ប៉ូលិសបានចោទប្រកាន់មនុស្ស៦នាក់ពាក់ព័ន្ធនឹងការលង់ទឹករបស់តារាសម្តែង "Tangmo" ក្នុងករណីរួមមាន ការធ្វេសប្រហែសបណ្តាលឱ្យមនុស្សស្លាប់ ការផ្តល់ព័ត៌មានមិនពិត និងលាក់បាំងភស្តុតាងដើម្បីជួយជនល្មើស។ នេះបើតាមក្រុមអ្នកស៊ើបអង្កេតបានធ្វើសន្និសីទសារព័ត៌មាននៅទីបញ្ជាការដ្ឋាននគរបាល ដើម្បីបិទសំណុំរឿងរយៈពេល២ខែ ដោយបានកំណត់ថាតារាស្រីរូបនេះបានធ្លាក់ពីកប៉ាល់ល្បឿនលឿន ហើយត្រូវក្បាលម៉ាស៊ីនកិនមុនពេលលង់ទឹកទន្លេចៅប្រាយ៉ា កាលពីចុងខែកុម្ភៈ ក្នុងវ័យ៣៧ ឆ្នាំ។
លោកឧត្តមសេនីយ៍ទោ Paisan Wongwacharamongkol ស្នងការនគរបាលខេត្ត Nonthaburi បាននិយាយថា Tanupat Lerttaweewit ហៅ Por (ម្ចាស់ទូកល្បឿនលឿន) ត្រូវបានចោទប្រកាន់ពីបទមិនប្រុងប្រយ័ត្នបណ្តាលឱ្យមនុស្សស្លាប់ បើកទូកគ្មានអាជ្ញាបណ្ណ ទម្លាក់វត្ថុចូលទៅក្នុងទន្លេ ផ្តល់សេចក្តីថ្លែងការណ៍មិនពិត និងបើកទូកដែលមានការចុះបញ្ជីផុតកំណត់។ ចំណែកឯ Phaiboon Trikanjananun ហៅ Robert ត្រូវបានចោទប្រកាន់ពីបទធ្វេសប្រហែសបណ្តាលឱ្យមនុស្សស្លាប់ បើកទូកដោយគ្មានអាជ្ញាបណ្ណ ប្រើប្រាស់ទូកដែលមានការចុះបញ្ជីផុតកំណត់ និងទម្លាក់វត្ថុតាងចូលទៅក្នុងទន្លេ។ ចំណែក Wisapat Manomairat ហៅ Sand ប្រឈមមុខនឹងការចោទប្រកាន់ពីបទធ្វេសប្រហែសបណ្តាលឱ្យមនុស្សស្លាប់។
រីឯ Nitas Kiratisoothisathorn ហៅ Job ត្រូវបានចោទប្រកាន់ពីបទលាក់បាំងភស្តុតាងដើម្បីជួយជនល្មើសនិងទម្លាក់វត្ថុតាងចូលទៅក្នុងទន្លេ។ Idsarin Juthasuksawat ហៅ "Gatick" អ្នកគ្រប់គ្រងរបស់ Tang Mo ត្រូវបានចោទប្រកាន់ពីបទលាក់បាំងភស្តុតាងដើម្បីជួយជនល្មើស និងផ្តល់សេចក្តីថ្លែងការណ៍មិនពិត។ Peam Thamtheerasri ហៅ "Em" ត្រូវបានចោទប្រកាន់ពីបទលាក់បាំងភស្តុតាងដើម្បីជួយជនល្មើស និងមានជនល្មើសម្នាក់ទៀតជាប់ចោទពីបទនិយាយមិនពិត។
លោក Pol Lt Jirapat Phumjit ស្នងការនគរបាលខេត្តទី១ បានថ្លែងថា៖ «Tangmo មិនបានធ្លាក់ពីលើទូកដោយខ្លួនឯងនោះទេ មានករណីធ្វេសប្រហែសរបស់អ្នកនៅលើទូក»។ ឧត្តមសេនីយ៍ឯក Jirapat បាននិយាយថា "នៅពេលដែល Tangmo ត្រូវបានវាយដោយស្លាបចក្រ នាងស្រែកយំ ដោយទឹកនឹងចូលពេញសួត ហើយទើបបណ្តាលឱ្យនាងលង់ទឹកស្លាប់ភ្លាមៗ។ លោកសង្គត់ធ្ងន់ថា អ្នកជិះទូកទាំងនោះស្រវឹង ហើយមានអ្នកប្រាប់អ្នកទាំង៥នាក់ដែលនៅលើទូកពន្យារពេលជួបប៉ូលិស ដើម្បីចៀសវាងការកាត់ទោសពីបទបើកបរក្រោមឥទ្ធិពលជាតិស្រវឹង។
គួរបញ្ជាក់ផងដែរថា តារាស្រីរូបនេះបានធ្លាក់ចូលទឹកទន្លេកាលពីវេលាម៉ោង១០និង៤០នាទីយប់ថ្ងៃទី២៤ ខែកុម្ភៈ ហើយសពត្រូវបានរកឃើញនៅថ្ងៃទី២៦ ខែកុម្ភៈ៕
ប្រភព៖ Bangkokpost
