេកទេស ដើម្បីផលិតចេញជាគ្រឿងសម្អាង និងសាប៊ូ។
គូសបញ្ជាក់ថា កំពង់ផែស្វយ័តក្រុងព្រះសីហនុនៅរយៈពេល៣ខែដើមឆ្នាំ២០២២នេះ មានទំនិញឆ្លងកាត់កើនឡើងចំនួន១៩ភាគរយ បើធៀបនឹង៣ខែដើមឆ្នាំ២០២១។ ក្នុងឆ្នាំ២០២១ កំពង់ផែស្វយ័តក្រុងព្រះសីហនុមានទំនិញឆ្លងកាត់ប្រមាណ៦,៩លានតោន ដែលគិតជាទឹកប្រាក់ចំនួន៩៣លានដុល្លារ គឺកើនឡើង១៧,៦៤ភាគរយ បើធៀបនឹងឆ្នាំ២០២០ គឺរកចំណូលបានតែ៧០លានដុល្លារ ធ្លាក់ចុះ៦ភាគរយ។
ចំណតកំពង់ផែស្វយ័តក្រុងព្រះសីហនុដែលមានប្រវែង៣៥០ម៉ែត្រ និងជម្រៅទឹក១៤,៥ម៉ែត្រនេះនឹងអាចឱ្យនាវាដែលមានសមត្ថភាពផ្ទុកកុងតឺន័រចំនួន ៦០០០០ DWT (៥០០០ TEUs) ចូលចត។ កំពង់ផែនេះ បាននិងកំពុងរៀបចំសាងសង់ផែកុងតឺន័រថ្មីជាជំហានទី១ ប្រវែង៣៥០ម៉ែត្រ ជម្រៅទឹក ១៤,៥ ម៉ែត្រ ក្នុងរយៈពេល៤ ឆ្នាំពីឆ្នាំ២០២២ ដល់ឆ្នាំ២០២៥៕
ប្រភពរូបភាព៖ ក្រសួងសាធារណការ និងដឹកជញ្ជូន និងរដ្ឋបាលខេត្តព្រះសីហនុ
